ކޮމަަންވެލްތު ގޭމްސްގައި ބައިވެރިނުވާން ދިވެހިރާއްޖެ އިން ނިންމީ، އެސޯސިއޭޝަންތަކާ މަޝްވަރާކުރުމަށްފަހު ކަމަށް މޯލްޑިވްސް އޮލިމްޕިކް ކޮމެޓީ (އެމްއޯސީ) އިން ބުނެފި އެވެ.
އަންނަ މަހުގެ ހަތަރު ވަނަ ދުވަހުން ފެށިގެން 11 ވަނަ ދުވަހުގެ ނިޔަލަށް ޓްރިނަޑާޑް އެންޑް ޓޮބޭގޯގައި ކުރިއަށްދާ ގޭމްސްގައި ބައިވެރިނުވަން ދިވެހިރާއްޖެ އިން ނިންމީ އެ ގޭމްސް އަށް ދާ ޚަރަދު ބޮޑުވުމުން ކަމަށް ވެސް އެމްއޯސީން ވަނީ ބުނެފަ އެވެ. އެގޮތުން ދެ ކުޅިވަރަކުން އެ ގޭމްސް އަށް ދިޔުމަށް ހަަމަޖެހިފައިވާ ހަ އެތުލީޓުންގެ ޓިކެޓަށް އެކަނި ވެސް 1.2 މިލިއަން ރުފިޔާ އަރާ ކަމަށް ވެސް ވަނީ ބުނެފަ އެވެ. އެހެންކަމުން އެ ޚަރަދު ކުރުމުގެ ބަދަލުގައި އެ ފައިސާ، އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ދާ އެތުލީޓުންނަށް ޚަރަދުކޮށްފި ނަމަ، އެ ގޭމްސް އިން ލިބޭނެ ނަތީޖާ ބޮޑުތަނުން ރަނގަޅުވާނެ ކަމަށް ބެލެވޭ ކަމަށް އެމްއޯސީން ވަނީ ބުނެފަ އެވެ. އަނެއްކޮޅުން ކޮމަންވެލްތު ޔޫތު ގޭމްސްގައި ބައިވެރިވާ އެތުލީޓުންނަކީ އައިއޯއައިޖީ ގައި ވެސް ބައިވެރިވާ އެތުލީޓުން ކަމަށް ވުމާއެކު، ދިގު ދަތުރެއްގެ ސަބަބުން ގެއްލޭ ވަގުތުގެ ފައިދާ ކުޅުންތެރިންނަށް ކުރާނެ ކަމަށް ވެސް އެ ކޮމެޓީން ބުނެ އެވެ.
އެކަމާ ގުޅިގެން ޔޫތު މިނިސްޓަރު އަޙުމަދު މަޚްލޫފް ބުދަ ދުވަހު ކުރެއްވި ޓުވީޓެއްގައި ވިދާޅުވީ ކޮމަންވެލްތު ގޭމްސް އަށް ނުދާން ނިންމީ ފައިސާ ނެތިގެން ނޫން ކަމަށެވެ. ނަމަވެސް އެ ގޭމްސް އަށް ދިޔުމަށް ކުރަން ޖެހޭ ޚަރަދު ބޮޑުވުމުން، އެފައިސާ އައިއޯއައިޖީ އަށް ޚަރަދު ކުރުމަށް އެސޯސިއޭޝަންތަކާއެކު މަޝްވަރާ ކުރުމަށްފަހު ނިންމީ ކަމަށް ވެސް ވިދާޅުވި އެވެ.
މެދު ކެނޑުމަކަށްފަހު ރާއްޖެ އިން ކޮމަންވެލްތު ގޭމްސްގައި ވާދަކޮށްފައި ވަނީ މިދިޔަ އަހަރު އެވެ. އޭގެ ކުރިން ރައީސް ޢަބްދުﷲ ޔާމީންގެ ސަރުކާރުގައި 2016 ވަނަ އަހަރު ކޮމަންވެލްތުން ވަކިވާން ނިންމުމާއެކު، ރާއްޖެ އަށް ގޭމްސްގައި ބައިވެރިވުމުގެ ފުރުސަތު ގެެއްލުނެވެ. އަލުން ރާއްޖެ އިން ކޮމަންވެލްތުގައި ބައިވެރިވީ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި 2020 ވަނަ އަހަރު އެވެ.
