ފިނޭ ބަނދަރުގެ އަމަލީ މަސައްކަތް އޯގަސްޓު މަހުގެ ތެރޭގައި ފަށަނީ

ހދ. ފިނޭ ބަނދަރުގެ އަމަލީ މަސައްކަތް އޯގަސްޓު މަހުގެ ތެރޭގައި ފެށޭނެކަމަށް، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.

އެރަށުގައި މަސައްކަތްތައް ކުރިއަށްދާ ގޮތް ބައްލަވާލެއްވުމަށްފަހު މީޑިއާތަކަށް މައުލޫމާތު ދެއްވަމުން އާޒިމް ވިދާޅުވީ، ފިނޭ ބަނދަރުގެ މަސައްކަތަކީ ވަރަށް ބޮޑު މަޝްރޫއެއްކަމަށާއި، ގާތްގަނޑަކަށް 44.5 މިލިއަން ރުފިޔާ ޚަރަދުވާނެ ކަމަށް ބެލެވޭ ކަމަށެވެ.

އާޒިމް ވިދާޅުވީ މިހާރު ކުރިއަށްދަނީ އެންވަރަޔަމެންޓް އިމްޕެކްޓް އެސެސްމެންޓް (އީއައިއޭ)ގެ މަސައްކަތް ކަމަށާއި، އެމަސައްކަތް ކުރާ ކުންފުނިން، ޖުލައި މަހުގެ ތެރޭގައި އީއައިއޭގެ މަސައްކަތް ނިމޭނެ ކަމަށް އަންގާފައިވާކަމަށެވެ. އަދި ވިދާޅުވީ އީއައިއޭގެ މަސައްކަތް ނިންމައި، ދެ ހަފުތާތެރޭގައި ބަނދަރުގެ އަމަލީ މަސައްކަތް ފެށޭނެކަމަށާއި އޯގަސްޓް މަހުގެ ތެރޭގައި ކުރިއަށްދާނެ ކަމަށެވެ.

މީގެ އިތުރުން އާޒިމް ވިދާޅުވީ ބަނދަރުގެ ޑިޒައިނަށް އިތުރު ބަދަލެއް ނުގެންނަ ކަމަށްވާނަމަ، އަމަލީ މަސައްކަތް ފަށާތާ 18 މަސް ދުވަހުގެތެރޭގައި މަސައްކަތް ނިންމައި ރައްޔިތުންނާ ހަވާލުކުރާނެ ކަމަށެވެ.

ފިނޭގައި މިހާރު ބޭނުންކުރާ ބަނދަރަކީ ވަރަށް ކުޑަ ބަނދަރެކެވެ. އެމްޓީސީސީއާ ހަވާލުކޮށްފައިވަނީ ފިނޭގައި 248 މީޓަރުގެ ބަނދަރެއް ހެދުމަށެވެ.

މިމަޝްރޫއުގެ ދަށުން ބަނދަރުގައި 219 މީޓަރުގެ ބޭރުތޮށި ލުމާއި، ރިވެޓްމަންޓްޖެހުމާއި، ހާާބަރ ޕޭވްމަންޓް ހެދުމާއި، ނެރުބައްތިއާއި ބަނދަރު ބައްތި ހަރުކުރުމުގެ މަސައްކަތް ހިމެނެއެވެ. އަދި ހައި ސްޕީޑް ފެރީ ނެޓްވޯރކަށް ބޭނުންވާ އެކްސެސް ޕްލެޓްފޯރމެއްވެސް ބަނދަރުގައި ހެދުމަށްވެސް މި މަޝްރޫއުގެ ދަށުން ވަނީ ހަވާލުކޮށްފައެވެ.