ވަޒީފާ ގެއްލުނު ނޫސްވެރިޔާއާއި ގްރެފިކް ޑިޒައިނަރުގެ މަސައްކަތުން ހުޅަނގު އައްސޭރިއަށް ތަފާތު ރަހައެއް!
24 ޖުލައި 2023 | ހޯމަ 08:48ހާޔާއާއި އަހުމަދުގެ ފިހާރައިން ލިބެން ހުރި ފޮނިކާތަކެތީގައި ފޮނި ރަހަލައްވަން ބޭނުން ކުރަނީ ޤުދުރަތީ ތާސީރެއް ކަމަށްވާ ސްޓީވިއާ
ހަޔާ އަލް-ޝައިޚް؛ ފޮނިކާތަކެތީގެ ވިޔަފާރި ކުރާ މީހެއް
ފޮނި އެއްޗެއްގައި ވިއްޔާ ހަމަ ޔަޤީނުންވެސް ފޮނި ރަހަ ލުމަކީ އެ އެއްޗެއްގައި ފުރިހަމަވުން ލާޒިމު ޝަރުތެކެވެ. ނަމަވެސް ފޮނި ރަހަލާ ކޮންމެ އެއްޗެއްގައި ހަކުރު ހުންނާކަށް ލާޒިމެއް ނޫނެވެ. މަންތިގީ ބަޙުސަކަށް ފެށުމުގެ ކުރިން މާ ބޮޑަށް ސެހެރި ދިގު ނުކޮށް، ސީދާ ނުކުތާއަށް ޖެހިލަމާ ހިނގާށެވެ.
މިއަދުގެ މަންޒިލަކީ ހުޅަނގު އައްސޭރީގެ ސިޓީއެއް ކަމަށް ވާ ނާބުލުސްއެވެ. ނާބުލުސް މަޝްހޫރު ވެފައި ވަނީ ފަލަސްޠީނުގެ ޘަޤާފީ ފޮނިކާތަކެތީގެ މަރުކަޒުގެ ގޮތުގައެވެ. ހިއްސާކުރަން މިއުޅެނީ ނާބުލުސްގައި ހިންގާ ފިހާރައެއްގެ ވާހަކައެވެ. މި ފިހާރައަކީ ފަލަސްޠީނުގެ ޘަޤާފީ ފޮނި ކޭމުގެ ބާވަތްތައް، ހަކުރު ނާޅާ ތައްޔާރުކޮށްގެން ވިއްކާ ފިހާރައެކެވެ. ހަކުރި ބަލީގެ ޕޭޝަންޓުންނަށްވެސް އެ ރަހަތަށް ތަޖުރިބާކޮށްލެވޭ ގޮތަށެވެ.
މި ވިޔަފާރިއަކީ ޒަވާޖީ ޙަޔާތުގެ ގޮށް ޖަހައިގެން ތިބި ދެމަފިރިއެއްގެ ޢަޒުމުން ފުރިގެންވާ ދަތުރެކެވެ. ވިޔަފާރި ފުޅާ ކުރުމުގައި ދެމަފިރިންގެވެސް ޢުއްމީދަކަށް ވީ، ވީހާވެސް ޞިއްޙަތަށް ފައިދާ ކުރަނިވި ގޮތަކަށް، އަދި އެންމެނަށްވެސް ފަސޭހައިން ލިބޭނެ ފަދަ ގޮތަކަށް ޘަޤާފީ ފޮނިކާތަކެތީގެ ބާވަތްތައް ތައްޔާރު ކުރުމެވެ.
ވިޔަފާރި ފެށިގެން އައީ ނޫސްވެރިކަމާއި ގްރެފިކް ޑިޒައިނިންގެ ދާއިރާގައި މަސައްކަތް ކުރަމުން ދިޔަ ހާޔާއާއި އަހުމަދު އަލް-ޝައިޚުގެ ވަޒީފާ ގެއްލުނު ހިސާބުންނެވެ. ހާޔާއާއި އަހުމަދުގެ ފިހާރައިން ލިބެން ހުރި ފޮނިކާތަކެއްޗަކީ އޭގައި އެއްވެސް ވަރަކަށް ދޯބުރާލި ހަކުރު އެކުލެވިގެން ނުވާ، ޞިއްޙަތަށް ފައިދާ ކުރަނިވި ފޮނިކާތަކެއްޗެވެ. މި އުފެއްދުންތަކަކީ، ކެއިންބުއިމުގައި ވަކި ހަމަތަކެއް ގެންގުޅުމަށް މަޖުބޫރުވެފައި ވާ މީހުންނަށްވެސް އެއްވެސް ހާސްކަމެއް ނެތި ބޭނުން ކުރެވޭނެ އުފެއްދުންތަކެއް ކަމަށް އަހުމަދުގެ ދެމަފިރިން ބުނެއެވެ.
