ފޭނުން ގެއްލުނުކަމުގައި ވިއަސް ޓްރަމްޕަށް ފާޑުކިޔުން ހުއްޓައެއް ނުލާނަން: އެމިނެމް

ފޭނުން ގެއްލުނުކަމުގައި ވިއަސް އެމެރިކާގެ ރައީސް ޑޮނަލްޑް ޓްރަމްޕަށް ފާޑުކިޔުން ހުއްޓާ ނުލާނެ ކަމަށް އެމެރިކާގެ މަޝްހޫރު ރެޕް އާޓިސްޓް އެމިނެމް ބުނެފިއެވެ.

އެމިނެމް ބިލްބޯޑަށް ދީފައިވާ އިންޓަވިއުއެއްގައި ބުނެފައި ވަނީ އޭނާ ފާޑުކިޔަމުންގޮސް ފޭނުން ގެއްލުނުކަމުގައި ވިއަސް އެކަންތައް ހުއްޓާނުލާނެ ކަމަށެވެ. ސަބަބަކީ އޭނާއެކުރަނީ ރަނގަޅު ކަމެއްކަމަށް އެމިނެމް ވަނީ ބުނެފައެވެ.

"އަހަރެން ފާޑުކިޔާތީ ފޭނުންގެ ތެރެއިން ދެބައިކުޅަ އެއްބައި މީހުން ގެއްލުނުކަމުގައިވިއަސް އަހަންނަށް ވަރިހަމަ. އަހަންނަށް އަހަރެން މިކުރަނީ ރަނގަޅު ކަމެއްކަމުގައި އިހުސާސް ކުރެވޭ. އަހަންނަށް ގަބޫލެއް ނުކުރެވޭ އެހާ ދަށުފަންތީގޭ މަގާމަށް ވެއްޓިގެން ބިލިއަނަރަކު ކޮންމެ ދުވަހަކު އެގޮތަށް އުޅޭކަށް." އެމިނެމް ބުންޏެވެ.

އެމިނެމްގެ ފާޑުކިޔުންތަކަށް ޓްރަމްޕް ވެސް އަދި އެމެރިކާގެ ވައިޓްހައުސްއިން ވެސް މިކަމާއިމެދެ އެއްޗެއް ބުނެފައެއް ނުވެއެވެ.

އެމިނެމްގެ އެންމެ ފަހުގެ އަލްބަމް ކަމަށްވާ ރިވައިވަލްގެ ލަވަތަކުގައި ޓްރަމްޕަށް ވަނީ ވަރަށް ބޮޑަށް ފާޑުކިޔާފައެވެ. ޚާއްސަކޮށް އެ އަލްބަމްގެ ދަ ސްޓޯމް ލަވައިގައި ޓްރަމްޕަށް ފާޅުގައި ވަނީ ފާޑު ކިޔާފައެވެ.

ތަފާތު ރަހަތަކެއް ހިމަނައިގެން، ގިނަ ލަވަތަކަކާއިއެކު ނެރުނު ރިވައިވަލް އަކީ ހަތަރު އަހަރަށް ފަހު އެމިނެމް ނެރުނު ފުރަތަމަ އަލްބަމެވެ. ޖުމްލަ 19 ޓްރެކް ހިމެނޭ، 77 މިނިޓް 39 ސިކުންތުގެ ދިގުމިނުގެ މި އެލްޕީގައި އެމިނެމް އާއި އެކު، އެޑް ޝީރާން، ބިޔޯންސޭ، ޕިންކް، އެލީޝިއާ ކީޒް، ޕްރެޝަރ، އަދި ސްކައިލަރ ގްރޭ ކިޔާފައިވާ ލަވަތައް ހިމަނާފައިވެއެވެ.