އުރީދޫއިން މިނިވަން އުފާ ކާނިވަލުގެ ބައިވެރިންގެ ތެރެެއިން ނަސީބުވެރިއަކަށް ބާލީ ދަތުރެއް ދެނީ

ހޮނިހިރު ދުވަހުގެ ރޭ ފަށާ މިނިވަން އުފާ ކާނިވަލުގައި ބައިވެރިވާ ފަރާތްތަކުގެ ތެރެއިން ނަސީބުވެރި ފަރާތަކަށް އުރީދޫ މޯލްޑިވްސްއިން ބާލީ ދަތުރެއް ދޭން ނިންމައިފިއެވެ.

ހޯމް މިނިސްޓްރީއާއި އާބަންކޯއާ ގުޅިގެން ކުރިއަށްގެންދާ މިނިވަން އުފާ ކާނިވަލުގައި އުރީދޫ މޯލްޑިވްސްއަކީ ޕާޓްނަރެކެވެ. އެ ހައިސިއްޔަތުން އެ ކުންފުނިން ވަނީ ކާނިވަލުގެ ބައިވެރިންގެ ތެރެއިން ނަސީބުވެރި ފަރާތަކަށް ލަކީ ޑްރޯއެއް ހުޅުވާލާފައެވެ. އެ ލަކީޑްރޯގެ ބޮޑު އިނާމުގެ ގޮތުގައި ދެ މީހަކަށް 7 ދުވަހުގެ ބާލީ ދަތުރެއް ދޭން ވަނީ ނިންމާފައެވެ.

އޯގަސްޓް 3 ވަނަ ދުވަހުގެ ނިޔަލަށް ކޮންމެ ދުވަހަކު ހަވީރު 4:00ން 6:00ށް، އަދި ރޭގަނޑު 8:00ން 12:00ށް ހުޅުމާލޭ ސެންޓްރަލް ޕާކުގައި ކާނިވާ ކުރިއަށްދާނެއެވެ. މި ކާނިވަލަކީ ހުރިހާ އުމުރުފުރައެއްގެ މީހުންނަށް ވެސް ބައިވެރިވެވޭނެ ކާނިވަލެކެވެ. އެގޮތުން، މި ކާނިވަލުގައި ތަފާތު ހިތްގައިމު ހަރަކާތްތަކާއި ގިނަ ސްޓޯލްތަކެއް ހުންނާނެއެވެ.

މި ކާނިވަލުއި ކުރިއަށްގެންދާ ލަކީ ޑްރޯގެ އެންމެ ބޮޑު އިނާމު ހޯދަން ބޭނުންވާ ފަރާތްތަކުން ކާނިވާއަށް ޒިޔާރަތްކޮށް، ކާނިވަލުގެ އެކި ތަންތަނުގައި ބަހައްޓާފައިވާ ކިއުއާރު ކޯޑު ސްކޭންކޮށް ރަޖިސްޓްރީ ކޮށްލުމުން އޮޓޮމެޓިކުން ލަކީ ޑްރޯގައި ބައިވެރިވެވޭނެއެވެ. ލަކީ ޑްރޯގެ ނަސީބުވެރި ފަރާތް ހޮވަން ހަމަޖެހިފައިވަނީ ކާނިވަލުގެ އެންމެ ފަހު ދުވަހުއެވެ.

މިނިވަން އުފާ ކާނިވަލުގެ އެންމެ ބޮޑު އިނާމުގެ ނަސީބުވެރި ފަރާތަށް އުރީދޫއިން ދެ މީހުންގެ 7 ދުވަހުގެ ބާލީ ދަތުރުގައި، ފްލައިޓް ޓިކެޓުގެ އިތުރުން ހަތަރު ތަރީގެ އެކޮމޮޑޭޝަނާއި ބާލީގެ މަޝްހޫރު ޓޫރިސްޓް ސްޕޮޓްތައް ބަލައިލުމުގެ ފުރުސަތުވެސް ދޭނެއެވެ. މީގެތެރޭގައި އުބުދުގައި 2 ރޭ، ނޫސާ ޕެނިޑާގައި 2 ރޭ އަދި 2 ރޭ ސެމިނިއާކްގައި ހިމެނޭއިރު، މިތަންތަނުގައި ގައިޑަކާއެކު ޓުއަރކުރުމުގެ ފުރުސަތު ލިބިގެންދާނެއެވެ.

މި ޓުއަރގައި ހިމެނޭ ތަންތަނުގެ ތެރޭގައި ކޮފީ ފާމް ޕްލާންޓޭޝަނަށް ޒިޔާރަތްކުރުމާއި، އަލޯހާ އުބުދު ސްވިންގް ބަލައިލުމާއި، އުބުދު ސެންޓަރ އެކްސްޕްލޯކުރުމާއި، ހިތްގައިމު އެންޖަލް ބިލަބޮންގްއާއި ބްރޯކެން ބީޗް ބަލައިލުމާއި، ހިތްގައިމު ކެލިންގްކިންގް ސީކްރެޓް ޕޮއިންޓާއި ކްރިސްޓަލް ބޭއަށް ޒިޔާރާތްކުރުމާއި، އަޓޫހ ބީޗަށް ޒިޔާރާތްކުރުމާއި، ޓްރީ ހައުސްއަށް ޒިޔާރަތްކުރުމާއި އަދި ސެރިބޫ އައިލެންޑް ބަލައިލުން ހިމެނެއެވެ.

މިނިވަން އުފާ ކާނިވަލުގައި ހުންނަ އުރީދޫ ނޭޝަން ސްޓޯލްގައި ގޭމުކުޅޭ ފަރާތްތަކަށް ޝައުގުވެރިވާނެފަދަ ކުޅިވަރުތަކުގައި ބައިވެރިވުމުގެ ފުރުސަތު ލިބޭނެއެވެ. އަދި މި ގޭމުތަކުގައި ބައިވެރިވެގެން އިނާމުތައް ހޯދުމުގެ ފުރުސަތުވެސް ލިބޭނެއެވެ.