ގުޅުން ގާއިމުކުރަން ބޭނުންވާ ހުރިހާ ގައުމަކާއެކު ގުޅުން ގާއިމުކުރުމަކީ އަމާޒެއް: މިނިސްޓަރު ޝާހިދު
193 ގައުމުގެ ތެރެއިން 185 ގައުމާއެކު ޑިޕްލޮމެޓިކް ގުޅުން ވަނީ ގާއިމުކޮށްފައި
ފޮރިން މިނިސްޓަރު އަބްދުﷲ ޝާހިދު
މިސަރުކާރުން އެންމެ ބޮޑު އަހަންމިއްޔަތުކަމެއް ދީގެން ކުރާ މަސައްކަތަކީ ދުނިޔޭގެ ހުރިހާ ގައުމަކާއެކު ޑިޕްލޮމެޓިކް ގުޅުން ގާއިމުކުރުންކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ޚާރިޖީ މިނިވަންކަމާއި މިސަރުކާރުގެ ޚާރިޖީ ސިޔާސަތާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅު ދައްކަވަމުން މިނިސްޓަރު ވިދާޅުވީ ރާއްޖެއިން އެންމެ ފުރަތަމަ ޑިޕްލޮމެޓިކް ގުޅުން ގާއިމުކޮށްފައިވަނީ އިނގިރޭސިވިލާތާއެކު ކަމަށެވެ. އެއީ 1965 ވަނަ އަހަރު ކަމުގައިކަމަށާއި އޭގެފަހުން މިހާތަނަށް 185 ގައުމަކާއެކު ރާއްޖެއިން ޑިޕްލޮމެޓިކް ގުޅުން ގާއިމުކޮށްފައިވާކަމަށް މިނިސްޓަރު ވިދާޅުވިއެވެ.
193 ގައުމު ދުނިޔޭގައި އޮންނައިރު އަމާޒަކީ ކުރިޔަށް އޮތް ދުވަސްތަކުގެ ތެރޭގައި ހުރިހާ ގައުމަކާއެކު ޑިޕްލޮމެޓިކް ގުޅުން ގާއިމުކުރުންކަމަށާއި ނަމަވެސް އެކަމުގައި ރާއްޖެއިން ގެންގުޅޭ އުސޫލެއް އޮންނަކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ގައުމުތަކާއެކު ޑިޕްލޮމެޓިކް ގުޅުން ގާއިމުކުރުމުން ލިބޭ ފައިދާއަކީ ކޮންމެ ގައުމަކާއެކުވެސް ރާއްޖެއަށް ވަކި ލިޔުމެއް އޮންނާނެކަމަށެވެ. ދެ ގައުމުގެ ދޭތެރޭގައި މިނިވަން ސިޔާދަތީ ގައުމެއްގެ ގޮތުގައި ގަބޫލުކުރެވުނުކަމާއި އދ ގެ ޗާޓަރަށް ހުރުމަތްތެރިކޮށް ހިތުމުގެ ތެރެއިން ދެ ގައުމުގެ ގުޅުން ބަދަހިކުރުމަށް މަސައްކަތްކުރެވޭނެކަމަށެވެ. އަދި ދެގައުމު ގުޅިގެން ކުރަން ހުރި ހުރިހާ މަސައްކަތެއް ކުރާނެކަމުގެ އެއްބަސްވުމެއް އޭރުން އޮންނާނެކަމަށެވެ.
މިނިސްޓަރު ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމާއި ހަވާލުވެވަޑައިގެންނެވިއިރު ރާއްޖެ އޮތީ ބައިނަލްއަގްވާމީ މަސްރަހުގައި ވަރަށް ބޮޑަށް ބިކަވެ ބާކީވެފައިކަމަށެވެ. އެހެންކަމުން ރައީސް ޞާލިހުގެ ސަރުކާރުގެ ފުރަތަމަ މަސައްކަތަކަށްވީ ބައިނަލްއަގްވާމީ މުޖުތަމައުގައި ރާއްޖެއާމެދު އޮތް ތަސައްވަރު ބަދަލުކުރުންކަމަށެވެ.
މިނިސްޓަރު ވިދާޅުވީ ދުނިޔޭގެ 193 ގައުމުގެ ތެރެއިން 95 ގައުމަކަށް ކުރިން ވިސާނެތި ދިވެހި ޕާސްޕޯޓުގައި މިއަދު ދަތުރުކުރެވޭނެކަމަށެވެ. މިސަރަހައްދުގައި އެންމެ ބާރު ގަދަ ޕާސްޕޯޓް އޮތީ ދިވެހިންގެ އަތުގައިކަމަށް ވެސް މިނިސްޓަރު ވިދާޅުވިއެވެ.
ބައިނަލްއަގްވާމީ ޖަލްސާތަކުގައި މިއަދު ރާއްޖެއޭ ބުނުމުން ތެދުވެ ސަލާންކޮށް ރާއްޖޭގެ ތަޖުރިބާ އަހާ ގައުމުތައް މަދު ނޫންކަމަށް މިނިސްޓަރު އިތުރަށް ވިދާޅުވިއެވެ.
