ޑެމްބެލޭ ދޮގު ހަދައި ޕީއެސްޖީއަށް ދާން ނިންމުމުން ދެރަވި: ޒަވީ

ބާސެލޯނާގެ ފޯވަޑް އޮސްމޭނޭ ޑެމްބެލޭ ދޮގުހަދާފައި ފްރާންސްގެ ޕީއެސްޖީއަށް ދާން ނިންމުމުން ހިތާމަކުރާ ކަމަށް ބާސެލޯނާގެ ކޯޗު ޒަވީ ހަނާންޑޭޒް ބުނެފި އެވެ.

ޑެމްބެލޭ އާއި ބާސެލޯނާ ހަދާފައިވާ ކޮންޓްރެކްޓް ހަމަވާނީ 2024ގެ ސީޒަނުގެ ނިޔަލަށެވެ. ނަމަވެސް މި އަހަރުގެ ޖުލައި 31ގެ ކުރިން 50 މިލިއަން ޔޫރޯ އަށް އޭނާ އަށް ކޮންޓްރެކްޓް ގަނެގެން އެހެން ކުލަބަކަށް ދެވިދާނެ އެވެ. އޭގެ ފަހުން މި ކޮންޓްރެކްޓް ގަނެވޭނީ 100 މިލިއަން ޔޫރޯ އަށެވެ.

އޭނާ ޕީއެސްޖީ އަށް ބަދަލުވާން ބޭނުންވުމުން މިހާރު ބާސެލޯނާ އާއި ޕީއެސްޖީން ދަނީ މިކަމާމެދު މަޝްވަރާތައް ފަށައިފަ އެވެ. އަދި ކުރިއަށް އޮތް ހަފުތާގައި ޑެމްބެލޭ ޕީއެސްޖީ އަށް ބަދަލުވުމުގެ ކަންތައްތައް ނިމޭނެ އެވެ.

ކޯޗު ޒަވީ ބުނީ ޕީއެސްޖީ އަށް ބަދަލުވުމާ ބެހޭ ގޮތުން ޑެމްބެލޭއާ ވާހަކަ ދެއްކުމުން ބާސެލޯނާގައި މަޑުކުރަން ބޭނުންވާކަމަށް ޑެމްބެލޭ ފުރަތަމަ ބުނި ކަމަށެވެ. ނަމަވެސް ފަހުން ހިޔާލު ބަދަލުކުރީ ކަމަށެވެ.

އިޓަލީގެ އޭސީ މިލާން އަތުން 1-0އިން މޮޅުވި މެޗަށް ފަހު ޒަވީ ބުނީ ބާސެލޯނާ ދޫކޮށް ބްރެޒިލްގެ ނޭމާ ޕީއެސްޖީއަށް ބަދަލުވުމުން ނޭމާގެ ކެރިއަރު އަޑިގަނޑަކަށް ވެއްޓުނު ގޮތާމެދު މިސާލު ޖަހައި ޑެމްބެލޭ އަށް ވިސްނައިދެވޭތޯ މަސައްކަތް ކުރި ކަމަށެވެ.

އޭނާ އަދި ބުނީ ޕީއެސްޖީން ޑެމްބެލޭ އަށް ހުށަހަޅާ އަގާއި މުސާރައަކީ އެއާ ވާދަކުރެވޭނެ އަދަދެއްނޫން ކަމަށެވެ. ނަމަވެސް ބާސެލޯނާއިން ވަރަށް ރަނގަޅަށް ކަންތައްތައް ކޮށްދެމުން ދަނިކޮށް ޑެމްބެލޭ ކަންތައްތައް ކުރި ގޮތުން ދެރަވި ކަމަށެވެ.

ބާސެލޯނާއިން ޑެމްބެލޭ ގަތީ 2017 ވަނަ އަހަރު ބޮރޫޝިޔާ ޑޯޓްމުންޑުން 105 މިލިއަން ޔޫރޯ އަށެވެ. ގާތްގާތުގައި އަނިޔާވެ، ގިނަ މެޗުތަކެއް ގެއްލުނު ނަމަވެސް އޭނާ ވަނީ 185 މެޗުގައި 40 ގޯލު ޖަހައިދީފަ އެވެ.