ހަޤީޤީ މިނިވަންކަމަށް ވާނީ ރާއްޖޭގައި ސޫޓު ފަޓުލޫނުލުމުން މިނިވަންވުމުން - ފައްޔާޒް
ފައްޔާޒް ވަނީ ރާއްޖޭގެ ހުނަރުވެރި ޑިޒައިނަރުން މެދުވެރިކޮށް ރާއްޖޭގެ ސަޤާފަތާއި ގުޅޭ ރަނގަޅު ހެދުންތަކެއް ޑިޒައިން ކުރާނެ ކަމަށް އުންމީދުކުރައްވާ ކަމަށް ވިދާޅުވެފައި
އިކޮނޮމިކް މިނިސްޓަރު ފައްޔާޒު އިސްމާއީލް
ހަޤީޤީ މިނިވަންކަމަކަށް ވާނީ ރާއްޖޭގައި ސޫޓު ފަޓުލޫނުލުމުން މިނިވަންވުމުންކަމަށް އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެއެވެ.
ފައްޔާޒް މިފަދައިން ވިދާޅުވީ މިނިވަން ދުވަހު އެމަނިކުފާނު ކުރެއްވި ޓްވީޓެއްގައެވެ. އިކޮނިމިކް މިނިސްޓްރީގެ އިސްނެގުމަކަށް ބިޒްނަސް ސެންޓަރ ކޯޕަރޭޝަން (ބީސީސީ) ޓެގް ކުރައްވާ ކުރެއްވި އެ ޓްވީޓްގައި ފައްޔާޒް ވަނީ ރާއްޖޭގެ ހުނަރުވެރި ޑިޒައިނަރުން މެދުވެރިކޮށް ރާއްޖޭގެ ސަޤާފަތާއި ގުޅޭ، ރަނގަޅު ހެދުންތަކެއް ޑިޒައިން ކުރާނެ ކަމަށް އުންމީދުކުރައްވާ ކަމަށް ވިދާޅުވެފައެވެ. އަދި އެފަދަ މުބާރާތެއް ބޭއްވުން ކިހިނެތްވާނެތޯ ވެސް ވަނީ ސުވާލުކުރައްވާފައެވެ.
މިނިސްޓަރު ފައްޔާޒު މިފަދައިން ވިދާޅުވެފައި ވާއިރު މިނިސްޓްރީ އޮފް އިކޮނޮމިކް ޑިވެލޮޕްމެންޓްގެ އިސްނެންގެވުމާއެކު ބީސީސީގެ ފަރާތުން ހިންގި އަދަބީ ޢީދު ތާނަވާ 2023 ގެ ތެރެއިން މަޝްހޫރު ޑިޒައިނަރު ހަސަން ފަރުމާކޮށްފައިވާ ދިވެހި ޘަގާފީ ހެދުންތައް ވަނީ ދައްކާލާފައެވެ.
ދިވެހި އަދަބާއި ގުޅުންހުރި އެކި ހަރަކާތްތަކުގެ އިތުރުން ދިވެހިންގެ ސަޤާފަތާއި ގުޅޭ އެކި ފަންނުވެރިންގެ މަސައްކަތްތައް ވެސް އެ ކާނިވަލުން ދައްކާލިއެވެ. އަދި ދިވެހި ސަޤާފީ ހެދުންތަކާއި ރަސްރަސްކަލުން ތުރުކުރެއްވި ހެދުންކޮޅުތައް އެ ހަރަކާތުގެ ތެރެއިން ބޭއްވި ފެޝަން ޝޯގައި ވަނީ ދައްކާލާފައެވެ.
