ޕާކިސްތާން ކްރިކެޓް ޓީމުގެ ކޮންމެ ކުޅުންތެރިއަކަށް އެއް ކަރޯޑް ރުޕީސް ދެއްވަން ބޮޑުވަޒީރު ނިންމަވައިފި

އައިސީސީ ޗެމްޕިއަންސް ޓޮރޮފީ ކާމިޔާބުކުރި ޕާކިސްތާން ކްރިކެޓް ޓީމުގެ ކޮންމެ ކުޅުންތެރިއަކަށް އެއް ކަރޯޑް ރުޕީސް ދިނުމަށް އެގައުމުގެ ޕްރައިމް މިނިސްޓަރު ނަވާޒް ޝަރީފް ނިންމަވައިފިއެވެ.

އާދީއްތަ ދުވަހު ކުޅުނު ފައިނަލް މެޗު ވަރުގަދަ އިންޑިއާއާ ވާދަކޮށް ޕާކިސްތާނުން މެޗު ކާމިޔާބުކުރީ 180 ލަނޑުންނެވެ. މުބާރާތުގައި ވާދަކުރި އެންމެ ދަށަށް ރޭންކުކޮށްފައިވާ ޕާކިސްތާން ހޯދި މި ކާމިޔާބީއަކީ އެތައް އަހަރުތަކަށްފަހު އެޓީމަށް ލިބުނު ކާމިޔާބީއެކެވެ.

ޕާކިސްތާން ކްރިކެޓް ޓީމު ހޯދި ކާމިޔާބީއާއެކު އެނބުރި ގައުމަށް ގޮސްފައިވާއިރު، އެތައް ހާސް މީހުންނެއް ވަނީ މަގުތަކަށް ނިކުމެ އެޓީމަށް މަރުހަބާ ކިޔާފައެވެ.

ސަޕޯޓަރުންނާ ވާހަކަދައްކަމުން ޕާކިސްތާންގެ ކެޕްޓަން ޝަފްރާޒް އަހުމަދު ބުނީ މިއީ ގައުމަށް ލިބުނު ބޮޑު ކާމިޔާބީއެއް ކަމަށާއި، ހުރިހާ ޝުކުރެއްވެސް އޭނާ އަދާކުރަން ބޭނުންވަނީ ހެއްދެވި ފަރާތަށްކަމަށެވެ.

ސެމީ ފައިނަލުގައި ޕާކިސްތާނުން ވަނީ މުބާރާތް ބާއްވާ ގައުމު އަދި ޓްރޮފީ ހޯދާނެކަމަށް އެންމެ ބޮޑަށް ބެލެވުނު އިންގެލޭންޑް ބަލިކޮށްފައެވެ. ޝަފްރާޒް ބުނީ ކުޅުންތެރިން މުޅި މުބާރާތުގައިވެސް އާދަޔާ ހިލާފު މޮޅު ކުޅުމެއް ދައްކާފައިވާ ކަމަށާއި، މިއީ ޕާކިސްތާންގެ ކްރިކެޓް އަލުން ކޮޅަށް ޖަހަން ލިބުނު ފުރުސަތެއް ކަމަށެވެ.