ހާޔާއާއި އަހުމަދުގެ ފިހާރައިން ލިބެން ހުރި ފޮނިކާތަކެތީގައި ފޮނި ރަހަލައްވަން ބޭނުން ކުރަނީ ޤުދުރަތީ ތާސީރެއް ކަމަށް ވާ ސްޓީވިއާއެވެ. ސްޓީވިއާއަކީ ސްޓީވިއާ ގަހުގެ ފަތުން ނަގާ ތާސީރެކެވެ. ސްޓީވިއާ ގަހުގެ ފަތަށް ކޭންޑީލީފްގެ ނަމުންވެސް ކިޔާ އުޅެއެވެ. މި ތާސީރަކީ އާންމުކޮށް ބޭނުން ކުރާ ހަކުރަށް ވުރެ 100 އާއި 300 ގުނަ ފޮނިކަން ގަދަ ތާސީރެކެވެ. ނަމަވެސް ސްޓީވިއާއަކީ އޭގައި އެއްވެސް މިންވަރަކަށް ކާބޯހައިޑްރޭޓްސް، ކެލަރީޒް އަދި މަސްނޫޢީ އެއްވެސް މާއްދާއެއް އޭގައި ބޭނުން ކޮށްފައި ވާ އެއްޗެއް ނޫނެވެ. ބައެއް މީހުންނަށް ސްޓީވިއާގެ ރަހަ ކަމު ނުދާ ކަމަށްވެސް ބުނެއެވެ. އެއީ ކުޑަ ހިތިކަމެއް އޭގައި އެކުލެވޭތީ ކަމަށްވެސް ވެދާނެއެވެ.
ފޮނިރަހަ ހެޔޮވަރު ކުރުމަށް ސްޓީވިއާ ބޭނުން ކުރާ ކުރުމުގެ އިތުރުން، ހަޔާއާއި އަހުމަދުގެ ފިހާރައިން ލިބެން ހުރި ފޮނިކާތަކެއްޗަކީ ގްލޫޓަން ފްރީ ބާވަތްތައް ބޭނުންކޮށްގެން ތައްޔާރުކޮށްފައިވާ ކާބޯތަކެއްޗެވެ.
އެވަރުން ނިމުނީއެއް ނޫނެވެ. ޞިއްޙަތާއި އެއްވަރަށް ދެމެހެއްޓެނިވި އުސޫލުތަކަށްވެސް މި ދެމަފިރިން ޚާއްޞަ ސަމާލުކަމެއް ދެއެވެ. ފޮނިކާތަކެތި ބަންދުކުރަން ބޭނުން ކުރަނީވެސް ޤުދުރަތީ މާއްދާތަކުން ތައްޔާރުކޮށްފައިވާ ޚާއްޞަ ޕެކޭޖިންގްއެކެވެ. މި ޕެކޭޖިންގްއަކީ ގިނަ ދުވަސްތަކެއް ވަންދެން ފޮނިކާތަކެތި ތާޒާކޮށް ބަހައްޓަން އެހީވެދިނުމުގެ އިތުރުން، ވެއްޓާވެސް ރައްޓެހި ޕެކޭޖިންގްއެކެވެ.
ހަޔާއާއި އަހުމަދުގެ ދެމަފިރިންނަކީ ފިސާރި ޢަޒުމު ވަރުގަދަ ދެމަފިރިންނެވެ. ފޮނިކާތަކެއްޗާއި މެޓާ ވިއްކުމުގެ ވިޔަފާރިއަކީ މެދުއިރުމަތީގައި ކިތަންމެ ފުޅާވެފައި އޮތް ވިޔަފާރިއަކަށް ވީ ނަމަވެސް، އެއީ އެ ދެމަފިރިންގެ ވިޔަފާރިއަށް އޮތް ހުރަހެއް ކަމުގައި ފަހަރެއްގައިވެސް ނުދެކެއެވެ. ނަތީޖާވެސް އެހާމެ ފޮންޏެވެ. މިއަދު އެ ފިހާރައިގެ އޮޕަރޭޝަންތައް ވަނީ ފުޅާ ކޮށްފައެވެ. ޚިދުމަތް ދޭ މީހުންގެ ޢަދަދުވެސް ގިނައެވެ.
