ރިޔާސީ އިންތިހާބުގެ ލިސްޓަށް ބައެއް ކަންކަން އިތުރުކޮށްދެއްވާ ރައީސް ވިދާޅުވީ މާޅޮހުގައި ހުރިހާކަމެއްވެސް ވާނެ ކަމަށް. އެކަމަކު އަމަލީ މަސައްކަތް ފެށި އެއްވެސް ޕްރޮޖެކްޓެއް އަދިއެއް ނެތް!
މާޅޮހަށް ކޮށްދޭން ވެފައިވާ ހުރިހާ ކަމެއްވެސް ވާނެ
ރައީސް ޑރ. މުހައްމަދު މުއިއްޒު ބ. މާޅޮހު ރައްޔިތުންނާއި ބައްދަލުކުރައްވާ ވާހަކަފުޅުދައްކަވަނީ
ސަރުކާރަށް ދޮޅު އަހަރަށްވުރެ ގިނަ ދުވަސްވެގެން ދިޔަ އިރުވެސް ތަރައްގީގެ މަސައްކަތެއް ފަށާފައި ނުވާއިރު ބ. މާޅޮހަށް ކޮށްދެއްވަން ވެވަޑައިގެންނެވި ހުރިހާ ކަމެއްވެސް ވާނެ ކަމަށް ރައީސް ޑރ. މުހައްމަދު މުއިއްޒު ރައްޔިތުން ގާތު ވިދާޅުވެއްޖެއެވެ.
ބ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ބ. މާޅޮހަށް ވަޑައިގެން ރައްޔިތުންނާއި ބައްދަލުކުރައްވާ ރައީސް މުއިއްޒު ވިދާޅުވީ ރިޔާސީ އިންތިޚާބުގައި މާޅޮހަށް ވަޑައިގެން ދަތިވެފައިވާ އަދި މުހިންމު ވަރަށް ގިނަ ކަންކަމުގައި، އެ ކަންކަން ކޮށްދެއްވާނެކަމަށް ވިދާޅުވި ކަމަށެވެ. އަދި އިރާދަކުރެއްވިއްޔާ، މި ސަރުކާރުން އެ ވަޢުދުތައް ފުއްދައިދިނުމުގައި ވަރަށް ތެދުވެރިކަމާއި، އަމާންނާތްތެރިކަމާ އެކީގައި، އިޚްލާޞްތެރިކަމާ އެކީގައި، މަސައްކަތްތައް ކުރަމުން ގެންދަވާނެކަމަށް ރައީސް ވިދާޅުވިއެވެ. ރައީސް ވިދާޅުވީ މިހާރުވެސް އެގޮތަށް ގެންދަވާ ކަމަށެވެ. އަދި ކުރިއަށް އޮތް ތަނުގައިވެސް އިރާދަކުރެއްވިއްޔާ އެގޮތަށް ދާނެ ކަމަށާއި، ބަނދަރުގެ މަޝްރޫޢަކީ، އެގޮތުން އެންމެ އިސްކަމެއް ދީގެން، ބޮޑު މައްސަލައެއްގެ ގޮތުގައި ޙައްލުކުރާނެ ކަމަށް ދެންނެވި އެއް މައްސަލަ ކަމަށް ރައީސް ވިދާޅުވިއެވެ.
މާޅޮހު ބަނދަރުގެ މަސައްކަތް އެމްޓީސީސީއާއި ހަވާލުކުރީ މާޗް 1 2023 ގައެވެ. އަދި އެއިރު އެމްޓީސީސީއިން ބުނެފައި އޮތީ 18 މަސް ދުވަހުގެ ތެރޭގައި މަސައްކަތް ނިމޭނެ ކަމަށެވެ. ނަމަވެސް ވެރިކަން ބަދަލުވި އިރު މަސައްކަތް ފެށިފައި އޮތްނަމަވެސް މި ސަރުކާރަށް ދެ އަހަރު ވާއިރުވެސް ބަނދަރުގެ މަސައްކަތް ނުނިމެއެވެ.
