"މިނިވަން އުފާ" ކާނިވަލަށް ގޮސްގެން ބާލީ އަށް ދިއުމުގެ ފުރުސަތު!
28 ޖުލައި 2023 | ހުކުރު 08:40މިނިވަން އުފާ ކާނިވާ ކުރިއަށް ދާނީ އަންނަ ބުރާސްފަތިދުވަހުގެ ނިޔަލަށް
"މިނިވަން އުފާ" ކާނިވާ
މިނިވަން ދުވަހުގެ ހާއްސަ ހަރަކާތްތަކުގެ ތެރޭގައި ހިމެނޭ "މިނިވަން އުފާ ކާނިވާ" ކާނިވަލްގައި ބައިވެރިވެގެން ބާލީ އަށް ދިއުމުގެ ފުރުސަތު އޮތް ކަމަށް އެ ކާނިވާ އިންތިޒާމް ކުރާ ހޯމް މިނިސްޓްރީއާއި އަރބަންކޯ އިން ބުނެފިއެވެ.
މި ކާނިވަލަށް ޒިޔާރަތްކުރާ ފަރާތްތަކުގެ ތެރެއިން ގުރުއަތުން ހޮވޭ ފަރާތަކަށް ހަދިޔާއެއްގެ ގޮތުން އިތުރު މީހަކާއެކު އިންޑޮނޭޝިޔާގެ ބާލީއަށް 7 ދުވަހުގެ ދަތުރެއް ލިބިގެންދާނެއެވެ.
ތަފާތު އެތައް ހަރަކާތެއް ހިމެނޭ ގޮތަށް ބާއްވާ މި ކާނިވަލަކީ ރާއްޖޭގައި މިހާތަނަށް ބާއްވާ އެންމެ ބޮޑު ހަރަކާތްކަމަށް ވާއިރު މިއީ ހުރިހާ އުމުރުފުރައެއްގެ މީހުންނަށް ބައިވެރިވެވޭގޮތަށް ކުރިއަށްގެންދާ ކާނިވަލްއެކެވެ. ކާނިވަލްގެ ހަރަކާތްތަކުގެ ތެރޭގައި ކުޅިވަރުގެ ގިނަ ހަރަކާތްތައް ވެސް ހިމެނެއެވެ. އެ ކާނިވަލްގައި ކުރިއަށް ގެންދިއުމަށް ހަމަޖެހިފައިވާ ހަރަކާތްތަކުގެ ތެރޭގައި ރާއްޖޭގައި މިހާތަނަށް ބާއްވާ ފުރަތަމަ ޑްރޯން ޝޯވ ފާހަގަކޮށްލެވެއެވެ.
މީގެ އިތުރުން ރެޑްބުލްއާއި ގުޅިގެން ބާއްވާ ޕެރަ މޮޓޯގެ ހަރަކާތްތަކާއި ހަވާ އެރުމުގެ ހަރަކާތްތައް ވެސް ބޭއްވުމަށް ވަނީ ހަމަޖެހިފައެވެ. ދިވެހި އަދި ބޭރު ފަންނާނުންގެ ހުށަހެޅުންތައް މި ފެސްޓިވަލްގައި ދައްކާލުމަށް ހަމަޖެހިފައިވާއިރު އޭގެ ތެރޭގައި ސަޤާފީ ނެށުމާއި، އެކްރޮބެޓްސްް އަދި ޖަގްލަރސް ހިމެނެއެވެ. އަދި ކާބޯތަކެތީގެ ސްޓޯލްތަކާއި، ބިރުވެރި ހޮހޮޅަ، ކަރޯކޭ ބޮކްސް، ފްލޯޓް ޕާރކް، ލެއިޒަރ ޕާރކް ފަދަ ހަރަކާތްތައް މި ކާނިވަލް އިން ފެންނަން ހުންނާނެއެވެ.
މިނިވަން އުފާ ކާނިވާ ކުރިއަށް ދާނީ އަންނަ ބުރާސްފަތިދުވަހުގެ ނިޔަލަށެވެ.
