މިސަރުކާރުގައި އަނިޔާގެ އަޑާއި ވާޒީފާއިން މީހުން ކަނޑާލާ ވާހަކައިގެ އަޑެއް ނީވޭ: މެންބަރު އަބްދުލްޣަފޫރު
3 އޯގަސްޓު 2023 | ބުރާސްފަތި 09:56މި ފާއިތުވި 4 އަހަރު ހަނިމާދޫގައި އައު ވަޒީފާތައް އުފެދި ގިނަ ޒުވާނުންނަށް ވަޒީފާ ލިބިގެންދިޔަ
ރައްޔިތުން މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވާހަކަފުޅު ދައްކަވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރުގައި އަނިޔާގެ އަޑާއި، ވާޒީފާއިން މީހުން ކަނޑާލާ ވާހަކައިގެ އަޑު ނީވޭ ކަމަށް ރައްޔިތުން މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެއެވެ.
ބުދަ ދުވަހުގެ ރޭ ހދ.ހަނިމާދޫގައި ކުރިއަށްގެންދިޔަ އުފާވެރި އަމާން ރާއްޖެ ކެމްޕޭން ޖަލްސާގައި މެންބަރު އަބްދުލްޣަފޫރު ވިދާޅުވީ މީގެ ކުރިން އަނިޔާގެ ވާހަކަ އަދި ވަޒީފާއިން މީހުން ކަނޑާ ވާހަކަ އަޑު އެހިނަމަވެސް މިސަރުކާރުގައި އެފަދަ ވާހަކަތަކުގެ އަޑު ނީވޭ ކަމަށެވެ. އޭނާ ވިދާޅުވީ މިފާއިތުވި 4 އަހަރުގެ ދުވަހުގެ ތެރޭގައި އެފަދަ ކަމެއް ހަނިމާދޫގައި ވެސް ހިނގާފައިނުވާ ކަމަށެވެ. އަދި މި ފާއިތުވި 4 އަހަރު ހަނިމާދޫގައި އައު ވަޒީފާތައް އުފެދި ގިނަ ޒުވާނުންނަށް ވަޒީފާ ލިބިގެންދިޔަ ކަމަށް މެންބަރު ވިދާޅުވިއެވެ.
ރިޔާސީ އިންތިޚާބާއި ގުޅޭގޮތުން މެންބަރު ވިދާޅުވީ ރައީސް ސާލިހު އެއްބުރުން އިިންތިޚާބު ކާމިޔާބު ކުރައްވާނެ ކަމަށާއި، ރައްޔިތުންގެ އިތުބާރު ރައީސް ސާލިހަށް އެބައޮތް ކަމަށެވެ. އެ އިތުބާރު ރައީސްއަށް ލިބިވަޑައިގެންނެވީ ގިނަ މަސައްކަތްތަކާއެކު ކަމަށް މެންބަރު ވިދާޅުވިއެވެ. އެމަނިކުފާނު ޤައުމަށް ކޮށްދެއްވި މަސައްކަތްޕުޅުތަކަށް އިޝާރާތް ކުރައްވައި މެންބަރު ޣަފޫރު ވިދާޅުވީ ކޮވިޑް-19ގެ ދަތިހާލުގައި ގައުމު ހުޅުވާލާއި، އިގްތިސާދު ނެގެހެއްޓުމަށް ކާމިޔާބު ގިނަ މަސައްކަތްތަކެއް ކުރެއްވި ކަމަށެވެ. އަދި އެކަމުގެ ނަތީޖާ ފޮނި ކަމަށް ވެސް ވިދާޅުވިއެވެ.
މެންބަރު ޣަފޫރު ވިދާޅުވީ ރައީސް ސާލިހު ނޫން އިތުރު ޗޮއިސްއެއް ނެތް ކަމަށާއި، ދެވަނަ ފަހަރަށް ވިސްނަން ޖެހޭ އެއްވެސް ސަބަބެއް ނެތް ކަމަށެވެ. ހަނިމާދޫގެ ތަރައްގީއަށް ބަލާއިރު ވެސް ހަނިމާދޫ އެއާޕޯޓު އިންޓަނޭޝަނަލް ފެންވަރަށް ތަރައްގީ ކުރުމުގެ މަސައްކަތް ފަށާފައިވަނީ މިސަރުކާރުން ކަމަށާއި، ފާއިތުވި އެއްވެސް ސަރުކާރަކުން އެމަސައްކަތް ކޮށްފައިނުވާ ކަމަށް އޭނާ ވިދާޅުވިއެވެ.
މީގެ އިތުރުން މެންބަރު ޣަފޫރު ވިދާޅުވީ އަތޮޅުތެރެއަށް ބަލާއިރު، 5 ނުވަތަ 6 މަޝްރޫރު ނުހިނގާ އެއްވެސް ރަށެއް ނެތް ކަމަށާއި، މުޅި ރާއްޖެއަށް ތަރައްގީ ރައީސް ސާލިހު ގެނެސްދެއްވަމުން ގެންދަވާ ކަމަށެވެ. އެހެންކަމުން ދެވަނަ ދައުރެއް ދޭން ޖެހޭ ކަމަށް މެންބަރު ވިދާޅުވިއެވެ.
