އެސްޓީއޯ މާލެ ލީގުގައި އާދިއްތަ ދުވަހު އީގަލްސް އާއި ދެކޮޅަށް ކުޅޭ މެޗަށް ނިކުންނާނީ ފައިނަލެއްގެ ގޮތުގައި ދެކިގެން ކަމަށް ގްރީން ސްޓްރީޓުގެ ކޯޗް ސޮބާހް މުހަންމަދު (ސޮބާ) ބުނެފިއެވެ.

ހޮނިހިރު ދުވަހު އެފްއޭއެމް ހައުސްގައި ބޭއްވި ޕްރީ މެޗް ޕްރެސްގައި ވާހަކަ ދައްކަމުން ސޮބާ ބުނީ، އަމާޒަކީ އީގަލްސް އަތުން 3 ޕޮއިންޓު ހޯދުން ކަމަށާ، ލީގުގައި ކޮންމެ މެޗަކީވެސް ގްރީން ސްޓްރީޓަށް ފަސޭހަކޮށް ލެވޭނެ މެޗެއް ނޫން ކަމަށެވެ. އެގޮތުން ލީގުގައި އެޓީމުގެ އަމާޒު ކަމަށްވާ، ދަގަ 4 ގެ ޖާގަ ކަށަވަރު ކުރުމަށްޓަކައި އީގަލްސް އަދި ޓީސީ އަތުންވެސް މަދުވެގެން ޕޮއިންޓެއް ހޯދުން ވަރަށް މުހިންމު ކަމަށް ސޮބާ ބުންޏެވެ. އެގޮތުން އީގަލްސް އާއި ދެކޮޅަށް ކުޅޭ މެޗުގައި ފުރަތަމަ ސިކުންތުން ފަށައިގެން ފަހު ސިކުންތާ ޖެހެންދެންވެސް އެއްވެސް ވަރެއްގެ ދުލެއް ނުދޭނެ ކަމަށް ސޮބާ ވަނީ ބުނެފައެވެ.

ސޮބާ ވަނީ، އީގަލްސްގެ ކޮޗު ސާންތި އެޓީމާއެކު 5 އަހަރު ހޭދަކޮށްފައި ވުމުން އެއީ އެޓީމަށާއި އޭނާއަށް ލިބޭނެ ފައިދާއެއް ކަމަށް ފާހަގަ ކޮށްފައެވެ. އެއާ ހިލާފަށް ގްރީން ސްޓްރީޓާއެކު މާގިނަ ދުވަސްތަކެއް ސޮބާއަށް އޭދަ ކުރެވިފައި ނެތުމާއި، ޓީމުގައި އޮތީ ވަރަށް އާދައިގެ ސްކޮޑެއްކަމުން އީގަލްސް އާއި ދެކޮޅަށް ކުޅޭ މެޗު އެއްގޮތަކަށްވެސް ފަސޭހަ ނުވާނެ ކަމަށް ސޮބާ ވަނީ ބުނެފަ އެވެ.

އިތުރަށް ވާހަކަ ދައްކަމުން ސޮބާ ބުނީ މި މެޗަކީ ހުރިހާ ގޮތަކުންވެސް އޭނާއަށް ވަރަށް ހާއްސަ މެޗެއް ކަމަށާއި، އޭނާގެ ކޯޗިން ކެރިއަރުގައި ސާންތި އާއި ދެކޮޅަށް މުހިންމު މެޗެއްގައި ނިކުންނަން ޖެހުމުން އުފާކުރާ ކަމަށެވެ. ސޮބާ ބުނީ އޭނާގެ ފުޓުބޯޅަ ކެރިއަރުގައި އެންމެ ފުރަތަމަ ހާސިލު ކުރެވުނު ކާމިޔާބީތަކުގެ ފަހަތުގައިވެސް ސާންތި ކޯޗުގެ ހިއްސާ ވަރަށް ބޮޑު ކަމަށާ އެހެންކަމުން މި މެޗަކީ އޭނާއަށް ވަރަށް ހާއްސަ މެޗަކަށް ވެގެން ދާނެ ކަމަށެވެ.

ސޮބާ ބުނެފައިވަނީ އީގަލްސް އަކީ ހުރިހާ ގޮތަކުންވެސް އޭނައާ ގުޅިފައިވާ ޓީމެއް ކަމަށާއި، ޓޮޕް ލެވެލް ފުޓުބޯޅަ އަށް އޭނާ ނިކުތް ތަނަކީ އެއީ ކަމަށެވެ. އަދި އެހެން ޓީމުތަކަށް އޭނާ ފެނިގެން ދިޔަ ތަނަކީ އީގަލްސް ކަމާށާ އެހެންކަމުން އިދިކޮޅު ޓީމެއް ގޮތުގައި އީގަލްސް އޮތްކަމުގައި ވިޔަސް އަބަދުވެސް އޭނާ އީގަލްސްއަށް އިހުތިރާމު ކުރާނެ ކަމަށް ސޮބާ ބުންޏެވެ.

މާލެ ލީގު ތާވަލަށް ބަލާއިރު އީގަލްސް އާއި ގްރީން ސްޓްރީޓްވެސް އޮތީ ޕޮއިންޓުގެ ގޮތުން ހަމަހަމަ ކޮށެވެ. ލީގުގައި މިހާތަނަށް މި ދެޓީމުވެސް 4 މެޗު ކުޅެފައި ވާއިރު ދެޓީމަށްވެސް ލިބިފައިވަނީ 7 ޕޮއިންޓެވެ. ނަމަވެސް ފައިދާ ގޯލުގެ ތަފާތުން އީގަލްސް އޮތީ ތާވަލުގެ 4 ވަނައިގައެވެ. ގްރީން ސްޓްރީޓަށް ލިބެނީ 5 ވަނައެވެ. އެހެންކަމުން ގަދަ 4 ހޯދުމަށް މަސައްކަތް ކުރަމުން އަންނަ މި ދެޓީމަށްވެސް އާދިއްތަ ދުވަހުގެ މެޗު ވަރަށް މުހިންމު ވެގެން ދާނެއެވެ.