މާނޭގެ ކުށަކީ އެފްރިކާއަށް ނިސްބަތްވެފައި މުސާރަބޮޑުވުން: މެނޭޖަރު
މާނޭ މިހާރު ކުޅެމުންދަނީ ސައޫދީ އަރަބިއްޔާގެ އައް ނަސްރަށް
ސާދިއޯ މާނޭ: ކުރިއަށް އޮތް މެޗަށް ވަނީ ސަސްޕެންޑްކޮށްފައި
ޖަރުމަނުގެ ބަޔާން މިއުނިކުން ސެނެގާލްގެ ފޯވަޑް ސާދިއޯ މާނޭ ވިއްކާލީ ކުޅިވަރުގެ ސަބަބަކާހެދި ނޫން ކަމަށާއި އޭނާގެ ކުށަކީ އެފްރިކާ އަށް ނިސްބަތްވެފައި، މުސާރަ ބޮޑުވުން ކަމަށް މާނޭގެ ޕީއާރު މެނޭޖަރު ބުނެފި އެވެ.
ލިވަޕޫލުގައި ކާމިޔާބު ދުވަސްތަކެއް ހޭދަކުރުމަށްފަހު މިދިޔަ ސީޒަނުގައި ބަޔާންއަށް ބަދަލުވި މާނޭ މިހާރު ކުޅެމުންދަނީ ސައޫދީ އަރަބިއްޔާގެ އައް ނަސްރަށެވެ.
އޭނާގެ ޕީއާރު މެނޭޖަރު ބުނީ މާނޭ އަކީ ބަޔާންގެ އެންމެ މުސާރަ ބޮޑު ކުޅުންތެރިޔާ ކަމަށެވެ. އެއީ ހަފުތާއަކު 250000 ޕައުންޑް ލިބޭތީ އެވެ. ނަމަވެސް އެފްރިކާގެ ކުޅުންތެރިއަކު ކުލަބުގެ އެންމެ މުސާރަބޮޑު ކުޅުންތެރިޔާ އަށްވުމުން އެކަން ބަލައިނުގަނެވުނީ ކަމަށެވެ. ނަމަވެސް މިކަން ބަލައިނުގަނެވުނީ ބަޔާންގެ ކުޅުންތެރިންނަށް ކަމެއް މެނޭޖްމަންޓަށް ކަމެއް މާނޭގެ މެނޭޖަރު ނުބުނެ އެވެ.
އޭނާ ބުނީ ބަޔާންގެ މެނޭޖްމަންޓުން މާނޭ ވިއްކާލަން ބޭނުންވާ ވާހަކަ ކުޅުންތެރިޔާ ގާތުގައި ނުބުނާ ކަމަށެވެ.
މާނޭ ސައޫދީ އަރަބިއްޔާގެ ލީގަށް ބަދަލުވީ ހަފުތާއަކު 650000 ޕައުންޑްގެ މުސާރައަކަށެވެ. އޭނާ ވިއްކާލުމުގައި ބަޔާންއިން ނާޖާއިޒު ފައިދާ ނަގާފައިވާ ކަމަށް ވެސް މެނޭޖަރު ބުންޏެވެ.
މާނޭ ވަނީ ބަޔާން ދޫކޮށްލަން ޖެހުމުން ދެރަވާކަމަށް ބުނެފަ އެވެ. އަދި ކޯޗު ޓުކެލް ވެސް ވަނީ މާނޭ ފަދަ ކުޅުންތެރިއަކާމެދު އޭނާގެ ހިތްހަމަޖެހުން އޮތްކަމަށް ބުނެފަ އެވެ. މާނޭ ވިއްކާލަން ބަޔާންއިން ސަބަބަކަށް ދެއްކީ އަތްއިސްކޮށް ލެރޯއީ ސާނޭއާ ތަޅައިގަތް މައްސަލަ އެވެ.
