ނާޕޮލީ ސްޓޭޑިއަމުގެ ނަން މަރަޑޯނާގެ ނަމަށް

އާޖެންޓީނާގެ ފުޓްބޯޅަ ލެޖެންޑް ޑިއޭގޯ މަރަޑޯނާގެ އެންމެ ވިދުން ގަދަވި ކުލަބު ކަމަށްވާ ނާޕޮލީގެ ސްޓޭޑިއަމުގެ ނަން މަރަޑޯނާގެ ނަމަށް ބަދަލުކޮށްފިއެވެ.

އުމުރުން 60 އަހަރުގައި މަރަޑޯނާ މަރުވީ މިދިޔަ ނޮވެމްބަރު މަހުގެ 25 ވަނަ ދުވަހު ޖެހުނު ހާޓްއެޓޭކެއްގެ ސަބަބުން ކަމަށް ރިޕޯޓުތައް ބުނެއެވެ. އޭގެ ކުރިން މިދިޔަ މަހުގެ ކުރީކޮޅު އޭނާގެ ސިކުނޑީގައި ލޭ ކޮޅެއް ގަނޑުވެފައި ހުރުމުގެ ސަަބަބުން ވަނީ ކުއްލި އޮޕަރޭޝަނެއްވެސް ކޮށްފައެވެ. މަރަޑޯނާ މަރުވީ އެ އޮޕަރޭޝަނަށްފަހު ހޮސްޕިޓަލުން ދޫކޮށްލިތާ ދެ ހަފުތާއެއްހާ ދުވަސް ފަހުންނެވެ.

މަަރަޑޯނާގެ މަރުވިތާ ކުޑައިރުކޮޅެއްގެ ތެރޭ ނާޕޮލީގެ ރައީސް އައުރޭލިއޯ ޑި ލޯރެންޓިސް ވަނީ މަރަޑޯނާއަށް ހާއްސަކޮށް ސްޓޭޑިއަމުގެ ނަން ބަދަލުކުރަން ބޭނުންވާ ކަމަށް ވިދާޅުވެފައެވެ. އަދި އޭގެ ފަހުން ނޭޕްލްސްގެ މޭޔަރު ލުއީޖީ ޑީ މެޖިސްޓްރިސްވެސް ވަނީ އެކަމަށް އެ ތާއީދުކުރައްވާފައެވެ. އެއާއެކު ނޭޕްލްސް ސިޓީ ކައުންސިލުން ހުކުރު ދުވަހު ބޭއްވި ބައްދަލުވުމުގައި ހުރިހާ މެމްބަރެއްގެ އިއްތިފާގުން ވަނީ ނާޕޮލީގެ ސްޓޭޑިއަމް ކަމަށްވާ ސްޓޭޑިއޯ ސަން ޕައޮލޯގެ ނަން އެސްޓޭޑިއޯ ޑިއޭގޯ އަރްމަންޑޯ މަރަޑޯނާއަށް ބަދަލުކުރަން ނިންމާފައެވެ.

ނޭޕްލްސްގެ މޭޔަރު ކުރެއްވި ޓްވީޓެއްގައި ވިދާޅުވީ ފުޓުބޯޅައިގައި މަތީ ހަރުފަތަކަށް ނާޕޮލީ ގެނެސްދިނީ މަރަޑޯނާގެ ހުނަރުވެރިކަމުން ކަމަށާއި، އެހެންކަމުން އޭނާގެ ޝަރަފުގައި ސްޓޭޑިއަމުގެ ނަން ބަދަލުކުރަން ނިންމީ ކަމަށެވެ. އަދި މުޅި ނާޕޮލީ އަބަދުވެސް މަރަޑޯނާ ދެކެ ލޯބިވާނެ ކަމަށްވެސް ވަނީ ވިދާޅުވެފައެވެ.

ކުލަބު ކެރިއަރުގައި މަރަޑޯނާގެ އެންމެ ކާމިޔާބު ކުލަބަކީ ނާޕޮލީއެވެ. އެގޮތުން 1984 ވަނަ އަހަރު ބާސެލޯނާ ދޫކޮށް ދުނިޔޭގެ ރިކޯޑު އަގަކަށް ނާޕޮލީއަށް ބަދަލުވިއިރު، އޭނާ ވަނީ ނާޕޮލީއަށް ހަތް ސީޒަނުގައި ކުޅެދީފައެވެ. އަދި މަރަޑޯނާ ވަނީ އެ ޓީމާއެކު އިޓާލިއަން ލީގު ދެ ފަހަރު، އިޓާލިއަން ކަޕް އެއް ފަހަރު، ޔުއެފާ ކަޕް އެއް ފަހަރު އަދި އިޓާލިއަން ސުޕަ ކަޕް އެއް ފަހަރު ކާމިޔާބުކޮށްފައެވެ. އަދި މަރަޑޯނާ ވަނީ ނާޕޮލީއަށް ކުޅެދިން 188 މެޗުގައި 81 ލަނޑު ޖަހާފައެވެ.