ކުރީ ސަރުކާރުން ލޯނާއި ދަރަނި ނެގި ވާހަކަ ދައްކާފައި އައިސް މިސަރުކާރުން ވެސް ކުރަނީ އެކަންކަން
ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ
މި ސަރުކާރުން 1 އަހަރު ތެރޭގައި ނެގި ދަރަނީގެ އަދަދު 1 ބިލިއަން ޑޮލަރަށް އަރައިފި ކަމަށް ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ ވިދާޅުވެއްޖެއެވެ.
މަޖިލީހުގެ ބުދަ ދުވަހުގެ ޖަލްސާގައި ވާހަކަ ދައްކަވަމުން ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ ވިދާޅުވީ ދައުލަތުގެ ހަރަދު ކުޑަނުކޮށް، ނަންކިޔަން ހުރި ހުރިހާ ޓެކްސްއެއް ބޮޑުކުރިޔަސް އެކަމުގެ ފައިދާއެއް ނުފެންނާނެ ކަމަށެވެ. މެންބަރު ޣަފޫރު ވިދާޅުވީ 228 ސިޔާސީ މަގާމު އުނިކުރަން ސަރުކާރުން ނިންމި ނަމަވެސް މާދަމާ އެ ފަރާތްތައް ތިބޭނީ ސަރުކާރުގެ ކުންފުނިތަކުގައި ކަމަށެވެ. މިހާތަނަށް ވެސް އެކަން ހިނގާފައި އޮތީ އެގޮތަށް ކަމަށާއި، ހަރަދު ކުޑުރެވޭނީ އެވަރަކަށް ކަމަށެވެ.
މެންބަރު ޣަފޫރު ވިދާޅުވީ 1 އަހަރު ތެރޭގައި މިހާ ގިނަ ލޯނު ނެގި ސަރުކާރެއް ނެތް ކަމަށެވެ. ސްވޮޕްކުރަން 400 މިލިއަން ޑޮލަރާއި، ފައިސާ ބަދަލުކުރަން އިތުރު 200 މިލިއަން ރުފިޔާއާއި، ތިލަފުށީގައި ރިވެޓްމަންޓް ޖެހުމާއި އެހެނިހެން ކަންކަމަށް އިތުރު 200 މިލިއަން ރުފިޔާގެ ލޯނު ނަގާފައިވާ ކަމަށެވެ.
ޣަފޫރު ވިދާޅުވީ ދައުލަތަށް އާމްދަނީ ލިބޭ ކަމަށެވެ. ދައުލަތަށް ލިވޭ އާމްދަނީ ސަރުކާރުތަކުން ކުޑަކުރާ ކަމަށާއި، 20 އިންސައްތައަށްވުރެ މަތީގައި ފަތުރުވެރިކަން ހުއްޓާ ޓީވީއަށް އަރާ ބޭންކް އޮފް މޯލްޑިވްސް އިން ބަޣާވާތްކުރިކަމަށް މި ސަރުކާރުން ބުނެފައިވާ ކަމަށާއި، ޖެހިގެން އައި ދުވަހު ސީސީސީ މައިނަސްއަށް ރާއްޖޭގެ ރޭޓިންގ ވެއްޓިގެން ގޮސްފައިވާ ކަމަށެވެ.
މެންބަރު ޣަފޫރު ވިދާޅުވީ އެއާއެކު ކޮންމެ ތަނަކުންވެސް ބުނަމުންދަނީ ރާއްޖެ ބޭންކްރަޕްޓްވެފައިވާ ކަމަށާއި، އިންވެސްޓްކުރެވެން ނެތް ކަމަށެވެ. އަދި އެއީ ހަގީގަތް ކަމަށް އޭނާ ވިދާޅުވިއެވެ.
ޣަފޫރު ވިދާޅުވީ ބަހާއި އަމަލާއި ދިމާކުރަންޖެހޭ ކަމަށެވެ. މި ސަރުކާރަކީ މާދަމާ 228 މީހުން ކަނޑާލާފައި އަނެއް ދުވަހު އެ 228 މީހުންނަށް ސަރުކާރުގެ ކުންފުނިތަކުން ވަޒީފާދޭނެ ސަރުކާރެއް ކަމަށް ޣަފޫރު ވިދާޅުވިއެވެ. މިއީ ހަރަދު ކުޑަކުރާ ގޮތެއް ނޫން ކަމަށާއި، އެކަން ކުރާނަމަ ކުރަންވީ އިހުލާސްތެރިކަމާއެކު ކަމަށެވެ.
މި ސަރުކާރުން ޓެކްސް ނުނަގާނެ އެއްވެސް އެއްޗެއް ނެތް ކަމަށާއި، މަގުމައްޗަށް ނުކުމެ އުޅޭތީވެސް ޓެކްސް ދައްކަންޖެހޭ ހާލަތަށްދާނެ ކަމަށެވެ. އަދި ޓެކްސް ނަގަނީ އާމްދަނީ ނުލިބޭތީ ނޫން ކަމަށާއި، މިއީ ރައްޔިތުންނަށް ދުއްތުރާ ޖައްސަން އުޅޭ ސަރުކާރެއް ކަމަށް ޣަފޫރު ވިދާޅުވިއެވެ. ޓެކްސްގެ ނިޒާމް ފުޅާކުރުމަކީ އިގްތިސާދަށް ލާރި ހޯދަން ކުރާ ކަމެއް ނޫން ކަމަށާއި، އެއީ އިތުރު އެއްޗެހިން ޓެކްސް ނަގަން ކުރާ ކަމެއް ކަމަށާއި، މިއީ އޮޅުވާލެވޭނެކަމެއް ނޫން ކަމަށް ޣަފޫރު ވިދާޅުވިއެވެ.
