"ފައި ބުރިވެގެން ދިޔަ ދިއުމަކީ، މުޖުތަމައުގެ ހަރަކާތްތެރި މެންބަރަކަށް ވާން ލިބުނު ހިތްވަރަކަށް ހެދިން"

އެއީ ކާކުކަން ނޭނގޭ މީހަކަށް، އެ މީހަކީ ސްވިމިންގ އިންސްޓްރަކްޓަރެއް ނުވަތަ ފަތަން ދަސްކޮށްދޭ މީހެކޭ ބުނެފިނަމަ، ސިކުނޑީގައި ގިނަ ފަހަރަށް ތަސްވީރު ކުރެވިގެން ދާނީ ހުރިހާ ގޮތަކުން ހެދި ހުރި ފުރިހަމަ ހަށިގަނޑެއްގެ ވެރިއެކޭ ދެންނެވުމަކުން ދޮގަކަށް ނުވާނެއެވެ. މުޖުތަމައެއްގައި ހިފާފައި ހުންނަ ބައެއް އާދަތަކާއި، ގަބޫލުކުރާ ގަބޫލުކުރުންތަކެއްގެ ސަބަބުން، އެކަން ވާނީވެސް އެހެންނެވެ. ނަމަވެސް، މަޖުދީ އައްތައްތާރަކީ އެ ތަސްވީރު ބަދަލުކުރާނެ ޝަޚްސިއްޔަތެކެވެ.

އުމުރުން އެންމެ 9 އަހަރުގައި ހިނގި އެކްސިޑެންޓެއްގައި މަޖުދީގެ ފަޔަށް އަލްވަދާއު ކިޔަން މަޖުބޫރުވިއެވެ. އެއީ ބައެއް މީހުން ދެކޭގޮތުގައި ނުކުޅެދޭ މީހެކެވެ. ނަމަވެސް، އެއީ އަދި ހަގީގަތް ނޫންކަން، މަޖުދީ ސާބިތު ކޮށްދެނީ އޭނާގެ އަމަލުންނެވެ. މަޖުދީއަކީ ފެތުމުގެ ރޮނގުން ކުރިއަރަން ބޭނުންވާ ޣައްޒާގެ ކުދިބޮޑު އެންމެންނަށް ހުރި ލާމަސީލު މިސާލެކެވެ. ފަތަން ދަސްކޮށްދޭ، ކޮލިފައިޑް ކޯޗެކެވެ. އަމިއްލަ ސްކޫލެއްވެސް ހިންގާ، ހިތްވަރުގަދަ ބަތަލެކެވެ.

ދަރިފުޅަށް ފަތަން ދަސްކޮށްދިނުމުގެ ބޭނުމުގައި، އެ ދަރިފުޅު ގޮވައިގެން މަޖުދީ ގާތަށް އެންމެ ފުރަތަމަ ދާ ދުވަހު، ބެލެނިވެރިންގެ މޫނު މައްޗަށް ވެރިވަނީ ސުވާލުތަކެކެވެ. ދަރިފުޅުގެ ސްވިމް ކޯޗު ކޮޅަށް ތެދުވެ އެ ހުރީ ދެ ދަނޑިގަނޑު ވިއްދައިގެން، އޭގެ އެހީގައެވެ. ބެލެނިވެރިންގެ ހިތްތަކުގައި އުފެދުނު ސުވާލުތަކަށް މަޖުދީ ޖަވާބުދެނީ ސާބިތުކަމާ އެކީގައެވެ. އުފެދިފައި އޮތް ޝައްކު ފޮހެލަނީ، ފަތާ ފެންގަނޑުގައި މަޖުދީ ދައްކާލާ ކުޅަދާނަ ހުނަރުތަކުންނެވެ.

ކާރު ދަށުވި ހިތްދަތި އެކްސިޑެންޓްގެ ވޭނުގައި އުޅުނު މަޖުދީގެ އުމުރުން މިހާރު 42 އަހަރު ފުރިއްޖެއެވެ. ފަލަސްތީނުގައި ވަޒީފާއެއް ހޯދުން ވީ މަޖުދީއަށް ޖެހުނު ބޮޑު ތަކުލީފަކަށެވެ. މަސައްކަތްކުރާ އުމުރުފުރާގެ އާބާދީއަށް ބަލާއިރު، ގާތްގަނޑަކަށް ދެބައިކުޅަ އެއްބައި މީހުންނަކީ ވަޒީފާ ނެތް މީހުންނެވެ. ސަލާން ޖަހަން ދެއަތް ދިއްކޮށްލުމުގެ ބަދަލުގައި މަޖުދީގެ މިސްރާބު ބެހެއްޓީ ފެތުމާ ދިމާއަށެވެ. ކޮލިފައިޑް ކޯޗެއްގެ ސަނަދު ކަށަވަރު ކުރިއެވެ.

ޕަލަސްޓީނިއަން ސްވިމިންގ އެކަޑަމީއަކީ މަޖުދީގެ އަމިއްލަ ސްކޫލެކެވެ. އެ ސްކޫލުގެ ދަރިވަރުންގެ ލިސްޓުގައި ކުޑަ ކުދިންނާއި ބޮޑެތި މީހުންވެސް ހިމެނެއެވެ.

2 މިލިއަނެއްހާ މީހުންގެ އާބާދީއެއް ދިރިއުޅެމުންދާ ޣައްޒާގައި، ޖިސްމާނީގޮތުން ނުކުޅެދޭ ހާލުގައި ދިރިއުޅެމުންދާ މީހުންގެ އަދަދު 1600އަށްވުރެ ދަށް ނުވާނެކަމަށް ބައިނަލްއަގުވާމީ ރެޑް ކްރޮސް ޖަމިއްޔާއިން ބުނެއެވެ.

އައްސަލަމާ ޗެރިޓަބަލް ސޮސައިޓީއަކީ، ޒަޚަމްވާ މީހުންނާއި އެކި ކަހަލަ ނުކުޅެދުންތެރިކަން ހުންނަ މީހުންނަށް އެހީ ފޯރުކޮށްދޭ ޖަމިއްޔާއެކެވެ. އެ ޖަމިއްޔާއިން ބުނާގޮތުގައި، ޔަހޫދީ އިޒްރޭލާ ޣައްޒާއާ ދެމެދު ބަދަލުކުރާ ހަމަލާތަކުގައި، ހަތަރެސް ފައިގެ އެކި ގުނަވަންތައް ގެއްލިފައިވާ، ޣައްޒާގެ ރަށްވެހިންގެ އަދަދު 532ށް އަރައެވެ.

ދެ އަތުންކުރެ އަތަކާއި ދެ ފައިންކުރެ ފައެއް ނުވަތަ އެއަށްވުރެވެސް ގިނަ ގުނަވަންތައް ބުރިކޮށްލާފައިވާ، ޣައްޒާގެ 120 ކުއްޖަކު ބައިވެރިކޮށްގެން، ޕަލަސްޓައިން ޗިލްޑްރަންސް ރިލީފް ފަންޑް (ޕީސީއާރްއެފް)އިން ދާދި ފަހުން ވަނީ ކޭމްޕެއްވެސް ބާއްވާފައެވެ. ޕީސީއާރްއެފްއަކީ އެމެރިކާގައި މަރުކަޒުކޮށްގެން ހިންގާ ޖަމިއްޔާއެކެވެ.