އެމިރޭޓްސް ސްޓޭޑިއަމުގެ ބޭރުގައި ވެންގާގެ ސްޓެޗޫއެއް ހަދައިފި

އާސެނަލްގެ ކުރީގެ ކޯޗު އާސެން ވެންގާގެ ބްރޯންޒް ސްޓެޗޫއެއް، އެ ކްލަބުގެ އެމިރޭޓްސް ސްޓޭޑިއަމްގެ ބޭރުގައި ހަދައިފިއެވެ.

ޕްރިމިއަރ ލީގުގެ ތަށި އުފުލާފައިވާ ގޮތަށް ހެދި މި ސްޓެޗު ދައްކާލާފައިވަނީ ހުކުރު ދުވަހުއެވެ. އޭނާ ވަނީ 1996 ވަނަ އަހަރުގެ އޮކްޓުބަރު މަހުން ފެށިގެން 2018 ވަނަ އަހަރުގެ މެއި މަހާ ހަމައަށް އާސެނަލްއަށް ކޯޗުކޮށްދީފައެވެ. އެ މުއްދަތުގެ ތެރޭގައި ވެންގާ ވަނީ އެ ޓީމާއެކު ތިން ޕްރިމިއަރ ލީގާއި ހަތް އެފްއޭ ކަޕު ކާމިޔާބުކޮށްފައެވެ.

ފްރާންސަށް އުފަން ވެންގާ ވަނީ އާސެނަލްއަށް 1235 މެޗުގައި އިރުޝާދު ދީފައެވެ. އޭނާގެ އެންމެ ބޮޑު ކާމިޔާބީއަކީ 2004 ވަނަ އަހަރު ޓީމަށް ހޯދަދިން މަޝްހޫރު "ދި އިންވިންސިބަލްސް" ގެ ލަގަބެވެ. އެއީ ލީގުގެ އެއްވެސް މެޗަކުން ބަލިނުވެ، ލީގު ކާމިޔާބުކުރުމުގެ ޝަރަފެވެ. މިއަދާ ހަމަޔަށްވެސް، މެޗަކުން ބަލިނުވެ އިތުރު ޓީމަކަށް ލީގު ހޯދިފައެއް ނުވެއެވެ.

ވެންގާގެ އިރުޝާދުގެ ދަށުން އާސެނަލްވަނީ ވިދިވިދިގެން 20 ސީޒަންގެ ޗެމްޕިއަންސް ލީގުވެސް ކުޅެފައެވެ. އޭގެތެރެއިން 2006 ވަނަ އަހަރު އެ ޓީމު ވަނީ ފައިނަލް ކުޅެފައެވެ. ނަމަވެސް، ފައިނަލުގައި ބާސެލޯނާ ކައިރިން ވަނީ 2-1ގެ ނަތީޖާއަކުން ބަލިވެފައެވެ.

އުމުރުން 73 އަހަރުގެ ވެންގާގެ 3.5 މީޓަރުގެ ސްޓެޗޫއަކީ ސްކަލްޕްޗާ ޖިމްގައި ހަދާފައިވާ ސްޓެޗޫއެކެވެ. ހުކުރު ދުވަހުގެ ހެނދުނު މި ސްޓެޗޫ ހަރުކޮށްފައިވަނީ ނޯތު ބޭންކް ސްޓޭންޑްގެ ބޭރުގައެވެ. އެމިރޭޓްސް ކަޕްގައި އަންނަ ބުދަ ދުވަހު މޮނާކޯއާ ދެކޮޅަށް ކުޅޭ މެޗުގެ ޝަރަފުވެރި މެހެމާނަކީ ވެންގާއެވެ.

އާސެނަލްގެ މިހާރުގެ ކޯޗު މިކޭލް އާޓެޓާ ބުނީ، އާސެނަލްގައި ކުޅުމުގެ ފުރުސަތާއި ޓީމުގެ ކެޕްޓަންކަން އޭނާއަށް ދިނީ ވެންގާ ކަމަށެވެ. އަދި އެއީ ދުވަހަކުވެސް އޭނާ ހަނދާން ނެތޭނެ ކަމެއް ނޫންކަމަށެވެ.

އެމިރޭޓްސް ސްޓޭޑިއަމްގެ ވަށައިގެންވާ ޕޯޑިއަމްގައި ވެންގާގެ ސްޓެޗޫގެ އިތުރުން، ޓޯނީ އެޑަމްސް، ޑެނިސް ބާގްކޭމްޕް، ހާބަޓް ޗެޕްމަން، ކެން ފްރިއާ އަދި ތިއެރީ އޮންރީގެ ސްޓެޗޫ ހިމެނެއެވެ.