ސޮއި ފޯޖުކުރި މީހަކު އެއްލައްކަ ނުވަދިހަ އަށްހާސް ރުފިޔާއިން ޖޫރިމަނާކޮށް، ގޭ ބަންދު ކުރުމަށް ކްރިމިނަލް ކޯޓުން ހުކުމްކޮށްފިއެވެ.
ޅ. ހިންނަވަރު ފުލޫނިޔާގެ އަދީބު އުމަރުގެ މައްޗަށް މަކަރާއި ހީލަތް ހެދުމުގެ ކުށުގެ ދައުވާ ދައުލަތުން ވަނީ އުފުލާފައެވެ. އޭނާގެ މައްޗަށް މި ދައުވާ ކޮށްފައިވަނީ ވިސްޓާ އިންވެސްޓްމަންޓް ފްރައިވެޓް ލިމިޓެޑުގެ އެކައުންޓުން، އެ ކުންފުނީގެ ހިއްސާދާރުންގެ ސޮއި ފޯޖުކޮށްގެން ޗެކުތަކެއް މެދުވެރިކޮށް އެއްލައްކަ ދިހަހާސް ތިންސަތޭކަ ރުފިޔާ ނެގުމާއި ގުޅިގެންނެވެ.
މި މައްސަލައިގައި ހުކުމް ކްރިމިނަލް ކޯޓުން އާންމުކޮށްފައިވާއިރު އެ ކޯޓުގެ ހުކުމުގައިވަނީ ވިސްޓާ ކުންފުނިން ސިލޯނު ބޭންކުގައި ހުޅުވާފައިވާ އެކައުންޓްގެ ޗެކުތަކެއްގައި ލިޔެ ސޮއި ފޯޖުކޮށްގެން އަދީބު އުމަރު ފައިސާ ނެގުމަށް މަސައްކަތްކޮށް، ފައިސާ ނަގާފައިވާކަން ސާބިތުވެފައިވާތީ މަކަރާއި ހީލަތް ހެދުމުގެ ކުށުން ދައުވާ އޭނާގެ މައްޗަށް ސާބިތުވާ ކަމަށެވެ. ޤާނޫނުގައިވާ ގޮތުން މިފަދަ ކުށެއްގެ އަދަބަކީ ދެ އަހަރާއި 9 މަހާއި 18 ދުވަހުގެ މުއްދަތަކަށް ޖަލަށްލުމެވެ.
ކޯޓުގައި އަދީބުގެ ފަރާތުން ބުނެފައިވަނީ އަދަބު ޖޫރިމަނާއަކަށް ބަދަލުކޮށްދިނުމަށް އެދޭ ކަމަށާއި ވަޒީފާގައި އުޅޭ ލިޔުން ހުށަހަޅާފައިވާނެ ކަމަށެވެ. އަދި ލިޔުމުން ޖޫރިމަނާގެ ފައިސާ ދެއްކުމުގެ ޤާބިލުކަން ހުރިކަން އެނގޭކަމަށެވެ. އަދި މި މައްސަލައަކީ ގިނަ ދުވަސްވެފައިވާ މައްސަލައެއްކަމުން އެ ކަމަށް ރިޔާއަތްކޮށް އަދަބު ކަނޑައަޅައިދިނުމަށް ވެސް ވަނީ އެދިފައެވެ.
ކްރިމިނަލް ކޯޓުން ވަނީ ޤާނޫނުގެ 1202 ވަނަ މާއްދާއާ ހަވާލީ އެ ޤާނޫނުގެ 1005 ވަނަ މާއްދާގެ ހ ގެ ދަށުން އަދީބުގެ އަދަބު ލުއިކޮށްދީފައެވެ. އެގޮތުން އަދީބު، އެއްމަހާއި ހަ ދުވަހުގެ މުއްދަތަކަށް ގޭ ބަންދަށް ބަދަލުކުރުމާއެކު އެއްލައްކަ ނުވަދިހަ އަށްހާސް ރުފިޔާއިން ވަނީ ޖޫރިމަނާކޮށްފައެވެ. އަދި އެ ފައިސާ 9 އޮގަސްޓުން ފެށިގެން 12 މަސްދުވަހުގެ ތެރޭގައި މީރާއަށް ދެއްކުމަށް ވެސް އޭނާގެ މައްޗަށް ކޯޓުން ވަނީ ހުކުމްކޮށްފައެވެ.
