ޖަރުމަނުގެ ބަޔާން މިއުނިކް ދޫކޮށްލަން ޖެހުމަކީ ހިތްދަތިކަމެއް ކަމަށް ސެނެގާލްގެ ސަޑިއޯ މާނޭ ބުނެފި އެވެ.
ލިވަޕޫލް ދޫކޮށް މާނޭ ބަޔާނަށް ބަދަލުވީ 2022 ވަނަ އަހަރު އެވެ. އެ ކުލަބާއެކު މާނޭ ސޮއިކުރި އެއްބަސްވުމުގެ މުއްދަތު ހަމަވާން އޮތީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އެއްބަސްވުމުގައި ބާކީ ދެ އަހަރު އޮއްވާ މިހާރު މާނޭ ވަނީ ސައުދީ ޕްރޯ ލީގުގެ އަލް ނަސްރަށް ބަދަލުވާން ނިންމައިފަ އެވެ. އެ ކުލަބަށް ބަދަލުވުމަށް ފުރިހަމަ ކުރަން ޖެހޭ މެޑިކަލްގެ އެންމެހައި ކަންކަން މާނޭ މިހާރު ވަނީ ފުރިހަމަ ކޮށްފަ އެވެ. މާނޭ ބަޔާން ދޫކޮށްލަން ނިންމީ އެ ކުލަބުގައި ލެރޯއީ ސާނޭއާ ޖެހުނު މައްސަލައަކަށް ފަހު އެވެ. އެ މައްސަލައިގައި ބަޔާނުންް ވަނީ މާނޭ ސަސްޕެންޑުކޮށް، ޖޫރިމަނާ ވެސް ކޮށްފަ އެވެ. ބަޔާނުން މާނޭ ދޫކޮށްލަން ބޭނުންވާ ކަމުގެ އަޑުތައް ފެތުރުނީ އެއަށްފަހު އެވެ.
އަލް ނަސްރުގެ މެޑިކަލް ކަންކަން ފުރިހަމަ ކުރުމަށްފަހު ވާހަކަ ދައްކަމުން މާނޭ ބުނީ، ބަޔާން ދޫކޮށްލުމަށް ނިންމި ނިންމުމަކީ އޭނާ އަށް ހިތްދަތި ނިންމުމެއް ކަމަށެވެ. މާނޭ ބުނި ގޮތުގައި ބަޔާންގެ ނިމުން އޭނާ އުންމީދު ކުރީ މިފަދަ ގޮތަކަށް ނޫނެވެ. އިތުރަށް ވާހަކަ ދައްކަމުން މާނޭ ބުނީ ކުރިއަށް އޮތް ސީޒަނުގައި އޭނާ އަށް ބަޔާނަށް އެހީތެރިވެދެވެނޭކަން ވެސް އެނގޭ ކަމަށާއި، ނަމަވެސް މިހާރު އެދެނީ ބަޔާން އާއި ބަޔާންގެ ސަޕޯޓަރުންނަށް އެންމެ ފުރިހަމަ ކާމިޔާބަށް ކަމަށެވެ. މާނޭ ބުނީ ދެން އޭނާގެ ފޯކަސް އޮންނާނީ އަލުން ފަށަން އުޅޭ މަސައްކަތަށް ކަމަށެވެ.
އަލް ނަސްރަަށް ބަދަލުވުމަށް މާނޭ ވަނީ ދުބާއީގައި މެޑިކަލްގެ ކަންކަން ފުރިހަމަ ކޮށްފަ އެވެ. އެއަަށްފަހު އެ ޓީމުގެ ކުޅުންތެރިޔެއްގެ ގޮތުގައި ކުރިއަށް އޮތް ވަގުތުތަކުގެ ތެރޭގައި އޭނާ ސޮއިކުރާނެ އެވެ. އަލް ނަސްރުން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ ސޮއި ހޯދި ފަހުން، ސައުދީ ލީގުގެ ކުލަބުތަކުން އަންނަނީ ޔޫރަޕުގައި ކުޅޭ ނަން މަޝްހޫރު ކުޅުންތެރިން އެ ލީގަށް ގެންނަމުންނެވެ. އެހެންކަމުން ކުރިއަށް އޮތް ސީޒަނުގައި ސައުދީ ލީގު އިތުރަށް ވަރުގަދަވެ، ފޯރި ގަދަވާނެ ކަމަށް ވެސް ބެލެވެ އެވެ.
