ފުރޮޅުލީ ގޮނޑީގައި އިންނަންޖެހުނެއްކަމަކު ޚަތީބު ފޫބައްދައިދެމުން އެ ދަނީ ކޮވިޑްގައި ގެއްލުނު 2 އަހަރު!

ޚާއްޞަ އެހީއަކަށް ބޭނުންވުމަކީ އެހާ ހިސާބުން ދިރިއުޅުން ހުއްޓާލައިގެން، މާޔޫސްކަންމަތީގައި ހަޔާތުގެ ބާކީ ދުވަސްތައް ގުނަން މަޖުބޫރުވާ ސަބަބެއް ނޫންކަން ސާބިތު ކޮށްދެމުންދާ އެކަކީ، ޣައްޒާގެ ހިސާބު ޓީޗަރު، ޝިހާދީ އަލް-ޚަތީބެވެ. ޚަތީބުގެ ޚިދުމަތްތައް ޚާއްޞަކޮށްފައި ވަނީ، މާލީ ގޮތުން މާ ބޮޑު ތަނަވަސްކަމެއް ނެތް ދަރިވަރުންނަށް ޕްރައިވެޓް ޓިއުޝަން ދިނުމަށެވެ.

ފުރޮޅުލީ ގޮނޑިއެއްގައި އިންނަ ޚަތީބު، އޭނާގެ ދަރިވަރުންނާ ބައްދަލުކޮށް، ޓިއުޝަން ނަގައިދެނޯ އޭނާގެ އަމިއްލަ ގޭގައެވެ. ހިސާބު ފިލާވަޅުތައް ކިޔަވައިދޭން ބޭނުންކުރަނީ ފުރިޖެއްގެ ދޮރުފަތުން ހަދާފައިވާ ޗޯކު ބޯޑެކެވެ. ޚަޠީބު އެ ބޯޑު ތައްޔާރުކުރީ، އޭނާގެ ފިރިހެން ދަރިފުޅުގެ އެހީތެރިކަމާއެކުގައެވެ.

ޚަޠީބު ކިޔައިދިންގޮތުގައި، ގޭގައި ޓިއުޝަން ދިނުމުގެ ޚިޔާލު އޭނާއަށް ލިބުނީ ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމުގެ ދުވަސްވަރުގައެވެ.

އެއީ ކުލާސްތަކަށް ހާޒިރުވެގެން ކިޔެވުމުގެ ދޮރުތައް ބަންދުވެ، ތައުލީމީ ދާއިރާއަށް ނޭދެވޭ އަސަރުތަކެއް ފޯރަން ފެށި ދުވަސްވަރުކަން ޚަތީބު ފާހަގަކުރެއެވެ.

ޚަތީބު ޓިއުޝަން ނަގައިދެނީ ބޮޑު އަގުގައި ދޭ ޓިއުޝަންތަކަށް ފައިސާ ނުދެއްކި ތިބި ކުދިންނަށް ޚާއްޞަކޮށްގެންނެވެ. އެ ކުދިން އަތުން ޚަޠީބު ނަގަނީ ރަމްޒީ ފީއެއް ކަމުގައިވެސް ބުނވިދާނެއެވެ. އެވަރުވެސް ނުކުރެވޭ ބައެއް ދަރިވަރުންނަށް އޭނާ ކިޔަވައިދެނީ ހިލޭ ސާބަހަށެވެ.

މިއަދު ޚަތީބުގެ ކުލާސްތަކަށް ހާޒިރުވާ ދަރިވަރުންގެ އަދަދު 50އާ ގާތް ކުރެއެވެ. ލިބުނު އަނިޔާއަކާ ގުޅިގެން ޚަތީބު ވާގިނެތުނީ 2003 ވަނަ އަހަރުގެ ތެރޭގައެވެ.