ލިވަޕޫލްގެ ސެނެގާލް ފޯވާޑް ސަޑިއޯ މާނޭ ޖަރުމަނުގެ ބަޔާން މިއުނިކަށް ވިއްކާލަން ލިވަޕޫލުން އެއްބަސްވެއްޖެއެވެ. އެކަން ބަޔާންއިވެސް ވަނީ ޔަގީންކޮށްދީފައެވެ.
30 އަހަރުގެ ފޯވާޑް ބަޔާންއަށް ވިއްކާލަނީ 42 މިލިއަން ޑޮލަރަށެވެ. މާނޭ ބަޔާންއަށް ވިއްކާލަން ލިވަޕޫލުން އެއްބަސްވީ ފުރަތަމަ ދެ ހުށަހެޅުމަށް ނޫނެކޭ ބުނުމަށްފަހު, ތިންވަނަ ހުށަހެޅުމަށެވެ. ލިވަޕޫލާއެކު މާނޭ ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫންގެ ނިޔަލަށެވެ. ބަޔާންއިން މާނޭ ގެންދަނީ އެކްލަބްގެ ޕޮލެންޑް ފޯވާޑް ލެވާންޑޯސްކީ ކްލަބްގައި މަޑުކުރަން ބޭނުންނުވާތީއެވެ.
މާނޭ ވަނީ ލިވަޕޫލާއެކު، ޕްރިމިއަރ ލީގާއި ޗެމްޕިއަންސްލީގުވެސް ހޯދާފައެވެ. ނިމިގެން ދިޔަ ސީޒަނަކީ ކްލަބްގެ އިތުރުން ގައުމީ ޓީމްގައިވެސް މާނޭއަށް ކާމިޔާބު އަހަރެކެވެ. އެފްރިކަން ކަޕް އޮފް ނޭޝަންސް ކާމިޔާބުރުމާއި, ވޯލްޑްކަޕަށް ސެނެގާލް ކޮލިފައިވުމުގައިވެސް މާނޭގެ ދައުރު ބޮޑެވެ. މާނޭ ވަނީ ލިވަޕޫލްގައި ހޭދަކުރި މުއްދަތުގައި، ޕްރިމިއަރ ލީގުގައި 90 ގޯލް ޖަހާފައެވެ. މާނޭ ލިވަޕޫލާ ގުޅުނީ 2016 ވަނަ އަހަރު ސައުތުހެމްޓަންއިންނެވެ.
މާނޭ ކްލަބް ދޫކޮށްލާނެކަން އެނގޭތީ ލިވަޕޫލުން ވަނީ ބެންފީކާގެ އުރުގުއޭ ފޯވާޑް ނޫނޭޒްގެ ސޮއި ހޯދާފައެވެ.
