ސަރުކާރުން ކައުންސިލުތަކަށް ދޭ އެހީގެ ފައިދާ ރަށްރަށުން ދަނީ ފެންނަމުން: މެންބަރު ޝަރީފް

ސަރުކާރުން ކައުންސިލުތަކަށް ދޭ އެހީގެ ފައިދާ ރަށްރަށުން ފެންނަމުންދާކަމަށް ކެލާ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.

ހއ ފިއްލަދޫގައި ބުދަ ދުވަހު ބޭއްވި ބަނދަރު ބައްދަލުވުމުގައި ވާހަކަ ދައްކަވަމުން މެންބަރު ޝަރީފް ވިދާޅުވީ، ރައްޔިތުން އެދޭ ކަންކަން ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު ކޮށްދެއްވަމުން ގެންދަވާ ކަމަށެވެ.

މެމްބަރު ވިދާޅުވީ، ލާމަރުކަޒީ ޤާނޫނުގެ ދަށުން ގެނައި ބަދަލުތަކާއެކު އެރަށު ކައުންސިލުންވެސް ހަރުދަނާ މަސައްކަތްތަކެއް ކުރަމުންދާ ކަަމަށެވެ. އެގޮތުން ކައުންސިލުތަކަށް ދޭ އެހީގެ ފައިދާ ރަށަށް ކުރަމުންދާކަން މެމްބަރު ފާހަަގަ ކުރެއްވިއެވެ.

އޭގެ އިތުރުން، ފިއްލަދޫއަކީ އެމްޑީޕީގެ ސިޔާސަތުތަކަށް ނުހަނު ލޯބިކުރާ ރައްޔިތުންތަކެއް ތިބި ރަށެއްކަން ފާހަގަ ކުރައްވައި މެމްބަރު ވިދާޅުވީ، އެ ރަށުން ރައީސް ސާލިޙަށް ބޮޑު އަޣުލަބިއްޔަތެއް ލިބިގެންދާނެކަން ޤަބޫލު ކުރައްވާ ކަމަށެވެ.

މެމްބަރު ޝަރީފް ވަނީ އާރްޓީއެލް ފެރީއާއި އެނޫންވެސް ޚިދުމަތްތަކާއެކު ރައްޔިތުންނަށް ލިބިދީފައިވާ ފައިދާތަކުގެ މައްޗަށްވެސް އަލިއަޅުވާލައްވާފައެވެ.