އެމްބާޕޭއާ ގުޅޭ ގޮތުން ސުވާލު ކުރިޔަސް ހެޔޮ، ޖަވާބެއް ނުދޭނަން: އަންޗެލޮޓީ

ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭއާ ގުޅޭ ގޮތުން ސުވާލު ކުރި ނަމަވެސް، ޖަވާބު ނުދޭނެ ކަމަށް ރެއާލް މެޑްރިޑުގެ ކޯޗު ކާލޯ އަންޗެލޮޓީ ބުނެފި އެވެ.

އެއްބަސްވުން އައު ކުރުމަށް ދެކޮޅު ހެދުމުން އެމްބާޕޭއާ ޕީއެސްޖީއާ ދެމެދު ވަނީ މައްސަލަ ޖެހިފަ އެވެ. އެކަމުގެ ތެރެއިން ޕީއެސްޖީގެ ރައީސް ނާސިރު އެލް ޚެއްލާފީ ވިދާޅުވީ، ކުރިއަށް އޮތް ސީޒަނުގައި އެ ކުލަބަށް ކުޅެން ބޭނުންވާނަމަ، އެމްބާޕޭ އަށް ޖެހޭނީ އެއްބަސްވުން އައު ކުރާށެވެ. އެހެން ނޫންނަމަ، މިހާރުގެ އެއްބަސްވުމުގެ މުއްދަތު ހަަމަވުމުގެ ކުރިން އެހެން ކުލަބެއް ހޯދުމަށް ވެސް ވަނީ އެދިފަ އެވެ. ޕީއެސްޖީ އާއެކު އެމްބާޕޭ ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެެވެ. އެހެންކަމުން އޭނާ ބޭނުންވަނީ އެއްބަސްވުން ހަމަވުމުން ކުލަބު ދޫކޮށްލުމަށެވެ. ނަމަވެސް ހިލޭ ޓްރާންސްފާއެއްގައި އެމްބާޕޭ ދޫކޮށްލަން ޖެހުމަކީ ޕީއެސްޖީ އަށް ބޮޑު ގެއްލުމަކަށްވާއިރު، ކުލަބުން އެ ގޮތެއް ބޭނުމެއް ނުވެއެވެ.

އެމްބާޕޭ ރެއާލަށް ގުޅެން އުޅޭ ކަމުގެ އަޑުތައް ފެތުރެމުން ދަނިކޮށް ނޫސްވެރިޔަކު ކުރި ސުވާލަށް ޖަވާބު ދެމުން އަންޗެލޮޓީ ބުނީ، އެމްބާޕޭގެ ސުވާލު ކުރިޔަސް އެއްވެސް މައްސަލައެއް ނެތް ކަމަށެވެ. ނަމަވެސް އޭގެ ސުވާލަކަށް ޖަވާބު ނުދޭނެ ކަމަށް އޭނާ ވަނީ ބުނެފަ އެވެ. އަންޗެލޮޓީ ބުނީ އެހެން ކުލަބެއްގެ އެއްބަސްވުމެއްގައި ހުރި ކުޅުންތެރިޔެއްގެ ވާހަކަ ދެއްކުމަކީ މަސްލަހަތަށް ބަލާއިރު ވެސް އެންމެ ރަނގަޅު ގޮތް ނޫން ކަމަށެވެ. މިވަގުތު އޮތް ސްކޮޑާމެދު ހިތްހަމަ ޖެހޭކަން ފާހަގަކޮށް އަންޗެލޮޓީ ބުނީ، ހުރިހާ ވިސްނުމެއް ހުރީ ކުރިއަށް އޮތް ސީޒަނަށް ތައްޔާރުވުމަށެވެ.

މީގެ ކުރިން ވެސް އެމްބާޕޭ ވަނީ ރެއާލަށް ބަދަލުވާން މަޝްވަރާތައް ކޮށްފަ އެވެ. ނަމަވެސް ފަހު ވަގުތު ޕީއެސްޖީން ލިބުނު ބޮޑު ހުށަހެޅުމާއެކު އޭނާ ވަނީ އެ ކުލަބުގެ އެއްބަސްވުން އައު ކޮށްފަ އެވެ. އެމްބާޕޭ ޕީއެސްޖީގައި ހުންނަން ބޭނުންނުވާ ކަމުގެ އަޑުތައް ގަދަވި ވަގުތެއްގައި ރެއާލްގެ ރައީސް ފްލޮރެންޓީނޯ ޕެރޭޒް ވިދާޅުވީ އެ ކުލަބުން އެމްބާޕޭ ގެންނާނެ ކަމަށެވެ. ނަމަވެސް އެއީ މިއަހަރުގައި ނޫން ކަމަށް އޭރު އޭނާ ވަނީ ވިދާޅުވެފަ އެވެ.