ބޭރުގެ ބޭންކުތަކުގެ އިތުބާރު ސަރުކާރަށް އެބައޮތް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ނ. ކެނދިކުޅުދޫ ބަނދަރު ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ، ކެމްޕޭނަށް ނިކުމެވަޑައިގަތް ފަހުންވެސް ވަރަށް ގިނަ ބޭރުގެ ފަރާތްތަކާ ބައްދަލުވެވަޑައިގަންނަވާ ކަމަށެވެ. ސަރުކާރުން ވާ ހުރިހާ ވައުދުތައް ފުއްދުމަށް ބޭރުގެ ބޭންކުތަކުންވެސް ފައިސާ ދިނުމަށް ތައްޔާރަށް ތިބިކަމަށް ވިދާޅުވިއެވެ.

2023 ވަނަ އަހަރާ ހަމައަށް ސަރުކާރު އައިސްފައިވަނީ ދަތި އުނދަގޫ މަސައްކަތްތަކުގެ ތެރެއިން ކަމަށް ރައީސް ވިދާޅުވިއެވެ. އަދި ރާއްޖެ އިސްލާހު ކުރެއްވުމަށްޓަކައި ގިނަ މަސައްކަތްތައް ކުރެއްވި ކަމަށްވެސް ވިދާޅުވިއެވެ.

ކެނދިކުޅުދޫގެ ރައްޔިތުން ސަރުކާރުން ގެންގުޅޭ އުސޫލުތަކާއި އަމަލުކުރަމުން އައި ގޮތް ތަޖުރިބާ ކޮށްފިކަން ފާހަގަކުރައްވައި ރައީސް ވިދާޅުވީ، އެ ރަށުގެ ރައްޔިތުން ދޭ ވޯޓަކީ ގެއްލިގެންދާނެ އެއްޗެއް ނޫންކަމަށެވެ.

ރައީސް ވިދާޅުވީ އެމަނިކުފާނު ކޯލިޝަން ހެއްދެވި ބޭފުޅުންގެ ފަރާތުން ވަރަށް ބޮޑު އެއްބާރުލުމެއް ލިބިގެންދާ ކަމަށެވެ.

ރައީސް ވިދާޅުވީ، ކެނދިކުޅުދޫގައި ރައްޔިތުން އެންމެ ބޮޑަށް އެދުނު ކަމަކީ ޖޫނިއަރ ކޮލެޖާއި ހޮސްޕިޓަލް ރަނގަޅު ފެންވަރަކަށް ތަރައްގީކުރުން ކަމަށެވެ. އަދި މިހާރު ހޮސްޕިޓަލުގެ ބިންގާ އެޅިގެންދާއިރު މަޝްރޫއު އަވަހަށް ނިމިގެންދާނެ ކަމަށް އުންމީދުކުރައްވާ ކަމަށް ވިދާޅުވިއެވެ.

ކުރިއަތް އޮތް ދައުރުގައި ކެނދިކުޅުދޫގައި މަދުވެގެން 300 ރޯހައުސް ނުވަތަ ފްލެޓް އަޅުއްވައިދެއްވާނެ ކަމަށް ރައީސް ވިދާޅުވިއެވެ. ގިރާ ސަރަހައްދު ރަށުގައި ހިމާޔަތްކުރަން ޖެހިފައިވާ ކަމަށާއި، ރަށުގެ ފުއްޓަރު ފަރާތް ކުރިއަށް އޮތް ދައުރުގައި ހިމާޔަތްކޮށްދެއްވާނެ ކަމަށް ވެސް ވިދާޅުވިއެވެ.

ކުރިއަތް އޮތް ދައުރުގައި ތަފާތު ކުޅިވަރުތައް ކުޅެވޭނެ އިންޑޯ ސްޕޯޓްސް ކޮމްޕްލެކްސްއެއް ބިނާކުރައްވާނެ ކަމަށްވެސް ރައީސް ވިދާޅުވިއެވެ.