ފޯނެއް އޮތީވިއްޔާ ވަޒީފާވެސް ތިއޮތީ ލިބިފައެވެ!

ވަޒީފާއެއް އަދާކޮށްގެން އާމްދަނީ ހޯދުމަކީ ކަނޑައެޅިގެން ވަކި ތަނަކަށް ހާޒިރުވެގެން ކުރަން ޖެހޭ ކަމެއް ނޫންކަން ސާބިތު ކޮށްދިނުމުގައި، ސޫރިޔާއަށް ނިސްބަތްވާ، އުމުރުން 29 އަހަރުގެ އަނަސް އަލް-ކާތިބަކީ ލާމަސީލު ޒުވާނެކެވެ. އެކަމުގައި އޭނާގެ ބައިވެރިއަކީ ޓެކްނޮލޮޖީއާއި ސޯޝަލް މީޑިއާއެވެ. ކުރާހާވެސް ކަމަކީ އެކި ކަހަލަ ވީޑިއޯ ތައްޔާރުކޮށް، ޕޯސްޓް ކުރުމެވެ.

ކާތިބަކީ ތިއޭޓަރ އަރޓްސްގެ ރޮނގުން މަތީ ތައުލީމު ހާސިލު ކޮށްފައިވާ ޒުވާނެކެވެ. ނަމަވެސް، ވަޒީފާ ހޯދުމަކީ މިއަދު ކާތިބުގެ އަތުގައި ހިފާފައި އޮތް ނަސީބެއް ނޫނެވެ. ނަމަވެސް، މާޔޫސް ކަމަކީ ކާތިބު ބޭނުންވާ ގޮތް ނޫން ކަމުން، މޯބައިލް ފޯނުގެ އެހީގައި ދިރިއުޅުން ފާގަތި ކުރުމަށް އޭނާ މަސައްކަތް ފެށިއެވެ.

ކާތިބު ޕޯސްޓް ކުރާ ވީޑިއޯތަކަކީ އެކި މައުޟޫތަކަށް ހާއްސަ ވީޑިއޯތަކެކެވެ. ހަނގުރާމައިގެ ތެރޭގައި ސުންނާފަތި ވެފައިވާ ސޫރިޔާގައި ދިރިއުޅުން ދަތިވެފައިވާ މިންވަރުން ފެށިގެން، ފަތުރުވެރިންނަށް ހިތްގައިމު މަންޒިލްތައްވެސް ކާތިބުގެ ވީޑިއޯ ޕޯސްޓްތަކުން ބަޔާންކޮށްދެއެވެ. އިތުރު މައުލޫތަކުގެ ތެރޭގައި، މިލިއަނަރަކަށް ވާނެ އިރުޝާދުތަކާއި، ފިޓްކޮށް ހުންނާނެ ޓިޕްތައްވެސް ހިއްސާކޮށްފައި ހުރެއެވެ.

ކާތިބުގެ ވީޑިއޯތަކުގެ ކާމިޔާބު ކަން އަންގައިދެނީ އޭނާގެ ފޮލޯވަރުންގެ އަދަދުންނެވެ. 3000 އިން 37000 އަށް ފޮލޯވަރުންގެ އަދަދު އިތުރު ވީ، ކުޑަ ދުވަސްކޮޅެއްގެ ތެރޭގައެވެ. ކާތިބު ބުނާ ގޮތުގައި އޭނާގެ މަޤުބޫލުކަން އެންމެ  ބޮޑުވެގެން ދިޔައީ ދުބާއީގައި އޭނާ ހުށަހަޅާދިން ވީޑިއޯއެއްގެ ސަބަބުންނެވެ.

ކާތިބުގެ މަޤުބޫލުކަން ފެނި، ކުންފުނިތަކުންވެސް އޭނާއަށް ސަމާލުކަން ދޭން ފެށިއެވެ. އެކި ކަހަލަ އުފެއްދުންތައް މަރކެޓް ކޮށްދިނުމަށް އެދި، ކުންފުނިތަކުގެ ހުށަހެޅުންތައް ކާތިބަށް ލިބެން ފެށިއެވެ. ނަތީޖާއެއްގެ ގޮތުން، ކާތިބަށް، ބޮޑު އާމްދަނީއެއްވެސް ލިބެން ފެށިއެވެ.

އޭނާގެ މަޤުބޫލުކަން ކިތަންމެ ބޮޑުވި ނަމަވެސް، ޒަމާނީ ވަސީލަތްތަކާއެކު އެ މަސައްކަތް ކުރާނެ ވަރުގެ ތަނަވަސްކަމެއް އަދި އޭނާގެ ނެތެވެ. ފޯނު ދޫކޮށްލެވޭ ގޮތެއް ނުވެއެވެ.

ޤައުމުގެ އާންމު ހާލަތުވެސް އެކަމަކަށް ތަނެއް ނުދެއެވެ. 2019 ވަނަ އަހަރުން ފަށައިގެން ސޫރިޔާ ފައިސާގެ އަގު ދަނީ ހައްތަހާ ދަށްވަމުންނެވެ. އަވަށްޓެރި ލުބްނާނުގެ ކާރިޘާތަކުގެ އަސަރު، ސޫރިޔާއަށްވެސް ދަނީ ކުރަމުންނެވެ. ޒަރޫރީ މުދަލަށް ދެމުން ދިޔަ ސަބްސިޑީޒް މަޑުމަޑުން ކަނޑާލަމުން ދާއިރު، އަގުތައް ދަނީ އުފުލެމުންނެވެ. ތެލުގެ އަގުތައް އުފުލިފައިވަނީ ތާރީޚު ނުދެކޭ ދަރަޖައަކަށެވެ.

މީގެ 11 އަހަރު ކުރިން ސޫރިޔާގައި ހަނގުރާމަ ފެށިފަހުން މި ދުވަސްވަރަކީ، އެންމެ ގިނަ އަދަދެއްގެ ބަޔަކަށް އިންސާނީ އެހީއަށް ބޭނުން ވެފައިވާ ވަގުތު ކަމަށް އދއިން ވަނީ ބުނެފައެވެ.