ޔުނައިޓެޑް ޖޯޒީގައި އިބްރާހިމޮވިޗް ފެންނާނެކަމާ މެދު ސުވާލު އުފެދިއްޖެ

މެންޗެސްޓާ ޔުނައިޓެޑް ޖޯޒީގައި އެޓީމަށް ކުޅެމުން އަންނަ ސްވިޑެންގެ ކުރީގެ ކެޕްޓަން ޒްލަޓަން އިބްރާހިމޮވިޗް ފެންނާނެ ކަމާމެދު ސުވާލު އުފެދިއްޖެ އެވެ.

ރިޕޯޓްތައް ބުނާގޮތުން މި ސީޒަނުގެ ނިޔަލަށް ޔުނައިޓެޑާއެކު އެއްބަސްވުން ހަދާފައިވާ އިބްރާހޮމޮވިޗް މިހާރު އަނިޔާގައި ހުރިއިރު، އޭނާ އަނިޔާއިން ސަލާމަތްވާނީ މި ސީޒަނަށްފަހު ކަން މިހާރު ވަނީ ކަށަވަރުވެފައެވެ.

އެގޮތުން ރިޕޯޓްތައް ބުނާގޮތުން ކުރިޔަށް އޮތް ސީޒަނުގައި އޭނާ ފެނިގެންދާނީ އެހެން ކްލަބަކުންނެވެ. މީގެއިތުރުން އޭނާއާއެކު ޔުނައިޓެޑަށް އަދިވެސް އެއްބަސްވުމަކާ ހިސާބަށް ނާދެވޭކަމަށް ރިޕޯޓްތައް ބުނެއެވެ.

އިބްރާހިމޮވިޗް ވަނީ ޕެރިސް ސެއިންޓް ޖާމަން (ޕީއެސްޖީ) ދޫކޮށްލުމަށް ފަހު، މި ސީޒަނުގައި ޔުނައިޓެޑަށް ބަދަލުވެ އެޓީމުގައި މޮޅު ކުޅުމެއް ދައްކާފައެވެ. އެގޮތުން އޭނާ ވަނީ މިހާތަނަށް ހުރިހާ މުބާރާތެއްގައި އެޓީމަށް ޖުމްލަ 28 ލަނޑު ކާމިޔާބުކޮށްދީފައެވެ.

އިބްރާހިމޮވިޗް ހޯދަން ދުނިޔޭގެ ނަން މަޝްހޫރު ގިނަ ކްލަބްތަކުން މަސައްކަތް ކުރަމުން އަންނައިރު، ޔުނައިޓެޑުން އަންނަނީ އޭނާ އިތުރު އަހަރަކު ކްލަބުގައި ބެހެއްޓުމަށް މަސައްކަތްކުރަމުން ކަމަށް ރިޕޯޓްތައް ބުނެއެވެ.