އެހެން ކެންޑިޑޭޓުން ކޮށްދޭނެ ކަމަށް ބުނަމުންދަނީ މިހާރުވެސް ފަށާފައިވާ ކަންކަން: ރައީސް
31 ޖުލައި 2023 | ހޯމަ 14:29މި ދުވަސްވަރު ރައްޔިތުންނަށް ކަންކަން ކޮށްދޭނެ ކަމަށް ބުނެ އެތައް ބަޔަކު އަންނާނެ
ރައީސް މާއުނގޫދޫ ރައްޔިތުންނާ ބައްދަލުކުރައްވަނީ
މި ދުވަސްވަރު ކެމްޕޭނަށް ވަޑައިގެން އެކި ފަރާތްތަކުން ކޮށްދޭނެ ކަމަށް ބުނެ ދައްކަނީ މިހާރު ވެސް ސަރުކާރުން ފަށާފައިވާ ކަންކަން، ކަމަށްވިދާޅުވެ ރައީސްގެ ފާޑުކިޔުން އިދިކޮޅުގެ ސިޔާސަތުތަކަށް އަމާޒުކުރައްވައިފިއެވެ.
ހޯމަ ދުވަހު ށ. އަތޮޅުގެ މާއުނގޫދޫއަށް ވަޑައިގެން ރައީސް ވިދާޅުވީ މި ދުވަސްވަރު ރައްޔިތުންނަށް ކަންކަން ކޮށްދޭނެ ކަމަށް ބުނެ އެތައް ބަޔަކު އަންނާނެ ކަމަށެވެ. ނަމަވެސް ރައްޔިތުން އެކަންކަމަށް ވަރަށް ބޮޑަށް ވިސްނަން ޖެހޭކަމަށް ރައީސް ވިދާޅުވިއެވެ.
ނަން ހާމަ ނުކުރައްވައި ރައީސް ވިދާޅުވީ ރިޔާސީ އިންތިޚާބުގެ ކެމްޕޭނަށް ވަޑައިގެން ރަށެއްގައި 1200 މީޓަރުގެ އެއަރޕޯޓެއް އަޅައިދޭނެ ކަމަށް ވިދާޅުވި ކަމަށެވެ. ނަމަވެސް ހަމަ އެރަށުގައި މިއަދުގެ ސަރުކާރުން 1500 މީޓަރުގެ އެއަރޕޯޓެއްގެ މަސައްކަތް ކުރަމުން އަންނަކަން އެމަނިކުފާނު ފާހަގަކުރެއްވިއެވެ.
ދާދިފަހުން އެމްޑީޕީން ވަކިވެ ބައެއް މެމްބަރުން އުފެއްދި "ދަ ޑިމޮކްރެޓްސް" ގެ ސިޔާސަތަކަށް އިޝާރާތް ކުރައްވާ ވެސް ރައީސް ވަނީ ފާޑުވިދާޅުވެފައެވެ. އެގޮތުން, މޯގޭޖުނުކޮށް ކުދި ވިޔަފާރިތަކަށް ލޯނު ދޭނެ ކަމުގެ ވާހަކަތައް ބައެއް ފަރާތްތަކުން ދައްކަމުން އަންނައިރު މި ސަރުކާރުން މިހާރު ވެސް އެސްއެމްއީ ބޭންކް މެދުވެރިކޮށް އެފަދަ ލޯނު ދެމުން އަންނަ ކަމަށް ވިދާޅުވިއެވެ. މިކަމަށް ބޭނުންވަނީ މޮޅު ޕްރޮޕޯސަލެއްކަން ވެސް ރައީސް ފާހަގަކުރެއްވިއެވެ.
މާއުނގޫދޫގެ ސިޔާސީ ހަރަކާތްތަކަށް ރިއާޔަތް ކުރައްވާ ރައީސް ވަނީ އިދިކޮޅު ޕީޕީއެމްގެ ކެމްޕޭނަށް ވެސް ތައުރީފު ކުރައްވާފައެވެ. އިންތިޚާބެއް ކާމިޔާބު ކުރުމުގައި ވަރުގަދަ ވާދަވެރިކަމެއް ބޭނުންވާކަމަށް އެމަނިކުފާނު ވިދާޅުވިއެވެ. ށ. ފުނަދޫގައި ވެސް ރައީސް ވަނީ މިހާރު ރާއްޖޭގެ ސިޔާސީ މަޝްރަހު އޮތްގޮތުން މިފަހަރުގެ އިންތިޚާބުގައި ވާދަކުރާނީ އެމްޑީޕީއާއި ޕީޕީއެމް ކަމަށް ވިދާޅުވެފައެވެ. އަދި އެހެނިހެން ޕާޓީތަކަށް އެޕާޓީތަކުން ބުނާ ތާއީދެއް ނެތް ކަމަށް ވެސް އެމަނިކުފާނު ވިދާޅުވިއެވެ.
ރައީސް ވަނީ މި ބައްދަލުކުރެއްވުމުގައި ކުރިއަށްއޮތް ފަސް އަހަރު ތެރޭގައި މާއުނގޫދޫއަށް ކޮށްދެއްވާނެ ކަންކަމުގެ މައްޗަށް ވެސް އަލިއަޅުއްވާލައްވާފައެވެ. އެގޮތުން, އެ ރަށުގެ ބޮޑެތި މަގުތައް ހެދުމާއި ސްކޫލުގެ އިތުރު ކްލާސްރޫމްތައް އެޅުމާއި ސިއްހީ މަރުކަޒުގެ ޚިދުމަތް 24 ގަޑިއިރަށް ހެދުމާއި ޒަމާނީ މިސްކިތެއް އެޅުން ހިމެނެއެވެ.
