ވެރިކަމުގެ ދެވަނަ ދައުރެއްގައި ވެސް ފުރަތަމަ ދައުރެކޭ އެއްގޮތަށް ށ. ފުނަދޫގައި ތަފާތު ކުރުމެއް ނެތި ތަރައްގީގެ މަޝްރޫއުތައް ހިންގާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ ހޯމަ ދުވަހު ފުނަދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެެއްކެވި ވާހަކަފުޅުގައެވެ. އެގޮތުން 2018 ވަނަ އަހަރުގެ ރިޔާސީ އިންތިޚާބުގެ ކެމްޕޭނުގައި ފުނަދޫއަށް ވަޑައިގެން ވައުދުތަކެއް ވެވަޑައިގެންނެވި ކަމަށާއި އެ ވައުދުތަކުގެ ތެރެއިން ގިނަ ވައުދުތައް ފުދި, އެހެން ވައުދުތައް ފުއްދަން ފަށާފައިވާކަން އެމަނިކުފާނު ފާހަގަކުރެއްވިއެވެ.
ފުނަދޫއަކީ ކުރީގެ ސަރުކާރަށް ވަރަށް ބޮޑު ތާއީދު ކުރި ރަށެެއްކަން ފާހަގަކުރައްވައި ރައީސް ވިދާޅުވީ މި ސަރުކާރުން ސިޔާސީ ފިކުރަކަށް ނުބަލައި ރައްޔިތުންނަށް ބޭނުންވާ ޚިދުމަތް ފޯރުކޮށްދެމުން އަންނަކަން އެ ރަށުން ވެސް ފެނިގެންދާނެ ކަމަށެވެ. އަދި ކުރީ ސަރުކާރުތަކުން ފުނަދޫގެ ތަރައްގީއަށް މަސައްކަތް ކުރި ނަމަވެސް އެކަންތައް ކުރީ ތަރުތީބެއް ނެތި ކަމަށާއި އޭގެ ސަބަބުން އިތުރު މަޝްރޫއުތައް ހިންގަން ޚަރަދު ބޮޑުވެފައިވާކަން ވެސް ފާހަގަކުރެއްވިއެވެ. މި ސަރުކާރުން މަޝްރޫއުތައް ހިންގަނީ ވަރަށް ރޭވުންތެރިކަމާއެކުގައި ކަމަށް ވެސް ރައީސް ވިދާޅުވިއެވެ.
ރައީސް ވިދާޅުވީ ފުނަދޫއަށް ބޭނުންވާ ބިން ހިއްކުމަށް މި އަހަރު ނިމުމުގެ ކުރިން ޕްލޭންކޮށް ބަޔަކާ ހަވާލުކުރުމަށް މަސައްކަތް ކުރައްވަމުން ގެންދަވާ ކަމަށެވެ. ފުނަދޫގެ ތަރައްގީއަށް އަދިވެސް ކުރަން ޖެހޭ ކަންކަން އެބަހުރި ކަމަށާއި އެހެންވެ ކުރިއަށް އޮތް ދައުރުގައި ގިނަ ކަންކަން ރާވާފައިވާކަމުގެ އުފާވެރި ޚަބަރު ރައީސް ފުނަދޫ ރައްޔިތުންނަށް ދެއްވިއެވެ.
ދެން އަންނަ ދައުރުގައި ކޮށްދެއްވާނެ ކަމަށް ރައީސް ވިދާޅުވި ކަންކަމުގެ ތެރޭގައި ފެނުގެ ނިޒާމުގެ މަސައްކަތް ނިމުމުން މިހާރު ނުނިމި ހުރި މަގުތަކުގައި ތާރު އެޅުމުގެ މަސައްކަތް ކުރިއަށްގެންދިއުމާއި ބޯހިޔާވަހިކަމުގެ މައްސަަލަ ހައްލު ކުރުމަށް ރޯ ހައުސް އަޅައިދިނުމާއި ފުނަދޫ ފަޅުގައި އޮތް ފަރުކޮޅުގައި ރައްޔިތުންނަށް އާމްދަނީ ލިބޭ ގޮތަށް ތަރަައްގީގެ މަޝްރޫއުތައް ހިންގުމާއި މަސްވެރިންނަށް ހެޔޮ އަގުގައި އައިސް ލިބޭ ގޮތަށް ރަށުގެ ބަނދަތުގައި އައިސް ޕްލާންޓެއް ބެހެއްޓުމާއި 50 އެނދުގެ އައު ހޮސްޕިޓަލެއް އަޅުއްވައިދެއްވުމާއި ސްކޫލަށް ކްލާސްރޫމްތައް އިތުރު ކޮށްދިނުން ހިމެނެއެވެ. މި މަޝްރޫއުތަކާއެކު ކުރިއަށް އޮތް ހަތަރު އަހަރުތެރޭގައި އެ ސަރަހައްދަށް ބޮޑު ބަދަލެއް އަންނާނެ ކަމަށް ވެސް ރައީސް ވިދާޅުވިއެވެ.
ރައީސް އިތުރަށް ވިދާޅުވީ ކުރިއަށް އޮތް ރިޔާސީ އިންތިޚާބުގައި ރައްޔިތުން ވޯޓުލާން ޖެހޭނީ ވަރަށް ވިސްނައިގެން ކަމަށެވެ. މިހާރު އެކި ޕާޓީތަކުން ވާދަކުރާނެ ކަމަށް ބުނި ނަމަވެސް ސިޔާސީ މަސްރަހު މިހާރު އޮތް ގޮތުން ވާދަކުރާނީ އެމްޑީޕީ އާއި ޕީޕީއެމް ކަމަށާއި އެހެންކަމުން ތަރައްގީއާއެކު ކުރިއަށްދާނީތޯ ނުވަތަ ކުރީގައި އޮތް ބިރުވެރިކަމާއި އަނިޔާވެރިކަަމަށް އެނބުރިދާނީތޯ ރައްޔިތުން ނިންމަން ޖެހޭ ކަމުގައި އެމަނިކުފާނު ވިދާޅުވިއެވެ.
