މާނޭ ހޯދުމަށް ބަޔާނުން އިތުރު ބިޑެއް ކުރަނީ

ލިވަޕޫލަށް ދޫކޮށްލަން ބޭނުންވާކަން ހާމަކޮށްފައިވަ ސެނެގާލްގެ ފޯވާޑް ސާޑިއޯ މާނޭ ހޯދުމަށް ޖަރުމަނުގެ ބަޔާން މިއުނިކުން އިތުރު ބިޑެއް ކުރަން ތައްޔާރުވެއްޖެ ކަމަށް މީޑިއާ ރިޕޯޓުތައް ބުނެފިއެވެ.

މީގެ ކުރިން މާނޭ ހޯދުމަށް ބަޔާނުން ކުރި ބިޑެއް ލިވަޕޫލުން ރިޖެކްޓުކޮށްފައިވާ ކަމަށް މީޑިއާތަކުގައި ވަނީ ރިޕޯޓުކޮށްފައެވެ. ރިޕޯޓުތައް ބުނާ ގޮތުން ބަޔާނުން ފުރަތަމަ ކޮށްފައިވަނީ 21 މިލިއަން ޕައުންޑުގެ ބިޑެކެވެ. ލިވަޕޫލުން ވަނީ އެ ބިޑު ބަަލައިނުގަންނަން ނިންމާފައިކަމަށް ވެސް ރިޕޯޓުތަކުގައިވެއެވެ. ބަޔާނުން މާނޭ ހޯދުމުގެ މަސައްކަތް ކުރަމުން އަންނައިރު، އެ ޓީމުގެ ފޯވާޑް ރޮބާޓް ލެވަންޑޯސްކީ ވަނީ އޭނާ ބަޔާން ދޫކޮށްލަން ބޭނުންވާކަމަށް ބުނެފައެވެ.

މީޑިއާތަކުގައި ބުނެފައިވާ ގޮތުގައި ބަޔާނުން މިހާރު އަންނަނީ 30 މިލިއަން ޕައުންޑުގެ ބިޑެއް ހުށަހެޅުމަށް ތައްޔާރުވަމުންނެވެ. އަދި މާނޭ ދޫކޮށްލަން ލިވަޕޫލުން ބޭނުންވަނީ 42.5 މިލިއަން ޕައުންޑުގެ އަގަކަށް ކަމަށް ވެސް ރިޕޯޓުކޮށްފައިވެއެވެ. އެއީ މާނޭގެ ބަދަލުގައި އެހެން ކުޅުންތެރިޔަކު ލިވަޕޫލުން ހޯދަން ބޭނުންވާތީއެވެ.

އުމުރުން 30 އަހަރުގެ މާނޭ ލިވަޕޫލަށް ބަދަލުވީ ސައުތެމްޓަންގައި ހުރުމަށްފަހު 2016 ވަނަ އަހަރުއެވެ. އަދި އޭނާ ވަނީ އޭގެ ފަހުން އެ ޓީމަށް 269 މެޗު ކުޅެދީ 120 ލަނޑު ޖަހާފައެވެ. އަދި އޭނާ ވަނީ ލިވަޕޫލާއެކު ޔޫރަޕުގެ ބޮޑެތި ހުރިހާ މުބާރާތެއް ކާމިޔާބުކޮށްފައެވެ. އޭގެ ތެރޭގައި އިނގިރޭސި ޕްރިމިއަރ ލީގު އެއް ފަހަރު، އެފްއޭ ކަޕް އެއް ފަހަރު، ކަރަބޯ ކަޕް އެއް ފަހަރު، ޔުއެފާ ޗެމްޕިއަންސް ލީގު އެއް ފަހަރު، ޔުއެފާ ސުޕަ ކަޕް އެއް ފަހަރު އަދި ފީފާ ކުލަބް ވޯލްޑް ކަޕް އެއް ފަހަރު ކާމިޔާބުކުރުން ހިމެނެއެވެ.