މިކަން މިހާރު އެބަ ކުރިއަށް ގެންދެވޭ. މިހާރު މި ދާ ސްޕީޑު އިރާދަކުރެއްވިއްޔާ އަދި އިތުރަށް ބާރުކުރެވޭނެ. ބޮޑުހިލަ ހޯދުމުގެ މަރުޙަލާގައި، ވަރަށް ގިނަ ކަންތައްތައް އެބަހުރި. ވަރަށް ގިނަ މަސައްކަތްތައް އެބަހުރި. މި ރަށުގައި އާއި އަދި ބައެއް ވަރަށް ގިނަ އެހެން ރަށްތަކުގައި. ސަރުކާރުން މިހާރު ބަނދަރާއި، ބޭރު، ތޮށްޓާއި، އެއް ގަމުތޮށި، ދެން މިހެންގޮސް ބޮޑުހިލަ ޖަހަންޖެހޭ، ރަށް ގިރުމުގެ މައްސަލަ ޙައްލުކުރުމާ ގުޅޭ، ބޮޑުހިލައާ ގުޅިފައި ހުރި ވަރަށް ގިނަ މަޝްރޫޢުތައް ކުރިއަށް ގެންދިޔުމަށް، ވަރަށް މުހިންމު، ވަރަށް ގިނަ ކަންތައްތަކެއް. ފައިސާއާ ގުޅިފައި ހުރި ކަމެއްވީމަ، މިހާރު އެކަމަށް ގިނަ ވަގުތު ނަގާ، މިހާރު އެކަމުގައި ކުރިއަށް ދެވޭނެ މަގުތަކެކޭ ހަމަޖައްސާފައި އޮތް އޮންނާނީ. އެކަން ވަރަށް ފަހުން އަޅުގަނޑުމެންނަށް ވަނީ ހަމަޖެއްސިފައި. އެހެންވީމާ، މި ރަށުގެ މަޝްރޫޢުވެސް ދާދީ އަވަހަށް ސްޕީޑް ގެއިން ކުރާނެ، އަވަސްވާނެ. އެ މަޝްރޫޢު، ބަނދަރުގެ މަޝްރޫޢު މި ދެންނެވި ގޮތަށް ހިނގަމުންދާނެ، ބާރު ސްޕީޑުގައި.ރައީސް ޑރ. މުހައްމަދު މުއިއްޒު
ރައީސް ވާހަކަފުޅުގައި ރައްޔިތުންނަށް ދެއްވި މެސެޖަކީ ބޮޑު ހިލަ ނުލިބޭތީ ތަރައްގީގެ އެހެން މަސައްކަތެއް ނުފެށޭ ކަމަށެވެ. ހުރިހާކަމެއްވެސް ގުޅިފައިވަނީ އެކަމާއި ކަމަށް ދޭހަވާ މޭރުމަކުން ރައީސް ވާހާކަފުޅު ދެއްކެވިއެވެ. ރައީސް ވިދާޅުވީ ރަށް ގިރުމުގެ މައްސަލަ ޙައްލުކުރުމަށްޓަކައި ކުރަންޖެހޭ ކަންކަންވެސް ބޮޑުހިލައާ ގުޅިފައިވާ ކަމަށެވެ. އެހެންކަމުން ބަނދަރުގެ މަޝްރޫޢު ނިމެންވާއިރަށް، އެ މަޝްރޫޢު ފެށުމަށްޓަކައި ތައްޔާރު ވަމުންދާ ކަމަށާއި، ބަނދަރާ ގުޅިގެން، ބަނދަރުގެ މަސައްކަތް ހިނގާއިރުގައި، އިތުރުކުރެވޭ ޖާގައަށް، އިންޖީނުގެ ރީލޮކޭޓް ކޮށް، އެ ބަދަލުކުރުމަކީ ނިންމާފައި އޮތް ކަމެއް ކަމަށެވެ.
