އިންޓަ މިއާމީގެ ފަރިތަކުރުންތަކަށް ޖޯޑީ އަލްބާ ނުކުންނަން ފަށައިފި
މެސީ އާއި ބުސްކެޓްސްގެ ސޮޮއި ހޯދުމަށް ފަހު، އަލްބާގެ ސޮއި ހޯދާފައިވާކަން މިއާމީގެ ރައީސް ޖޯޖް މާޝް ވިދާޅުވީ މީޑިއާއަކަށް ދެއްވި އިންޓަވިޔުއެއްގައި
އިންޓަ މިއާމީގެ ފަރިތަކުރުމުގައި ޖޯޑީ އަލްބާ
އެމެރިކާ ލީގުގެ އިންޓަ މިއާމީގެ ފަރިތަކުރުންތަކަށް ސްޕެއިންގެ ޑިފެންޑަރު ޖޯޑީ އަލްބާ ނުކުންނަން ފަށައިފި އެވެ.
ބާސެލޯނާ އާއެކު ހަދާފައިވާ އެއްބަސްވުން އުވާލުމަށްފަހު އަލްބާ ވަނީ ނިމުނު ސީޒަނަށް ފަހު އެ ކުލަބު ދޫކޮށްލުމަށް ނިންމައިފަ އެވެ. އެއްބަސްވުމުގައި ބާކީ އޮތް އެއް އަހަރަށް، އަލްބާ އަށް ލިބެން ޖެހޭ ފައިސާ އޭނާ ވަނީ ދޫކޮށްލައިފަ އެވެ. ލިއޮނަލް މެސީ އާއި ސާޖިއޯ ބުސްކެޓްސްގެ ސޮޮއި ހޯދުމަށް ފަހު، މިއާމީން އަލްބާގެ ސޮއިހޯދާފައިވާކަން އެކުލަބުގެ ރައީސް ޖޯޖް މާޝް ވިދާޅުވީ މީޑިއާއަކަށް ދެއްވި އިންޓަވިޔުއެއްގަ އެވެ. ނަމަވެސް މިހާތަނަށް ރަސްމީކޮށް މިއާމީން އެކަން އިއުލާން ކޮށްފައެއް ނުވެ އެވެ.
އިންޓަ މިއާމީން ހޯމަ ދުވަހު ކުރިއަށް ގެންދިޔަ ފަރިތަކުރުންތަކަށް އަލްބާ ވަނީ ނުކުންނަން ފަށައިފަ އެވެ. އެ ކުލަބުގެ އައު ކޯޗު ޖެރާޑޯ މާޓިނޯއާއެކު އަލްބާ ފެންނަން ހުންނަ ފޮޓޯތަކެއް ވެސް މިއާމީން ވަނީ ހިއްސާކޮށްފަ އެވެ. މީގެ ކުރިން މާޓިނޯ ބުނީ ކުރިއަށް އޮތް ސީޒަނަށް އޭނާ ޓީމު އެކުލަވާލާނީ އަލަށް ގެންނަ ކުޅުންތެރިން ވެސް ވަރަށް ބޮޑަށް ހިމަނައިގެންނެވެ. ޚާއްސަކޮށް ތަޖުރިބާހުރި ކުޅުންތެރިންނާއެކު އަންނަ ސީޒަނުގައި ފެންނާނީ ވަރުގަދަ ޓީމެއް ކަމަށް ވެސް އޭނާ ވަނީ ބުނެފަ އެވެ.
މެސީ، ބުސްކެޓްސް އަދި އަލްބާ ވަނީ މި އަހަރުގެ ކުރީ ކޮޅު ބާސެލޯނާގައި ބައްދަލު ވެސް ކޮށްފަ އެވެ. އެއާއެކު ތިން ކުޅުންތެރިން އެއް ޓީމަކަށް ބަދަލުވާން އުޅޭ ކަމުގެ އަޑުތައް އޭރު ވަނީ ފެތުރިފަ އެވެ.
