މިސަރުކާރުގެ ފަސް އަހަރުގެ ތެރޭގައި މަނަދޫގައި ފެށި ހަ މަޝްރޫޢެއްގެ ނިމުން ރައީސްގެ ދަތުރުފުޅުގެ ތެރެއިން ފާހަގަކުރެވިގެންދާނެ
މަނަދޫ ދާއިރާގެ މެމްބަރ އަހުމަދު ހާރޫން
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމާއި ހަވާލުވެވަޑައިގެންނެވުމުން ވީ ވައުދުތައް ރަނުން ރަނަށް ފުދެމުން އަންނަތަން ފެންނަމުންދާކަމަށާއި ކަންކަން ނުކޮށްދޭކަމަށް ބުނަނީ ކޮންމެސް ކަމަކާ ނުރުހުންވެގެން އެކަމުގެ ސަބަބުންކަމަށް މަނަދޫ ދާއިރާގެ މެމްބަރު އަހުމަދު ހާރޫނު ވިދާޅުވެއްޖެއެވެ.
ރައީސް މިހާރު ނ އަތޮޅަށް ކުރައްވަމުން ގެންދަވާ ކެމްޕެއިން ދަތުރުފުޅުގައި ނ.މަނަދޫގައި ހޮނިހިރު ދުވަހުގެ ރޭ ބޭއްވި "އުފާވެރި އަމާން ރާއްޖެ" ޖަލްސާގައި ވާހަކަދައްކަވަމުން ހާރޫން ވިދާޅުވީ ކަންކަން ނުކޮށްދޭކަމަށް ބުނަނީ ކަންކަން ނުކޮށްދޭތީ ނޫންކަމަށެވެ. ހަމައެކަނި މަނަދޫ އަށް ބަލާލިނަމަވެސް މިސަރުކާރުގެ ފަސް އަހަރުގެ ތެރޭގައި މަނަދޫގައި ފެށި ހަ މަޝްރޫޢެއްގެ ނިމުން ރައީސްގެ ދަތުރުފުޅުގެ ތެރެއިން ފާހަގަކުރެވިގެންދާނެކަމަށް ހާރޫނު ވިދާޅުވިއެވެ.
ހާރޫނު ވިދާޅުވީ 2018 ވަނަ އަހަރުގެ އިންތިޚާބުގައި ރައްޔިތުން ކައިރިއަށް ދިޔުމުން އޭރު ރައްޔިތުން އެދުނީ ނަރުދަމާ އަޅައިދީ ފެން އަޅައިދިނުމަށްކަމަށެވެ. ނަމަވެސް މިއަދު ރައްޔިތުން ކައިރިއަށް ދިޔުމުން އެދޭ ކަންތައްތައް ބަދަލުވެފައިވާކަމަށެވެ.
ހާރޫނު ވިދާޅުވީ މަނަދޫގައި މަލްޓިޕާޕަސް ހޯލެއް އަޅާވާހަކަ ދައްކަނީ 2013 ވަނަ އަހަރުން ފެށިގެންކަމަށާއި ރައީސްގެ ދަތުރުފުޅުގެ ތެރެއިން މިސަރުކާރުން އެމަސައްކަތްކޮށް ނިންމާ އެތަން ހުޅުވާނެކަމަށެވެ.
މީގެއިތުރުން ހާރޫނު ވިދާޅުވީ ރަށްރަށުގެ ރައްޔިތުންނަށް އެންމެ ފުރަތަމަ ފެނިގެންދިޔައީ ކުރީގެ ރައީސް މައުމޫންގެ އެއްފަސްކުރުމުގެ ސިޔާސަތުކަމަށެވެ. އެސިޔާސަތުގެ ދަށުން ކުދި އާބާދީތައް ބޮޑެތި ރަށްރަށަށްދާން މަޖުބޫރުކުރުވިއިރު އެރަށްރަށުގައި އެންމެ އަސާސީ ޚިދުމަތްތައްވެސް ގާއިމުކުރެވިފައިނުވާކަމަށެވެ. އޭގެފަހުން އައި އެމްޑީޕީގެ ސަރުކާރުގައި ކޮންމެސް ވަރަކަށް ރަށްރަށަށް އަޅާލާ ރަށުބަންދުން ވީއްލުމުގެ މަސައްކަތްފެށުނު ކަމަށެވެ. ނަމަވެސް އޭގެފަހުން އައި ކުރީގެ ރައީސް ޔާމީންގެ ވެރިކަމުގައި ފެނިގެންދިޔައީ މަރުކަޒުކުރުމުގެ ވިސްނުންކަމަށާއި މާލެ ސަރަހައްދަށް އާބާދީގެ ބޮޑުބަޔެއް ޖަމާކޮށް ރަށްރަށް ފަޅުކުރުމުގެ ސިޔާސަތު ކަމަށެވެ.
ނަމަވެސް ރައީސް ޞާލިހުގެ ސިޔާސަތަކަށްވީ ޖަޒީރާ ރާއްޖެކަމަށް ހާރޫނު ވިދާޅުވިއެވެ.
ހާރޫން ވިދާޅުވީ ރައީސް ޞާލިހުގެ ސިޔާސަތުތައް ރައްޔިތުންނަށް އެނގި އެކަން ތަޖުރިބާ ކުރެވިފައިވާކަމަށެވެ. ނަމަވެސް ދެން ތިބި ކެންޑިޑޭޓުން ރައްޔިތުންނަށްޓަކައި ކޮށްދޭނެކަމެއްގެ ވާހަކަ ނުދައްކަވާ ކަމަށް ހާރޫން ވިދާޅުވިއެވެ.
