ހަވާއީގެ ރަށެއް ކަމަށްވާ މައުއީގެ ޖަންގަލީގައި ރޯވަމުންދާ އަލިފާންގަނޑުގެ ސަބަބުން، މަރުވި މީހުންގެ އަދަދު 90ށްވުރެ މައްޗަށް އަރާފައިވާކަމަށް ބޭރުގެ މީޑިއާތަކުން ރިޕޯޓުކޮށްފިއެވެ.

ރޮއިޓަރސްގައި ރިޕޯޓުކޮށްފައިވާގޮތުން، މިއަލިފާނުގެ ކާރިސާގައި މައުއީގައި މަރުވި މީހުންގެ އަދަދު ވަނީ ހޮނިހިރު ދުވަހު، 93ށް އަރާފައެވެ. މިއީ އެމެރިކާގެ ތާރީޚުގައިވެސް، ފާއިތުވި ގަރުނުގެ ތެރޭގައި ހިނގާ އެންމެ ނުރައްކާތެރި އަލިފާނުގެ ހާދިސާއެވެ. ރިޕޯޓުތައް ބުނާގޮތުން މިކާރިސާގައި މަރުވާ މީހުންގެ އަދަދު އަދިވެސް އިތުރުވެގެން ދާނެއެވެ.

މައުއީގައި ރޯވެ އަލިފާންގަނޑު ފެތުރެމުންދާތާ މިހާރު ވަނީ ހަތަރު ދުވަސްވެގެން ގޮސްފައެވެ. މީޑިއާގެ ސަމާލުކަމަށް މިކަން ބޮޑަށް އައިސްފައި މި ވަނީ، ފަތުރުވެރިކަމަށް މަޝްހޫރު މައުއީގެ އަވަށެއް ކަމަށްވާ ލަހައިނާއަށް އަލިފާންގަނޑު ފެތުރުނު ހިސާބުންނެވެ. ތާރީޚީގޮތުންވެސް ފާހަގަކޮށްލެވޭ ރިސޯޓް ޓައުނެއް ކަމަށްވާ ލަހައިނާގައި އަލިފާންގަނޑު ފެތުރި، އެތައް އިމާރާތެއް ވަނީ އަޅިއަށްވެގެން ގޮސްފައެވެ. އެތައް ކާރެއްގައި އަލިފާން ރޯވެ އަނދައިގެން ގޮސްފައިވާކަމަށްވެސް ރިޕޯޓުތައް ބުނެއެވެ.

ލަހައިނާ އެކަނި އަލުން އާރާސްތު ކުރުމަށްވެސް ގާތްގަޑަކަށް 5.5 ބިލިއަން އެމެރިކާ ޑޮލަރު ބޭނުންވާނެކަމަށް ފެޑެރަލް އިމަރޖެންސީ މެނޭޖްމެންޓް އެޖެންސީން ވަނީ ބުނެފައެވެ.

ހަވާއީގެ ގަވަރުނަރު ޖޮޝް ގްރީން ހޮނިހިރު ދުވަހު ވިދާޅުވީ، ހަށިގަނޑުތައް ހޯދުމަށްޓަކައި، އެކަމަށް ތަމުރީނުކޮށްފައިވާ ކުއްތާގެ އެހީގައި ބަލައި ފާސްކުރެވުނީ އަދި އެންމެ ތިން އިންސައްތަ ސަރަހައްދުކަމަށާއި، އެހެންކަމުން އިތުރު ތަންތައް ބަލާވަރަކަށް މަރުވި މީހުންގެ އަދަދު އިތުރުވެގެން ދާނެކަމަށެވެ.

މިއަލިފާންޑަނޑު މައުއީގައި ރޯވަން ފަށާފައި ވަނީ މިދިޔަ ހަފުތާގެ އަންގާރަ ދުވަހުއެވެ.