ގައުމުން ބޭރުގައި ކުޅުނަސް އަތްތިލަބަޑީގެ އަޑު މަޑުވެގެން ނުދާނެ: ނައިބު ރައީސް

ސްރީ ލަންކާގައި ބޭއްވުމަށް ހަމަޖެހިފައިވާ "މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް)" އަށް ރާއްޖެ ކުރިމަތިލާއިރު، ގައުމުގައި ކުޅުނަސް އަދި ގައުމުން ބޭރުގައި ކުޅުނަސް އަތްތިލަބަޑީގެ އަޑު މަޑުވެގެން ނުދާނެ ކަމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވިދާޅުވެއްޖެއެވެ.

ލަންކާގައި ބާއްވާ ފޯ ނޭޝަންސް ކަޕުގައި ހަތަރު ގައުމު ވާދަކުރާއިރު، އެ ގައުމުތަކަކީ ރާއްޖެ އާއި ލަންކާގެ އިތުރުން ބަންގްލަދޭޝް އާއި ސީޝެލްސްއެވެ. މުބާރާތް ކުރިއަސް ގެންދިޔުމަށް ނިންމާފައިވަނީ މި މަހުގެ އަށްވަނަ ދުވަހުން ފެށިގެން 17 ވަނަ ދުވަހުގެ ނިޔަލަށެވެ.

އެ މުބާރާތުގައި ވާދަކުރުމަށް ލަންކާއަށް ގައުމީ ޓީމު ފުރުމުގެ ކުރިން ގައުމީ ޓީމަށް ހިތްވަރުދިނުމަށް އަންގާރަ ދުވަހު ނައިބު ރައީސް ވަނީ ހޮޓެލް ޖެންގައި ބޭއްވި ޚާއްސަ ރަސްމިއްޔާތުގައި ބައިވެރިވެވަޑައިގެންފައެވެ. އެ ރަސްމިއްޔާތުގައި ގައުމީ ޓީމާ މުޚާތަބުކުރައްވާ ނައިބު ރައީސް ފައިޞަލް ވިދާޅުވީ ގައުމުގެ ރައްޔިތުންގެ މެދުގައި އެއްބައިވަންތަކާއި އެކުވެރިކަން އާލާކުރުމުގައި ފުޓްބޯޅަ އިސްދައުރެއް އަދާކުރާކަން މިދިޔަ މަހު މާލޭގައި ބޭއްވި "އުރީދޫ ސާފް ޗެމްޕިއަންޝިޕް 2021" ގައި ފެނިގެން ގޮސްފައިވާ ކަމަށެވެ.

އަދި ސާފް ޗެމްޕިއަންޝިޕުގައި ފެނިގެންދިޔައީ އާދަޔާ ޚިލާފު ސަޕޯޓެއް ކަމަށާއި، ކޮންމެ ރަށަކާއި މާލެއިން އަދި ދަނޑުންވެސް ފެނިގެންދިޔައީ އެއް ޖޯޝެއް ކަމަށްވެސް ވިދާޅުވިއެވެ.

ނައިބު ރައީސް ވިދާޅުވީ އެ މުބާރާތުގައި ގައުމީ ޓީމުން ވަރަށް ހިތްވަރުކުރި ކަމަށާއި، އެކަމަކު ކޮންމެ މުބާރާތަކީ ހުރިހާ ޓީމަކަށް ކާމިޔާބު މުބާރާތަކަށް ނުވެދާނެ ކަމަށެވެ. އެހެންކަމުން މަސައްކަތް ކުރަންވީ ކުރިއަށް އޮތްތަނުގައި ހިތްވަރުކޮށް ކާމިޔާބު ހޯދަން ކަމަށްވެސް ވިދާޅުވިއެވެ. އަދި ވިދާޅުވީ ލަންކާ މުބާރާތާ ކުރިމަތިލާއިރު، ގައުމުގައި ކުޅުނަސް އަދި ގައުމުން ބޭރުގައި ކުޅުނަސް އަތްތިލަބަޑީގެ އަޑު މަޑުވެގެން ނުދާނެ ކަމަށެވެ. އަދި ދުއާއަކީ އަބަދުވެސް ގައުމީ ޓީމަށް ކާމިޔާބު ލިބުން ކަމަށްވެސް ވަނީ ވިދާޅުވެފައެވެ.

ލަންކާގައި ބާއްވާ ފޯ ނޭޝަންސް ކަޕަކީ ރާއްޖޭގެ ގައުމީ ޓީމާ ދާދި ފަހުން ހަވާލުވި އިޓަލީގެ ފްރެންސެސްކޯ މޮރިއޭރޯގެ އިރުޝާދުގެ ދަށުން ގައުމީ ޓީމުން ކުޅޭނެ ފުރަތަމަ މުބާރާތެވެ. މި ފަހަރުގެ މުބާރާތުގައި ރާއްޖޭން ކުޅޭ ފުރަތަމަ މެޗުގައި މި މަހުގެ އަށްވަނަ ދުވަހުގެރޭ ނުކުންނާނީ ލަންކާއާ ދެކޮޅަށެވެ. އަދި އޭގެ ފަހުން 11 ވަނަ ދުވަހު ހަވީރު ބަންގްލަދޭޝްއާ ދެކޮޅަށް ނުކުންނައިރު، ލީގު ބުރުގެ ފަހު މެޗުގައި ސީޝެލްސްއާ ކުޅޭނީ 14 ވަނަ ދުވަހެވެ. މި މުބާރާތުގެ ފައިނަލަށް ދާނީ ލީގު ބުރުން އެންމެ ރަނގަޅު ނަތީޖާ ނެރޭ ދެ ޓީމެވެ.

ލަންކާގައި ބާއްވާ މުބާރާތުގައި މި ފަހަރު ރާއްޖެ ވާދަކުރާއިރު، ރާއްޖޭން ވަނީ މީގެ ކުރިން 2012 ވަނަ އަހަރު ލަންކާގައި ބޭއްވި މަހިންދަ ރާޖަޕަކްސަ މުބާރާތުގެ ޗެމްޕިއަންކަން ހޯދާފައެވެ. އެ ފަހަރު އެ މުބާރާތް ކުރިއަށްގެންދިޔައީ 23 އަހަރުން ދަށުގެ މުބާރާތެއްގެ ގޮތުގައެވެ.