އެހެންވީމާ، މިހިރީ ގުޅިލާމެހިފައި ހުރި ކަންކަން މި މަސައްކަތްތައް މިގޮތަށް އިރާދަކުރެއްވިއްޔާ ކުރިއަށް ގެންދަން ނިންމާފައި މިއޮތީ. ދެން އިންޖީނުގެ ރީލޮކޭޓް ކުރުމާއި، މި ހުރިހާ ކަމަކާ ގުޅިފައި މިހިރީ. މި ރަށުގެ ފުޓްސަލް ދަނޑުގެ ސައިޒު ވެސް ތަންކޮޅެއް ކުޑަ. ބޮޑުކުރެވެން އޮތީވެސް މި ހުރިހާ ކަމަކާ ގުޅިލާމެހިފައި އޮތީމަ، އެކުއެކީގައި ހިނގާކަށް. އެހެންވީމާ، ބޮޑު ފުޓްބޯޅަ ދަނޑު އެއީ، އަޅުގަނޑު ވަޢުދުވީ ކަމެއް. ބޮޑު ފުޓްބޯޅަ ދަނޑުގެ މަސައްކަތް މިހާރު އެއޮތީ ފަށާފައި. އަޅުގަނޑުމެން މަޝްރޫޢު ނިންމާނީ، މިހާރު ފެށިފައި އޮތް މަސައްކަތް ނިންމާއިރުގައި ނިމޭނީ، ހުރިހާ ކަމެއް، އޭގެ ފުރިހަމަ ވާގޮތަށް. އެއީ، ވަށާފައި ފެންސް ޖެހި، ލައިޓް ޖެހި، އަދި ހުރިހާ މި ދެންނެވި ފުލް ސްކޯޕާ އެކީގައި.ރައީސް ޑރ. މުހައްމަދު މުއިއްޒު
ރިޔާސީ އިންތިހާބުގައިވެސް ވައުދުވެވަޑައިގެންނެވި ލިސްޓް ތަކުރާރުކުރައްވަމުން ރައީސް މުއިއްޒު ވިދާޅުވީ ކުޅިވަރުގެ ދާއިރާގެ ތެރެއިން އިތުރު ކަންކަންވެސް ކުރަން ކަނޑައަޅާފައިވާ ކަމަށާއި، އެ މަސައްކަތްވެސް މި އަހަރު ފެށޭނެ ކަމަށެވެ. އަދި އޭގެއިތުރަށް، އައުޓްޑޯ ޖިމެއްގެ މަސައްކަތާއި ފެން ބޮޑުވާ މައްސަލަ ހައްލުކޮށްދެއްވާނެ ކަމަށެވެ.
ރައީސް ވިދާޅުވީ މިއީ ސީރިއަސްކަމާއެކު ކުރަން ނިންމާފައިވާ ކަންކަން ކަމަށާއި، އޭޓީއެމްގެ ހިދުމަތް ފެށިފައިވާއިރު އޭގެ ފަސޭހަވެސް ރައްޔިތުންނަށް ލިބިގެންދާނެ ކަމަށެވެ. ހަމަ އެގޮތަށް، ރާއްޖޭގެ ހުރިހާ ރަށެއްގައިވެސް މި އަހަރު ނިމެންވާއިރަށް، އެކަން ހަމަޖައްސަވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ހުރިހާ މަޝްރޫޢުތައް މި އަހަރު ކުރިއަށްދާނެ ކަމަށެވެ. އަދި މާޅޮހުގެ ރައްޔިތުންގެ ތަރައްޤީއަށް ބޭނުންވާ ހުރިހާ ކަމެއްގައި، ވަރަށް އިސްކަމެއް ދީގެން، ވެވަޑައިގެންނެވި ވަޢުދުތަކާއި، އަދި އިތުރަށްވެސް ހުރި ކަންކަން ކޮށްދިނުމުގައި، ސަރުކާރުން ތިބޭނީ މާޅޮހުގެ ރައްޔިތުންނާ އެކުގައި ކަމަށް ރައީސް ވިދާޅުވިއެވެ.
