މިނިވަން އުފާ ކާނިވަލް ހުޅުވައިފި

މިނިވަން ދުވަހާ ގުޅިގެން ކުރިއަށްގެންދާ މިނިވަން އުފާ 2023 ކާނިވަލް ހުޅުވާލައިފިއެވެ.

ހޮނިހިރު ދުވަހުގެ ރޭ މި ކާނިވާ ހުޅުއްވައިދެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހެވެ. އެމަނިކުފާނުގެ އަރިހުގައި އަނބިކަނބަލުން ފަޒްނާ އަހުމަދާއި ނައިބު ރައީސް ފައިސަލް ނަސީމާއި ހޯމް މިނިސްޓަރު އިމްރާން އަބްދުﷲއާއި އަރބަންކޯގެ މެނޭޖިންގ ޑިރެކްޓަރު އަހުމަދު އާތިފާއި އެހެނިހެން ބައެއް ވަޒީރުންވެސް ބައިވެރިވެވަޑައިގަތެވެ. މި ކާނިވާ ހުޅުއްވައިދެއްވުމަށްފަހު ރައީސްގެ ދެ ކަނބަލުން ވަނީ ކާނިވަލުގައި ކުރިއަށްދާ ހަރަކާތްތައް ބައްލަވާލައްވާފައެވެ.

Advertisement

އަންނަ އޯގަސްޓް މަހުގެ ތިންވަނަ ދުވަހާ ހަމައަށް ކުރިއަށްގެންދާ މި ކާނިވަލުގައި، ހުރިހާ އުމުރުފުރާއަކާ ގުޅޭ ތަފާތު ހަރަކާތްތައް ކުރިއަށްގެންދާނެއެވެ.

ކާނިވާ ހުޅުވުމުގެ ގޮތުން ހޮނިހިރު ދުވަހުގެ ރޭ ވަނީ ދިރާގާއި ޓޫރިޒަމް މިނިސްޓްރީ އަދި ބޭންކް އޮފް މޯލްޑިވްސްގެ އެހީތެރިކަމާއެކު ރާއްޖޭގައި ފުރަތަމަ ފަހަރަށް ޑްރޯން ޝޯއެއްވެސް ބާއްވާފައެވެ. އަދި ހަވާ އެރުވުމާއި ރެޑްބުލްގެ އެހީތެރިކަމާއެކު ޕެރަމޮޓޯގެ ހަރަކާތްތައްވެސް ވަނީ ބާއްވާފައެވެ.

މިނިވަން އުފާ ކާނިވަލުގައި ތަފާތު ކުޅިވަރު ސްޓޯލްތަކާއި ކާބޯތަކެތީގެ ސްޓޯލްތައް ހުންނާނެއެވެ. މީގެ ތެރޭގައި ބިރުވެރި ހޮހަޅައާއި ކަރޯކޭ ބޮކްސްއާއި ޕްލޯޓް ޕާކާއި ލެއިޒަރ ޕާކު ހިމެނެއެވެ.

މީގެ އިތުރުން ކާނިވާ ކުރިއަށްދާ މުއްދަތުގައި ޒިޔާރަތްކުރާ ފަރާތްތަކުގެ ތެރެއިން ނަސީބުވެރި ފަރާތަކަށް އުރީދޫ މޯލްޑިވްސްއިން ދެ މީހަކަށް، އިންޑޮނޭޝިއާގެ ބާލީއަށް ހަތް ދުވަހުގެ ދަތުރެއް ދޭން ވަނީ ނިންމާފައެވެ. މި ދަތުރުގައި ޓިކެޓާއި ހަތަރު ތަރީގެ އެކޮމޮޑޭޝަންގެ އިތުރުން، ބާލީގެ ޓޫރިސްޓް ސްޕޮޓްތަކަށް ޒިޔާރަތްކުރުން ވެސް ހިމެނެއެވެ. މި ދަތުރު ހޯދަން ލަކީޑްރޯގައި ބައިވެރިވުމަށް ކާނިވަލުގެ ތެރޭގައި ހުރި ކިޔުއާރު ކޯޑު ސްކޭން ކުރުމުން ރަޖިސްޓްރީވެވޭނެއެވެ.

މިނިވަން އުފާ ކާނިވަލަކީ ހޯމް މިނިސްޓްރީއާއި އަރބަންކޯ ގުޅިގެން ކުރިއަށްގެންދާ ކާނިވަލެކެވެ. މި ކާނިވާ ކުރިއަށްދާ މުއްދަތުގައި، މިހާރު މާލޭ ސަރަހައްދުގައި ފެތުރެމުން އަންނަ ބޭރަށް ހިންގުމާއި ހޮޑުލުމުގެ ބަލީގެ އެއްވެސް އަލާމާތެއް ހުރިނަމަ ކާނިވަލަށް ޒިޔާރަތްނުކުރުމަށް އަރބަންކޯއިން އިލްތިމާސްކުރެއެވެ.