ސެނެގާލްގެ ހެންރީ ކަމާރާ ހަދާފައިވާ ރެކޯޑެއް ސާޑިއޯ މާނޭ މުގުރާލައިފިއެވެ.

މާނޭ މުގުރާލީ ސެނެގާލްގެ ގައުމީ ޓީމަށް އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑެވެ. ކުރިން މި ރެކޯޑު އޮތީ ކަމާރާ އަތުގައެެވެ. ކަމާރާ ވަނީ ސެނެގާލްގެ ގައުމީ ޓީމަށް 29 ލަނޑު ޖަހައިދީފައެވެ. މާނޭ ވަނީ ގައުމީ ޓީމަށް ޖުމުލަ 32 ލަނޑު ޖަހައި އެ ރެކޯޑު މުގުރާލާފައެވެ.

މާނޭ މި ރެކޯޑު މުގުރާލީ ސެނެގާލުން ބެނިންއާ ދެކޮޅަށް ކުޅުނު މެޗުގައެވެ. އެ މެޗުން ސެނެގާލް މޮޅުވީ 1-3 ންނެވެ. އެ މެޗުގައި މާނޭ ވަނީ ތިން ލަނޑު ޖަހައި، ހެޓްރިކް ހަދާފައެވެ. މާނޭ ވަނީ ސެނެގާލްގެ ގައުމީ ޓީމަށް 90 މެޗު ކުޅެދީފައެވެ. މާނޭ ވަނީ މިދިޔަ އަހަރު ސެނެގާލާއެކު އެފްރިކަން ކަޕް އޮފް ނޭޝަންސް ކާމިޔާބުކޮށްފައެވެ. އެ މުބާރާތް ސެނެގާލް ކާމިޔާބުކުރީ ފައިނަލްގައި މިޞްރު ބަލިކޮށްގެންނެވެ.

މާނޭ ވަނީ 2019 ވަނަ އަހަރު ސެނެގާލްގެ އެންމެ މޮޅު ފުޓުބޯޅަ ކުޅުންތެރިޔާގެ މަގާމު ހޯދާފައެވެ. މާނޭ އަންނަނީ ކުލަބް ލެވެލްގައި ލިވަޕޫލާއެކު ވެސް މޮޅު ކުޅުމެއް ދައްކަމުންނެވެ. މި ސީޒަނުގައި މާނޭ ވަނީ ލިވަޕޫލާއެކު އެފްއޭ ކަޕާއި ކަރަބޯ ކަޕް ކާމިޔާބުކޮށްފައެވެ. މީގެ އިތުރުން މާނޭ ވަނީ ލިވަޕޫލާއެކު މި ސީޒަނުގެ ޕްރިމިއަރ ލީގުގެ ދެ ވަނަ ހޯދާފައެވެ. އަދި އޭނާ ވަނީ ލިވަޕޫލާއެކު ޔުއެފާ ޗެމްޕިއަންސް ލީގުގެ ފައިނަލްގައި ކުޅެފައެވެ. މި ސީޒަނުގައި މާނޭ ވަނީ ލިވަޕޫލަށް 51 މެޗު ކުޅެދީ 23 ލަނޑު ޖަހައިދީފައެވެ.