ކ. މާލެ
|
10 އޯގަސްޓް 2023 | ބުރާސްފަތި 10:09
ޔުނައިޓެޑަށް ކުޅެމުން އަންނަ އެ ޓީމުގެ ކުރީގެ ކެޕްޓަން ހެރީ މެގުއާ
ޔުނައިޓެޑަށް ކުޅެމުން އަންނަ އެ ޓީމުގެ ކުރީގެ ކެޕްޓަން ހެރީ މެގުއާ
ރޮއިޓާރސް
މެންޗެސްޓަރ ޔުނައިޓެޑު
މެގުއާ ހޯދުމުގައި ވެސްޓް ހޭމަށް ޔުނައިޓެޑާއެކު އެއްބަސްވުމަކަށް އާދެވިއްޖެ
 
ދެ ވަނަ ފަހަރަށް މެގުއާ ހޯދުމަށް އެދި ވެސްޓް ހޭމުން ފޮނުވާފައި ވަނީ 30 މިލިއަން ޕައުންޑުގެ ބިޑެއް

މެންޗެސްޓަރ ޔުނައިޓެޑުގެ ޑިފެންޑަރު އަދި ކުރީގެ ކެޕްޓަން ހެރީ މެގުއާ ހޯދުމުގައި ވެސްޓް ހޭމް ޔުނައިޓެޑަށް އެ ކުލަބާއެކު އެއްބަސްވުމަކަށް އާދެވިފައިވާ ކަމަށް މީޑިއާ ތަކުން ބުނެފި އެވެ.

މެގުއާ ހޯދުމުގެ ޝައުޤުވެރިކަން ފާޅުކޮށް ވެސްޓް ހޭމުން އެންމެ ފުރަތަމަ ފޮނުވި ބިޑު ޔުނައިޓެޑުން ވަނީ ރިޖެކްޓު ކޮށްފަ އެވެ. މީޑިއާ ތަކުގައި ބުނެފައިވާ ގޮތުން ދެ ވަނަ ފަހަރަށް މެގުއާ ހޯދުމަށް އެދި ވެސްޓް ހޭމުން ފޮނުވާފައި ވަނީ 30 މިލިއަން ޕައުންޑުގެ ބިޑެކެވެ. އެންމެ ފުރަތަމަ ވެސްޓް ހޭމުން ހުށަހެޅި އަގަށްވުރެ މި އަގު ރަނގަޅުވުމުން، މެގުއާ ދޫކޮށްލުމަށް ޔުނައިޓެޑުން މިހާރު އެއްބަސްވެފައިވާ ކަމަށް ރިޕޯޓުތައް ބުނެ އެވެ. އެހެންކަމުން ވެސްޓް ހޭމުން ދެން ކުރިއަށް ދާނީ މެގުއާއެކު މަޝްވަރާތައް ކުރިއަށް ގެންދިޔުމަށް ކަމަށް ވެސް ވަނީ ބުނެފަ އެވެ.

ލެއިސްޓަރ ސިޓީ ދޫކޮށް އުމުރުން 30 އަހަރުގެ ކުޅުންތެރިޔާ ޔުނައިޓެޑަށް ބަދަލުވީ 2019 ވަނަ އަހަރު އެވެ. އެފަހަރު ޔުނައިޓެޑުން އޭނާގެ ސޮއި ހޯދީ ދުނިޔޭގެ އެންމެ އަގު ބޮޑު ޑިފެންޑަރުގެ ގޮތުގަ އެވެ. ޔުނައިޓެޑާއެކު އޭރު މެގުއާ ސޮއި ކުރީ ހަ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އެއްބަސްވުމުގައި ބާކީ ދެ އަހަރު އޮއްވާ އޭނާ ދޫކޮށްލަން ޔުނައިޓެޑުން އެއްބަސްވީއިރު، މެގުއާގެ ފަރާތުން މިހާތަނަށް ޔުނައިޓެޑުގައި ފެނުނީ ވެސް ދަށް ކުޅުމެކެވެ. އައު ސީޒަނަށް ތައްޔާރުވަމުން އަންނަ ޔުނައިޓެޑުން ވަނީ މެގުއާގެ ބަދަލުގައި ކެޕްޓަންކަމަށް ބްރޫނޯ ފެނާންޑޭސް ހަމަޖައްސައިފަ އެވެ.

ޔުނައިޓެޑަށް މިހާތަނަށް ކުޅެދިން 175 މެޗުގައި މެގުއާ ވަނީ ހަތް ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ކަރަބޯ ކަޕެއް ކާމިޔާބުކޮށްފަ އެވެ. ޔުނައިޓެޑުގެ ކޯޗުކަމާ އެރިކް ޓެން ހާގް ހަވާލުވި ފަހުން މެގުއާ އަށް ފުރަތަމަ 11 އިން ފުރުސަތު ދެނީ މަދު މެޗުތަކެއްގަ އެވެ.

އެންމެ ފަހުން އަޕްޑޭޓް ކުރީ: 9 ގަޑިއިރު ކުރި
ރިވިއު ކުރީ: ފާޠިމަތު ޒުހައިރާ
0%
0%
0%
0%
0%
0%
ކޮމެންޓް