ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭއާ ގުޅޭ ގޮތުން ސުވާލު ކުރުމުން ޗެލްސީގެ ކޯޗު މައުރީސިއޯ ޕޮޗެޓީނޯ ފިނި ޖަވާބެއް ދީފި އެވެ.
ޕީއެސްޖީގެ ކޯޗުކަމުން ވަކި ކުރި ފަހުން ރަސްމީ އެއްވެސް ވަޒީފާއެއް ނެތި ހުރި ޕޮޗެޓީނޯ ދާދި ފަހުން ވަނީ ޗެލްސީގެ ކޯޗުކަމާ ހަވާލުވެފަ އެވެ. ޕީއެސްޖީގެ އެއްބަސްވުން އައު ނުކުރަން އެމްބާޕޭ ނިންމުމާއެކު އެ ކުލަބުން އަންނަނީ އޭނާ ވިއްކާލުމުގެ މަސައްކަތް ކުރަމުންނެވެ. އެކަމުގައި ޗެލްސީން އެއްވެސް ވަރަކަށް އެމްބާޕޭ ހޯދުމަށް މަސައްކަތް ކުރާނެތޯ ކުރި ސުވާލަށް ޖަވާބު ދެމުން ޕޮޗެޓީނޯ ބުނީ، ޗެލްސީން މަސައްކަތް ކުރަމުން އަންނަނީ ހަގީގަތަށް ކަމަށެވެ. ނަމަވެސް އެކަމުގައި ކަން އޮތް ގިތް ތަފާތުވުމަކީ ވެސް އެކަށީގެންވާ ކަމެއް ކަމަށް އޭނާ ވަނީ ބުނެފަ އެވެ.
އޭނާ ބުނީ، އަމިއްލަ ހައިސިއްޔަތުން އެކަމުގައި ވަކި ޖަވާބެއް ދޭން ބޭނުންނުވާ ކަމަށެވެ. ނަމަވެސް މިހާރު ދިމާވެގެން އުޅޭ މައްސަލައިގައި ދެ ފަރާތަށް ވެސް އެންމެ ރަނގަޅު ހައްލެއް ހޯދުން އެދޭ ކަމަށް ވަނީ ބުނެފަ އެވެ. ޕޮޗެޓީނޯ ބުނީ ޕީއެސްޖީ އަކީ އޭނާ ވަރަށް ލޯބިވާ ކުލަބެއް ކަމަށާއި، ކުލަބުގެ ކެރިއަރު ފެށީ ކުޅުންތެރިޔެއްގެ ގޮތުގައި ކަމަށެވެ. ފަހުން ކޯޗުގެ ގޮތުގައި މަސައްކަތް ކުރުމަށް ފުރުސަތު ލިބުނު ކަމަށާއި، އެ ދުވަސްތަކުގައި އެމްބާޕޭ ވެގެން ދިޔައީ އޭނާ ވަރަށް ގަޔާވާ ކުޅުންތެރިޔެއް ކަމަށް ވެސް ޕޮޗެޓީނޯ ވަނީ ބުނެފަ އެވެ.
ޕީއެސްޖީން އެމްބާޕޭ ވިއްކާލުމަށް މަސައްކަތް ކުރަމުން އަންނައިރު، ސައުދީ ޕްރޯ ލީގުގެ އަލް ހިލާލުން ވަނީ އޭނާ ހޯދުމަށް ރެކޯޑު ހުށަހެޅުމެއް ވެސް ހުށަހަޅައިފަ އެވެ. ނަމަވެސް އެކަމުގައި އެމްބާޕޭ އަދި ޕީއެސްޖީން ވެސް ވަކި ގޮތެއް ނުނިންމާ ކަމަށް ރިޕޯޓުތައް ބުނެ އެވެ.
