ވެސްޓް ހޭމް ބަލިކޮށް، އާސެނަލް އެއް ވަނަ އަށް
މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ ލީގުގައި އެންމެ ފަހުން އާސެނަލް ކުޅުނު ދެ މެޗަކީ ވެސް އެ ޓީމަށް ވަރަށް ޚާއްސަ ދެ މެޗު ކަމަށެވެ. އެގޮތުން ނިއުކާސަލް ޔުނައިޓެޑާ ދެކޮޅަށް ކުޅުނު މެޗާއި، ވެސްޓް ހޭމްއާ ދެކޮޅަށް ކުޅުނު މެޗަކީ ޚާއްސަ ދެ މެޗު ކަމަށް އޭނާ ބުންޏެވެ.
މެޗުގައި ލަނޑު ޖެހުމަށް ފަހު އާސެނަލްގެ ކުޅުންތެރިން އުފާ ފާޅު ކުރަނީ
އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ތާވަލްގެ އެއް ވަަނަ އަށް ޖެހިލައިފި އެވެ.
އާސެނަލްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި އާސެނަލް އިން އެއް ލަނޑު ޖެހިއިރު، ދެ ވަނަ ހާފުގައި ވަނީ އަނެއް ލަނޑު ޖަހައިފަ އެވެ.
މެޗުގެ ފުރަތަމަ ހާފުގެ 38 ވަނަ މިނެޓުގައި އާސެނަލް އަށް ލީޑު ނަގައިދިނީ ޑެކްލަން ރައިސް އެވެ. އޭގެ ފަހުން މެޗުގެ ދެ ވަނަ ހާފުގައި އާސެނަލް އަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ލީޑު ފުޅާ ކޮށްދިނީ ބުކަޔޯ ސަކާ އެވެ.
މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ ލީގުގައި އެންމެ ފަހުން އާސެނަލް ކުޅުނު ދެ މެޗަކީ ވެސް އެ ޓީމަށް ވަރަށް ޚާއްސަ ދެ މެޗު ކަމަށެވެ. އެގޮތުން ނިއުކާސަލް ޔުނައިޓެޑާ ދެކޮޅަށް ކުޅުނު މެޗާއި، ވެސްޓް ހޭމްއާ ދެކޮޅަށް ކުޅުނު މެޗަކީ ޚާއްސަ ދެ މެޗު ކަމަށް އޭނާ ބުންޏެވެ.
އާޓެޓާ ބުނީ އާސެނަލް އިން ރަނގަޅު ކުޅުމެއް ދައްކާފައިވާ ކަމަށާއި، ކުޅުންތެރިން ރަނގަޅަށް މަސައްކަތް ކޮށްފައިވާ ކަމަށެވެ. ޚާއްސަކޮށް ބައި ކޮޅަށް ލަނޑެއް ނުވަދެ، މުޅި މެޗު ކޮންޓްރޯލް ކޮށްގެން ކުޅުމަށް ފަހު، ވެސްޓް ހޭމް އަތުން މޮޅުވުމަކީ ހިތްހަމަ ޖެހުމެއް ކަމަށް އާޓެޓާ ވަނީ ބުނެފަ އެވެ. އެހެންކަމުން ބައިނަލްއަޤުވާމީ ބްރޭކަށް ދާއިރު، ޓީމަށް ރަނގަޅު ހިތްވަރެއް އޮތް ކަމަށް އާޓެޓާ ފާހަގަ ކުރި އެވެ.
އިތުރަށް އާޓެޓާ ބުނެފައި ވަނީ ބްރޭކަށް ފަހު ދެން އެނބުރި އައިސް އާސެނަލް ކުޅެން އޮތީ ވެސް ވަރުގަދަ މެޗުތަކެއް ކަމަށާއި، އެހެން ނަމަވެސް ޓީމުގައި ހިތްވަރު ހުންނާނެ ކަމަށް ޤަބޫލު ކުރާ ކަމަށެވެ. އޭނާ ބުނީ އާސެނަލްގެ ބައެއް ކުޅުންތެރިން ކޮންމެ ވެސް ވަރެއްގެ އަނިޔާއެއްގައި ތިބިއިރު، އެ ހުރިހާ ކަމަކާ އެކު ކުރިއަށް ދިޔުމަކީ އެ ޓީމަށް އޮތް ޗެލެންޖެއް ކަމަށެވެ. އެހެން ނަމަވެސް، އެކަންކަމާ އާސެނަލް އިން ފުރިހަމަ އަށް ކުރިމަތިލާނެ ކަމަށް އާޓެޓާ ބުންޏެވެ.
ލީގުގައި މިހާތަނަށް ކުޅެފައިވާ ހަތް މެޗުގެ ތެރެއިން އާސެނަލް މޮޅުވެފައި ވަނީ ފަސް މެޗުންނެވެ. އެއް މެޗުން އެއްވަރުވެފައިވާއިރު، އަނެއް މެޗުން ވަނީ ބަލިވެފަ އެވެ. އެއް ވަނައިގައި އާސެނަލް އޮތީ ހަތް މެޗުން 16 ޕޮއިންޓާ އެކު އެވެ. ބްރޭކަށް ފަހު ދެން އާސެނަލް އަށް އޮންނާނީ ފުލަމްއާ ދެކޮޅަށް ކުޅޭ މެޗެވެ.
