ކޮންމެ މެޗަކަށްވެސް ނިކުންނާނީ އިދިކޮޅު ޓީމަކީ އެންމެ މޮޅު ޓީމު ކަމަށް ދެކިގެން: މިލޯ

މާޒިޔާ ސްޕޯޓްސް އެންޑް ރެކްރިއޭޝަނުން ކޮންމެ މެޗަކަށްވެސް ނިކުންނާނީ އިދިކޮޅު ޓީމަކީ އެންމެ މޮޅު ޓީމުކަމަށް ދެކިގެން ކަމަށް އެ ޓީމުގެ ކޯޗު މިލޮމީރް ސެސްލިޖާ (މިލޯ) ބުނެފިއެވެ.

ކްލަބް ވެލެންސިއާ އާ ދެކޮޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން މިލޯ ބުނީ، ތާވަލުގެ ފުލުގައި ވެލެންސިއާ އޮތްނަމަވެސް، އެ ޓީމާ ދެކޮޅަށް ކުޅޭނީ އެންމެ މޮޅު ޓިމުކަމަށް ދެކިގެން ކަމަށެވެ. އެފަދަ ޓީމަކާ ދެކޮޅަށް ފަސޭހަކޮށްފިނަމަ، ފަހުން އީގަލްސް ފަދަ ޓީމަކާ ދެކޮޅަށް ކުޅެން އުނދަގު ވާނެކަމަށް އޭނާ ބުންޏެވެ.

މިލޯ ވަނީ ވެލެންސިއާގެ ޒުވާން ޓީމަށްވެސް ތައުރީފްކޮށްފައެވެ. އޭނާ ބުނީ ވެލެންސިއާގައި ކުޅޭ ޒުވާން ކުޅުންތެރިންނަކީ ވަރަށް ހުނަރުވެރި ކުޅުންތެރިންތަކެއް ކަމަށެވެ. އަދި އެ ކުޅުންތެރިންނަކީ މި ގައުމުގެ މުސްތަގުބަލު ކަމަށްވެސް އޭނާ ބުންޏެވެ. މިލޯ އިތުރަށް ބުނީ، މިހާރު އެ ޓީމު ބަލިވިނަމަވެސް، ކުރިޔަށް އޮތްތަނުގައި ރަނގަޅުވާނެ ކަމަށެވެ.

މިލޯ ބުނީ މާޒިޔާ އަބަދުވެސް މަސައްކަތް ކުރާނީ މެޗަކަށްވުރެ މެޗެއް ރަނގަޅު ކުރުމަށް ކަމަށެވެ. ޓީމުގައި ހުނަރުވެރި ގިނަ ކުޅުންތެރިންތަކެއް ތިބިނަމަވެސް، އަދިވެސް އެ ކުޅުންތެރިންގެ އެންމެ މޮޅު ކުޅުން ނުފެންނަ ކަމަށެވެ. އަދި ދަނޑުމަތީގައި ގިނައިން ވާހަކަ ދައްކައިގެން ބޮޑަށް އޯގަނައިޒް ކުރެވޭނެކަމަށް އޭނާ ބުންޏެވެ. މީގެއިތުރުން މިލޯ ބުނީ، މިހާރު ބޮޑަށް މަސައްކަތް ކުރަނީ ވަކިވަކި ކުޅުންތެރިންނަށް ހެދޭ ގޯސްތައް ރަނގަޅު ކުރުވަން ކަމަށެވެ. އަދި މިފަދަ ގޯސްތައް ގިނަވާވަރަކަށް، ޓީމަށް ލިބޭ ގެއްލުން ބޮޑުވާނެކަމަށް އޭނާ ބުންޏެވެ.

ދިވެހި ޕްރިމިއަރ ލީގުގައި ކޮންމެ ޓީމެއްވެސް ފަސް މެޗު ކުޅެފައިވާއިރު، މާޒިޔާ އެއްވަނައިގައި އޮތީ ކުޅުނު ހުރިހާ މެޗަކުން މޮޅުވެ 15 ޕޮއިންޓާއެކުއެވެ. މި ސީޒަނުގައި މިހާތަނަށް ޕޮއިންޓެއް ނުލިބޭ ހަމައެކަނި ޓީމަކީ ވެލެންސިއާ އެވެ. މި ދެ ޓީމު ބައްދަލުކުރާ މެޗު ކުޅޭނީ ހޮނިހިރު ދުވަހު ހަވީރު 16:00 ގައެވެ.