ރަށުން ބޭރުގައި ރެއާލް މެޑްރިޑް ބަލިކޮށް، ބާސެލޯނާ އިން ލީގު ތާވަލްގެ ކުރީގައިވާ ފަރަގު ބޮޑުކޮށްފި އެވެ.

ސްޕެނިޝް ލީގުގައި ހޮނިހިރު ދުވަހު ރެއާލް މެޑްރިޑާއި ބާސެލޯނާ ބައްދަލު ކުރި މެޗު ބާސެލޯނާ ކާމިޔާބު ކުރީ ތިން ލަނޑު ސުން ލަނޑުންނެވެ.

ރެއާލްގެ ދަނޑު ސެންޓިއާގޯ ބާނަބޭއުގައި ކުޅުނު މިމެޗުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނިގެން ދިޔަ ނަމަވެސް، މެޗުގެ ފުރަތަމަ ހާފްގެ ކުޅުން ނިމިފައިވަނީ ދެ ޓީމުން ކުރެ ޓީމަކަށް ލަނޑެއް ނުޖެހި އެއްވަރު ވެގެންނެވެ.

އަނިޔާ އަށްފަހު ރެއާލްގެ ފޯވާޑް ކްރިސްޓިއާނޯ ރޮނާލްޑޯ މިމެޗުގެ ފުރަތަމަ 11 ގައި ހިމެނުނުއިރު، ވޭލްސްގެ ފޯވާޑް ގެރެތު ބޭލް ވަނީ ބަދަލު ކުޅުންތެރިޔެއްގެ ގޮތުގައި މެޗުގެ ފަހު ބައިގައި ކުޅެން ނިކުމެފައެވެ.

މެޗުގެ ދެވަނަ ހާފް  ފެށިގެން ނުވަވަނަ މިނިޓުގައި ސާޖީ ރޮބާޓޯ ހުރަސް ކޮށްދިން ބޯޅައަކުން ބާސެލޯނާ އަށް ކުރި ހޯދައިދިނީ އުރުގުއާއީގެ ފޯވާޑް ލުއިސް ސުއަރޭޒް އެވެ.

އޭގެ ދިހަ މިނިޓު ފަހުން ރެއާލްގެ ޕެނަލްޓީ އޭރިއާ ތެރެއިން ބޯޅައިގައި އަތްލުމާއި ގުޅިގެން ރެއާލްގެ ޑިފެންޑަރ ޑެނިއެލް ކަރްވަޚާލް އަށް ރަތް ކާޑު ދައްކާ ދަނޑުން ފޮނުވާލުމާއެކު، މެޗުގެ ބާކީ ބައި ރެއާލް ކުޅެފައި ވަނީ 10 ކުޅުންތެރިންނާއެކުގައެވެ. މިފައުލާއި ގުޅިގެން ލިބުނު ޕެނަލްޓީ ކާމިޔާބުކޮށް ބާސެލޯނާ އަށް ލީޑު ފުޅާކޮށްދިނީ އާޖެންޓީނާގެ ފޯވާޑް ލިއޮނެލް މެސީ އެވެ.

މިމެޗުގައި ބާސެލޯނާގެ ފަހު ލަނޑު، މެޗުގެ ފަހު ވަގުތުކޮޅުގެ ތެރޭގައި ޖަހައިދިނީ އެލެކްސް ވިޑާލް އެވެ. މިއީ މެސީ ދިން ބޯޅަ އަކުން ވިޑާލް ޖެހި ލަނޑެކެވެ.

މިމޮޅާއެކު ސްޕެނިޝް ލީގު ތާވަލްގެ ކުރީގައިވާ ބާސެލޯނާ އިން ވަނީ ތާވަލްގެ ދެވަނާގައިވާ އެތުލެޓިކޯ މެޑްރިޑާއި ދެމެދު އޮތް ފަރަގު ނުވަ ޕޮއިންޓަށް އިތުރު ކޮށްފައެވެ. މިސީޒަނުގައި ކުޅުނު އެއްވެސް މެޗަކުން ބާސެލޯނާ ބަލިވެފައިނުވާއިރު، ބާސާ ވަނީ ކުޅުނު 17 މެޗުގެ ތެރެއިން 14 މެޗުން މޮޅުވެ، ތިން މެޗު އެއްވަރު ކޮށްފައެވެ. ލީގުގައި ބާސެލޯނާ އަށް 45 ޕޮއިންޓް ލިބިފައިވާއިރު، ދެވަނާގައިވާ އެތުލެޓިކޯ މެޑްރިޑަށް ލިބިފައިވަނީ 36 ޕޮއިންޓެވެ.

ލީގުގައި ހުކުރު ދުވަހުގެރޭ އެތުލެޓިކޯ މެޑްރިޑް ރަށުން ބޭރުގައި އެސްޕަނިޔޯލް އާ ބައްދަލު ކުރި މެޗުން އެތުލެޓިކޯ ބަލިވީ އެއް ލަނޑު ސުން ލަނޑުންނެވެ.

މިމެޗުން ބަލިވި ރެއާލް މެޑްރިޑް އޮތީ 31 ޕޮއިންޓާއެކު ތާވަލްގެ ހަތަރުވަނާގައެވެ. ބާސެލޯނާ އަށް ވުރެ އެއް މެޗު މަދުން ކުޅެފައިވާ ރެއާލް މެޑްރިޑާއި ވާދަވެރި ބާސެލޯނާ އާދެމެދު 14 ޕޮއިންޓުގެ ފަރަގެއް އެބައޮތެވެ. ރެއާލް އާ އެއް އަދަދަކަށް މެޗު ކުޅެގެން 34 ޕޮއިންޓާއެކު ތާވަލްގެ ތިންވަނާގައި ވަނީ ވެލެންސިއާ އެވެ.

ސްޕެނިޝް ލީގުގައި ހޮނިހިރު ދުވަހުގެރޭ ކުޅޭ މެޗުތަކަށް ބަލާއިރު، އަމިއްލަ ދަނޑުގައި ވެލެންސިއާ ނުކުންނާނީ ވިޔަ ރެއާލް އާދެކޮޅަށެވެ. އަދި އަމިއްލަ ދަނޑުގައި ޑިޕޯޓިވޯ ލަ ކޮރޫނާ ނުކުންނާނީ ސެލްޓަ ވީގޯ އާދެކޮޅަށެވެ.