ފިއްލަދޫ ސްކޫލުގެ މަލްޓިޕަރޕަސް ހޯލް އިމާރާތުގެ މަސައްކަތް ހުއްޓި، ހަލާކުވަނީ
29 ޖޫން 2025 | އާދީއްތަ 07:49ދަގަނޑުތައް ޖަހައި މަސައްކަތްތައް ކުރިއަށް ގެންދިޔަ ނަމަވެސް މިސަރުކާރާއެކު އަމަލީ މަސައްކަތް ވަނީ ހުއްޓިފައި
ރާއްޖެޓީވީގެ ވައުދުނާމާ ޕްރޮގްރާމްގައި ރައްޔިތުންގެ މަޖިލީހުގެ ކެލާ ދާއިރާގެ ކުރީގެ މެންބަރު އިބްރާހިމް ޝަރީފް ވާހަކަދައްކަވަނީ | ރާއްޖެއެމްވީ
ހއ.ފިއްލަދޫ ސްކޫލުގެ މަލްޓިޕަރޕަސް ހޯލް އިމާރާތުގެ މަސައްކަތް ހުއްޓި، ހަލާކުވާން ފަށައިފިއެވެ.
ރާއްޖެޓީވީގެ ވައުދުނާމާ ޕްރޮގްރާމްގައި ރައްޔިތުންގެ މަޖިލީހުގެ ކެލާ ދާއިރާގެ ކުރީގެ މެންބަރު އިބްރާހިމް ޝަރީފް ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ފިއްލަދޫ ސްކޫލުގެ މަލްޓިޕަރޕަސް ހޯލް އިމާރާތް ކުރުމުގެ އަމަލީ މަސައްކަތް ފަށާފައިވާ ކަމަށެވެ.
އެގޮތުން ދަގަނޑުތައް ޖަހައި، މަސައްކަތްތައް ކުރިއަށް ގެންދިޔަ ކަމަށާއި، ނަމަވެސް މިސަރުކާރާއެކު އަމަލީ މަސައްކަތް ހުއްޓިފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ އެތަނަށް ގެއްލުން ލިބި، މިހާރު ހަލާކުވަމުންދާ ކަމަށާއި، މިއީ ވަރަށް ބޮޑު ކަންބޮޑުވުމެއް ކަމަށެވެ.
ފިއްލަދޫގައި އަޅުގަނޑުމެން ފެށި މަލްޓިޕަރޕަސް ހޯލުގެ މަސައްކަތް ވަނީ ހުއްޓިފައި. އެތާގައި ދަގަނޑުތަކާއި އެއްޗެހި ކޮޅަށް ޖެހި އެގޮތަށް ހުރީ. އައްވާ ވާރޭގައި ހުރީ. ހަލާކުވަމުން އެދަނީ. ބުޑުތައް އަޅާފައި ވޭތުވެދިޔަ ސަރުކާރު ނިމުނުއިރު ހުރީ.ރައްޔިތުންގެ މަޖިލީހުގެ ކެލާ ދާއިރާގެ ކުރީގެ މެންބަރު އިބްރާހިމް ޝަރީފް
11 އޮގަސްޓް 2022 ގައި ފިއްލަދޫ ސްކޫލުގެ މަލްޓިޕަރޕަސް ހޯލް އިމާރާތުގެ މަސައްކަތް ހަވާލުކޮށްފައިވަނީ ނެކްސާ ޕްރޮޖެކްޓްސް ޕްރައިވެޓް ލިމިޓެޑާއެވެ.
ސަރުކާރުގެ ޕީ.އެސް.އައި.ޕީ ބަޖެޓުގެ ދަށުން ކުރިއަށް ގެންދާ މިމަޝްރޫއަށް 13734711.88 (ތޭރަ މިލިއަން ހަތްލައްކަ ތިރީސް ހަތަރު ހާސް ހަތްސަތޭކަ އެގާރަ ރުފިޔާ އަށްޑިހައަށް ލާރި) ހަރަދުވެއެވެ. މި މަސައްކަތް ހަވާލުކޮށްފައިވަނީ އެއް އަހަރު ދުވަހުގެ ތެރޭގައި ނިންމާ ގޮތަށެވެ.
މީގެ އިތުރުން ފިއްލަދޫގެ ތަރައްގީއަށް އިޝާރާތް ކުރައްވައި ޝަރީފް ވިދާޅުވީ އެއްވެސް މަޝްރޫއެއް ކުރިއަށް ނުދާ ކަމަށާއި، ގެސްޓްހައުސް ވިޔަފާރި ތަރައްގީ ކުރުމުގެ މަސައްކަތް ވެސް ކުރިއަށް ނުދާ ކަމަށެވެ. އަދި 1 ޖޫން 2023 ގައި ފިއްލަދޫ މަގު ހެދުމުގެ މަސައްކަތް, ރޯޑް ޑިވެލޮޕްމަންޓް ކޯރޕަރޭޝަން ލިމިޓެޑް (އާރްޑީސީ)އަ ހާވަލުކުރި ނަމަވެސް މިމަސައްކަތުގެ ވެސް އަޕްޑޭޓެއް ނެތް ކަމަށް އޭނާ ވިދާޅުވިއެވެ.
ޝަރީފް ވިދާޅުވީ ފިއްލަދޫގައި ވެސް ތަރައްގީގެ މަޝްރޫއުތައް ކުރިއަށް ގެންދިޔައީ ކުރީ ސަރުކާރުން ކަމަށާއި، އެސަރުކާރުގައި ފެނާއި ނަރުދަމާ ގާއިމްކޮށް، ރައްޔިތުން އެދޭ ގޮތަށް ސިއްހީ ނިޒާމު ހަރުދަނާ ކުރުމުގެ ގޮތުން ހެލްތް ސެންޓަރު އެކްސްޓެންޝަން އިމާރާތްކޮށް ޚިދުމަތްފުޅާ ކޮށްދިން ކަމަށެވެ.
