އިހަވަންދޫގައި ކުރިއަށްގެންދާ ހުރިހާ މަޝްރޫއުތައް މިއަހަރުގެ ތެރޭގައި ނިންމާނަން: އާޒިމް
31 ޖުލައި 2023 | ހޯމަ 06:02ބަނދަރާއި، މަލްޓިޕަރޕަސް ހޯލުގެ މަސައްކަތް ވަނީ ގާތްގަނޑަކަށް އެއްކޮށް ނިމިފައި
އެމްޓީސީސީގެ ސީއީއޯ އާދަމް އާޒިމް
ހއ.އިހަވަންދޫގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ކުރިއަށްގެންދާ ހުރިހާ މަޝްރޫއުތައް މިއަހަރުގެ ތެރޭގައި ނިންމާ ރައްޔިތުންނާއި ހަވާލުކުރާނެ ކަމަށް އެކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.
އިހަވަންދޫގައި އެމްޓީސީސީން 3 މަޝްރޫއެއް ކުރިއަށްގެންދެއެވެ. މިމަޝްރޫއުތަށް ކުރިއަށްދާ ގޮތް ބައްލަވާލެއްވުމަށްފަހު މީޑިއާތަކަށް މައުލޫމާތު ދެއްވަމުން އާޒިމް ވިދާޅުވީ ބަނދަރުގެ މަޝްރޫއު ނިމިފައިވާ ކަމަށާއި، މިހާރު ކުރިއަށް ދަނީ ބައެއް ކުދިކުދި މަރާމާތުގެ މަސައްކަތްތައް ކަމަށެވެ.
އެރަށުގައި ސްކޫލުގައި އިމާރާތް ކުރެވޭ މަލްޓިޕަރޕަަސް ހޯލަށް އިޝާރާތް ކުރައްވައި އާޒިމް ވިދާޅުވީ ހޯލުގެ މަސައްކަތް ވެސް އެއްކޮށް ނިމިފައިވާ ކަމަށެވެ. މިމަސައްކަތް ކުރުމަށް އެމްޓީސީސީއާ ހަވާލުކުރުމުން އަވަހަށް ނިންމައި ދިނުމަށް ދާއިރާގެ މެންބަރު އަދި އާއްމު ރައްޔިތުން އެދެމުން ދިޔަ ކަމަށާއި، މި މަސައްކަތް ކުރިއަށް ގެންދިޔައީ ވެސް އެއަޒުމުގައި ކަމަށެވެ.
އިހަވަންދޫގެ ބިން ހިއްކުމުގެ މަޝްރޫއަށް އިޝާރާތް ކުރައްވައި އާޒިމް ވިދާޅުވީ މިމަޝްރޫއުގެ މަސައްކަތްތައް މިދޭތެރެއިން ހުއްޓިގެން ދިޔައީ ޑްރައިޖަރު މައްސަލަ ޖެހުމުން ކަމަށެވެ. ނަމަވެސް މިހާރު އެމައްސަލަ ހައްލު ކުރެވިފައިވާ ކަމަށް އާޒިމް ވިދާޅުވިއެވެ. އަދި ވިދާޅުވީ ބިން ހިއްކުމުގެ މަޝްރޫއު ނިމުމާއެކު، ޝޯ ޕްރޮޓެކްޝަންގެ މަސައްކަތް ފެށިގެންދާނެ ކަމަށެވެ.
އާޒިމް ވިދާޅުވީ އެ ރަށުގައި ކުރިއަށްގެންދާ ތިން މަޝްރޫއުގެ މަސައްކަތް ވެސް މި އަހަރުގެ ތެރޭގައި ނިންމައި ރައްޔިތުންނާއި ހަވާލުކުރާނެ ކަމަށެވެ. މި މަސައްކަތްތައް ކުރިއަށްގެންދަނީ ރަނގަޅު ފެންވަރުގައި، ރައްޔިތުން ބޭނުންވާ ގޮތަށް ކަމަށް އާޒިމް ވިދާޅުވިއެވެ. އަދި ވިދާޅުވީ މި މަޝްރޫއުތަކުން ރައްޔިތުންނަށް ބޮޑެތި މަންފާތަކާއި ނަފާ ލިބޭނެ ކަމަށެވެ.
