ކ. މާލެ
|
25 ޖުލައި 2023 | އަންގާރަ 07:28
ވިލަރެއާލަށް ކުޅެމުން އަންނަ ސެމިއުލް ޗުކުވޭޒީ
ވިލަރެއާލަށް ކުޅެމުން އަންނަ ސެމިއުލް ޗުކުވޭޒީ
ޓްވީޓަރ
އޭސީ މިލާން
ވިލަރެއާލް ދޫކޮށް ސެމިއުލް ޗުކުވޭޒީ އޭސީ މިލާނަށް
 
އޭނާ ހޯދުމަށް މިލާނުން ގާތްގަނޑަކަށް 28 މިލިއަން ޔޫރޯ ޚަރަދު ކުރާނެ

ސްޕެއިންގެ ވިލަރެއާލަށް ކުޅެމުން އަންނަ ނައިޖީރިއާގެ ސެމިއުލް ޗުކުވޭޒީ އެކުލަބު ދޫކޮށް، އިޓާލިއަން ލީގުގެ އޭސީ މިލާނަށް ބަދަލުވާން ނިންމައިފަ އެވެ.

އުމުރުން 24 އަހަރުގެ ކުޅުންތެރިޔާ ހޯދުމަށް މިލާނުން ވިލަރެއާލާއެކު ކުރިއަށް ގެންދިޔަ މަޝްވަރާތަކަށްފަހު، މިހާރު ވަނީ އެއްބަސްވުމަކަށް އާދެވިފަ އެވެ. ދެ ކުލަބުގެ ދެމެދުގައި މިހާރު އެކަމާ ގުޅޭ އެންމެހާ ލިޔެކިޔުންތައް ބަދަލުކޮށްފައިވާ ކަމަށާއި، މި ހަފްތާގެ ތެރޭގައި މިލާންގެ އެއްބަސްވުމުގައި ޗުކުވޭޒީ ސޮއި ކުރާނެ ކަމަށް މީޑިއާތަކުން ބުނެ އެވެ. މިލާނާއެކު އޭނާ ސޮއި ކުރާނީ ފަސް އަހަރު ދުވަހުގެ އެއްބަސްވުމެއްގަ އެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ. އޭނާ ހޯދުމަށް މިލާނުން ގާތްގަނޑަކަށް 28 މިލިއަން ޔޫރޯ ޚަރަދު ކުރާނެ އެވެ. މިލާނަށް ބަދަލުވުމަށް ކުރިއަށް ގެންދަން ޖެހޭ މެޑިކަލްގެ ކަންކަން މި ހަފްތާގެ ތެރޭގައި ޗުކުވޭޒީ ފުރިހަމަ ކުރާނެ އެވެ.

ޗުކުވޭޒީ އޭނާގެ ސީނިއާ ކެރިއަރު ފެށީ 2018 ވަނަ އަހަރު ވިލަރެއާލުންނެވެ. އޭގެ ފަހުން އޭނާ ވަނީ މިހާތަނަށް އެ ކުލަބަށް 227 މެޗު ކުޅެދީ 41 ލަނޑު ޖަހައިފަ އެވެ. އެކުލަބާއެކު އޭނާ ވަނީ ޔުއެފާ ޔޫރޮޕާ ލީގު ކާމިޔާބުކޮށްފަ އެވެ. ނައިޖީރިއާގެ ޤައުމީ ޓީމުން އޭނާ އަށް ޖާގަ ލިބުނީ ވެސް 2018 ވަނަ އަހަރު އެވެ. ނައިޖީރިއާގެ ފުޓުބޯޅަ ފެޑެރޭޝަނުން ހޮވާ އެންމެ މޮޅު ޒުވާން ކުޅުންތެރިޔާގެ އެވޯޑު އޭނާ ވަނީ 2018 ވަނަ އަހަރު ހާސިލްކޮށްފަ އެވެ.

އެންމެ ފަހުން އަޕްޑޭޓް ކުރީ: 4 މަސް ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
0%
0%
0%
ކޮމެންޓް