ޖަރުމަނު ލީގުގެ ބަޔާން މިއުނިކަށް ކުޅެމުން އައި އޮސްޓްރިއާގެ މާސެލް ސަބިޓްޒާ އެ ކުލަބު ދޫކޮށް ވާދަވެރި ބޮރޫޝިއާ ޑޯޓްމަންޑަށް ސޮއިކޮށްފި އެވެ.
އުމުރުން 29 އަހަރުގެ މިޑްފީލްޑަރު ޑޯޓްމަންޑަށް ބަދަލުވުމުގެ ކުރިން ކުޅުނީ މެންޗެސްޓަރ ޔުނައިޓެޑަށެވެ. ބަޔާންގައި ހުރުމަށްފަހު އޭނާ ޔުނައިޓެޑަށް ބަދަލުވީ ލޯނު އެއްބަސްވުމެއްގެ ދަށުންނެވެ. ޑޯޓްމަންޑާއެކު އޭނާ ސޮއިކޮށްފައި ވަނީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެެހެންކަމުން 2027 ވަނަ އަހަރުގެ ޖޫން މަހުގެ ނިޔަލަށް އޭނާ ޑޯޓްމަންޑަށް ކުޅޭނެ އެވެ. އޭނާ ހޯދުމަށް ޑޯޓްމަންޑުން ވަނީ ޖުމުލަ 19 މިލިއަން ޔޫރޯ ޚަރަދުކޮށްފަ އެވެ. ޑޯޓްމަންޑަށް ސޮއި ކުރުމަށްފަހު ސަބިޓްޒާ ބުނީ، އެކުލަބަށް ސޮއި ކުރެވުމުން ވަރަށް އުފާވާ ކަމަށާއި، ބޭނުންވަނީ ކުރިއަށް ދިޔުމަށެވެ.
އޮސްޓްރިއާގެ ކުލަބަކުން ސީނިއާ ކެރިއަރު ފެށި ސަބިޓްޒާ ވަނީ ޖަރުމަނު ލީގުގެ އާރްބީ ލައިޕްޒިގަށް ވެސް ކުޅެފަ އެވެ. އެ ކުލަބަށް އޭނާ ވަނީ 229 މެޗު ކުޅެދީ 52 ލަނޑު ޖަހައިފަ އެވެ. އެއަށްފަހު ރެޑްބުލް ސަލްސްބާގަށް ކުޅުމަށްފަހު، ބަޔާނަަށް ބަދަލުވީ 2021 ވަނަ އަހަރު އެވެ. އެ ކުލަބުގައި ހޭދަކުރި ދެ އަހަރުގައި އޭނާ ވަނީ 54 މެޗު ކުޅެދީ ދެ ލަނޑު ޖަހައިފަ އެވެ. ބަޔާނާއެކު އޭނާ ވަނީ ދެ ތަށި ކާމިޔާބުކޮށްފަ އެވެ. އެއަށްފަހު ލޯނު އެއްބަސްވުމެއްގެ ދަށުން ޔުނައިޓެޑަށް ބަދަލުވެ ވަނީ 18 މެޗުން ތިން ލަނޑު ޖަހައިފަ އެވެ. ނަމަވެސް ޔުނައިޓެޑަށް ބަދަލުވި ފަހުން ލިބުނު ކަކުލުގެ އަނިޔާއެއްގެ ސަބަބުން އޭނާ ވަނީ ކުޅުމާ ދުރުގައި ހުންނަން ޖެހިފަ އެވެ.
