ގަދަ ހޫނާއި ބޯ ވިއްސާރާގައި ވެސް މަރުހަބާ ދެންނެވުމަށް ނުކުތުމަކީ ރައްޔިތުން މި ސަރުކާރު ބަލައިގެންފައިވާ ކަމުގެ ހެއްކެއް: މައުރޫފް
ޓޫރިޒަމްއާ ނުލައި ރާއްޖޭގެ މުސްތަގުބަލެއް ނޯންނާނެ
އެމްޑީއޭގެ ނައިބު ލީޑަރު އަދި ކެނދިކުޅުދޫ ދާއިރާގެ ކުރީގެ މެމްބަރު އަލީ މައުރޫފް ވާހަކަދައްކަވަނީ
ގަދަ ހޫނާއި ބޯ ވިއްސާރާގައި ވެސް މަޖުބޫރުކަމެއްނެތި މަރުހަބާ ދެންނެވުމަށް ނުކުތުމަކީ ރައްޔިތުން މި ސަރުކާރު ބަލައިގެންފައިވާ ކަމުގެ ހެއްކެއް ކަމަށް އެމްޑީއޭގެ ނައިބު ލީޑަރު އަދި ކެނދިކުޅުދޫ ދާއިރާގެ ކުރީގެ މެމްބަރު އަލީ މައުރޫފް ވިދާޅުވެއްޖެއެވެ.
ބުރާސްފަތި ދުވަހުގެ ރޭ ގއ.ވިލިގިނލީގައި ބޭއްވި "އުފާވެރި އަމާން ރާއްޖެ" ޖަލްސާގައި ވާހަކަދައްކަވަމުން މައުރޫފް ވިދާޅުވީ މިސަރުކާރުގެ ވިސްނުމަކީ ތަރައްގީ ކަމަށާއި، ރައީސްގެ ވިސްނުންފުޅަކީ ވެސް ތަރައްގީ ކަމަށެވެ. މުޅިރާއްޖެއަށް ތަރައްގީ ގެނައުމަށް ކުރާ މަސައްކަތުގައި އެއްބާރުލުން ދޭނެ ކަމުގެ ޔަގީންކަން މައުރޫފް ދެއްވިއެވެ. އަދި ވިދާޅުވީ ރާއްޖެއަށް ހަމަހިމޭންކަމާއި، ސުލްހަވެރިކަމާއި، އަމާންކަން ބޭނުންވާ ކަމަށާއި، ޓޫރިޒަމް ވެސް ކުރިއެރުވުމަށް އަމާން ރާއްޖެއެއް ބޭނުންވާ ކަމަށެވެ. ޓޫރިޒަމްއާ ނުލައި ރާއްޖޭގެ މުސްތަގުބަލެއް ނޯންނާނެ ކަމަށާއި، އަމާންކަމާއި ނުލައި ޓޫރިޒަމް ނޯންނާނެ ކަމަށް މައުރޫފް ވިދާޅުވިއެވެ. އެހެންކަމުން އަމާންރާއްޖެއަށް ދިއުމަށް ރައީސް ކުރައްވާ ދަތުރުގައި އެމަނިކުފާނަށް ރައްޔިތުން އެއްބާރުލުން ދިނުމަށް މައުރޫފް ވަނީ އެދިވަޑައިގެންފައެވެ.
ކުރީގެ ރައީސް އަބްދުﷲ ޔާމީން އަދި މައުމޫން އަބްދުލްގައްޔޫމް އާއެކު އަތޮޅުތެރެއަށް ކުރެއްވި ދަތުރުފުޅުތަކަށް އިޝާރާތްކުރައްވައި މައުރޫފް ވިދާޅުވީ އެދުވަހު ފެނުނު މަންޒަރުތަކާއި، މިއަދު ފެންނަ މަންޒަރުތައް ވަރަށް ތަފާތު ކަމަށެވެ. އޭރުގެ ރައީސުން ރަށުގެ ރައްޔިތުންނާއި، ކައުންސިލަރުންނާއި ބައްދަލުކުރައްވަން ބޭނުންފުޅު ނުވާ ކަމަށާއި، ބަނދަރަށް އަރާވަޑައިގެންނެވުމަށްފަހު، ވިދާޅުވާން ބޭނުންވާ ބަސްފުޅު ވިދާޅުވުމަށްފަހު ފުރާވަޑައިގަންނަވާ ކަމަށް މައުރޫފް ވިދާޅުވިއެވެ. ނަމަވެސް މިއަދުގެ ރައީސް ސާލިހުގެ ފަރާތްޕުޅުން ފެންނަނީ މުޅިން ތަފާތު މަންޒަރެއް ކަމަށް މައުރޫފް ވިދާޅުވިއެވެ. އަދި ވިދާޅުވީ އެމަނިކުފާނު ރައްޔިތުންނާއި ގާތުން ބައްދަލުކުރައްވައި ރައްޔިތުންނާއި ކަންކަމުގައި މަޝްވަރާ ކުރައްވާ ކަމަށެވެ.
މައުރޫފް ވިދާޅުވީ ރައްޔިތުން ރައީސް ސާލިހު ބަލައިގަނެފައިވާ ކަމަށެވެ. އެގޮތުން މިއަދު އެމަނިކުފާނު އަތޮޅުތެރެއަށް ވަޑައިގަންނަވާއިރު، އެއްވެސް މަޖުބޫރުކަމެއް ނެތި ގިނަ އަދަދެއްގެ ރައްޔިތުން ގަދަ ހޫނާއި ބޯ ވިއްސާރާގައި ވެސް އެމަނިކުފާނަށް މަރުހަބާ ދެންނެވުމަށް ނުކުންނަ ކަމަށް މައުރޫފް ވިދާޅުވިއެވެ.
މީގެ އިތުރުން މައުރޫފް ވަނީ ޕީޕީއެމް/ޕީއެންސީއަށް ވަރަށް ބޮޑަށް ފާޑުވިދާޅުވެ ވާހަކަދައްކަވާފައެވެ. އަދި ވިދާޅުވީ ޕީޕީއެމް/ޕީއެންސީގެ ކޯލިޝަންއަކީ ފޯމިއުލާއެއް ނެތް ކޯލިޝަނެއް ކަމަށެވެ. މިއަދު ޕީޕީއެމްގައި ތިއްބެވި ސިޔާސީ ބޭފުޅުންގެ ސީޔާސީ ދާއިރާ ގެއްލިފައިވާ ކަމަށް މައުރޫފް ވިދާޅުވިއެވެ. އެހެންކަމުން ޕީޕީއެމްގެ ލީޑަރޝިޕް އެމްޑީޕީއާ ގުޅިވަޑައިގަތުމަށް މައުރޫފް ގޮވާލެއްވިއެވެ.
