98 ވަނަ މިނެޓްގައި ސާދިއޯ މާނޭ ގޯލް ޖަހައި, އެފްރިކަން ކަޕް އޮފް ކޮލިފިކޭޝަންގެ ދެވަނަ މެޗުން ސެނެގާލް މޮޅުކޮށްދީފިއެވެ.
98 ވަނަ މިނެޓްގައި ރުވާންޑާ ކޮޅަށް މާނޭ ގޯލް ޖެހީ ޕެނަލްޓީއަކުންނެވެ. ޕެނަލްޓީ ކާމިޔާބުކޮށް ސެނެގާލް ވަނީ ކޮލިފިކޭޝަން މޮޅަކުން ފަށާފައެވެ. މާނޭ ވަނީ މީގެކުރިންވެސް މެޗުގެ ފަހު ވަގުތު ސެނެގާލް މޮޅުކޮށްދީ, އުފާވެރިކަން ގެނެސްދީފައެވެ. މިއަހަރު ނޭޝަންސް ކަޕް ފުރަތަމަ މެޗުގައި ޒިމްބާބްވޭ އަތުން ސެނެގާލް މޮޅުވީ 97 ވަނަ މިނެޓްގައި މާނޭ ލަނޑު ޖަހައިގެންނެވެ. އެލަނޑުވެސް މާނޭ ޖެހީ ޕެނަލްޓީއަކުންނެވެ. ނޭޝަންސްކަޕް ފައިނަލްގައި ޗެމްޕިއަންކަން ސެނެގާލް ކަށަވަރުކުރީވެސް ނަތީޖާ ނެރުމަށް ޖެހި ޕެނަލްޓީގައި މާނޭ ފަހު ޕެނަލްޓީ ކާމިޔާބުކޮށްގެންނެވެ.
ސެނެގާލް އޮތީ ކޮލިފިކޭޝަން ގްރޫޕް އެލްގައި ދެމެޗުންވެސް މޮޅުވެ ހަ ޕޮއިންޓާއެކު އެއްވަނާގައެވެ. ފުރަތަމަ މެޗުގައި ސެނެގާލް ވަނީ ބެނިން ބަލިކޮށްފައެވެ. ދެވަނާގައި އޮތީ ޕޮއިންޓަކާއެކު ރުވާންޑާއެވެ.
