އެތުލެޓިކޯ މެޑްރިޑަށް ކުޅެމުން އަންނަ ޕޯޗުގަލްގެ ޔާއޯ ފެލިކްސް ހޯދުމަށް ސައުދީ ޕްރޯ ލީގުގެ އަލް ހިލާލުން ކުރި ބިޑު އެ ކުލަބުން ރިޖެކްޓު ކޮށްފި އެވެ.

ފެލިކްސް ހޯދުމަށް އަލް ހިލާލުން އެތުލެޓިކޯ އަށް ފޮނުވި ރަސްމީ ބިޑަކީ، ލޯނު އެއްބަސްވުމެއްގެ ދަށުން އޭނާ ހޯދުމަށް ކުރި ބިޑެކެވެ. އަލް ހިލާލުން ހުށަހެޅީ އެއް އަހަރު ދުވަހުގެ ލޯނު އެއްބަސްވުމެއްގެ ދަށުން އޭނާ ހޯދުމަށެވެ. ނަމަވެސް ލޯނު އެއްބަސްވުމެއްގެ ދަށުން އޭނާ ދޫކޮށްލުމަށް އެތުލެޓިކޯ އިން ބޭނުމެއް ނުވެ އެވެ. އެތުލެޓިކޯ އިން ހަމައެކަނި ބޭނުންވަނީ ދާއިމީ އެއްބަސްވުމެއްގެ ދަށުން އޭނާ ދޫކޮށްލުމަށެވެ. އެހެންކަމުން އަލް ހިލާލުން އަންނަނީ އިތުރަށް ފެލިކްސް ހޯދުމުގެ ކަންތަކާ ކުލަބުގައި މަޝްވަރާ ކުރަމުން ކަމަށް މީޑިއާ ތަކުން ބުނެ އެވެ. ފެލިކްސް ގެނައުމަށް އެންމެ ބޮޑަށް ބޭނުން ވަނީ އަލް ހިލާލްގެ ކޯޗަކަށް މަސައްކަތް ކުރަމުން އަންނަ ޕޯޗުގަލްގެ ޖޯޖް ޖީސަސް އެވެ.

ސައުދީ ލީގަށް ބަދަލުނުވެ، ފެލިކްސްގެ ވިސްނުން ހުރީ ޔޫރަޕުގައި ކުޅެން ކަމަށް ބުނެފައިވެ އެވެ. ޚާއްސަކޮށް އޭނާގެ ޝައުޤުވެރިކަން ސްޕެއިންގެ ބާސެލޯނާ އަށް އޮންނަ ކަމަށް މީޑިއާ ތަކުން ބުނެ އެވެ. މިހާތަނަށް އައިއިރު ޔަގީންވާ ކަމަކީ، އެތުލެޓިކޯގައި ހުންނަން ފެލިކްސް ބޭނުންނުވާ ކަމެވެ.

ފެލިކްސް އެންމެ ފަހުން ކުޅުނީ ލޯނު އެއްބަސްވުމެއްގެ ދަށުން ޗެލްސީ އަށެވެ. ނަމަވެސް ޗެލްސީގެ އައު ކޯޗު މައުރީސިއޯ ޕޮޗެޓީނޯގެ ލިސްޓުގައި ފެލިކްސް ނުހިމެނޭތީ، އެ ކުލަބުން ވަނީ އޭނާ ދޫކޮށްލައިފަ އެވެ. އެހެންކަމުން ފެލިކްސް ވަނީ އަނބުރާ އެތުލެޓިކޯ މެޑްރިޑަށް ގޮސްފަ އެވެ. އެތުލެޓިކޯ އަށް މިހާތަނަށް ކުޅެދިން 131 މެޗުގައި ފެލިކްސް ވަނީ 34 ލަނޑު ޖަހައިފަ އެވެ. 2019 ވަނަ އަހަރުން ފެށިގެން އޭނާ އަންނަނީ ޕޯޗުގަލް ޤައުމީ ޓީމުގައި ވެސް ހިމެނިގެން ކުޅެމުންނެވެ.