ރައީސް އިބްރާހީމް މުޙައްމަދު ޞާލިޙްގެ މަރަދޫ ކެމްޕެއިން އޮފީސް ހުޅުވައިފި
މަރަދޫ ދާއިރާގެ އޮފީހުން ރީ-ރަޖިސްޓްރޭޝަންގެ މަސައްކަތް ކުރިއަށްދާނެ
އެމްޑީޕީ މަރަދޫ ޖަގަހަ ހުޅުވުން
ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙުގެ މަރަދޫ ދާއިރާގެ ކެމްޕެއިން އޮފީސް ހުޅުވައިފި އެވެ.
މިއޮފީސް ހުޅުވައިދެއްވީ ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު އަދި ރިޔާސީ ކެމްޕެއިންގެ އައްޑޫ ކޯޑިނޭޓަރު މުހައްމަދު އަސްލަމްއެވެ. އޮފީސް ހުޅުވައިދެއްވުމަށްފަހު ވާހަކަފުޅު ދައްކަވަމުން އަސްލަމް ވިދާޅުވީ، އެމްޑީޕީއަކީ ކުރިންވެސް މިރާއްޖެއަށް ބަދަލު ގެނެސްދިން ޕާޓީ ކަމަށާއި، އަދި ކުރިއަށް އޮތް ތަނުގައިވެސް މިބަދަލު ގެނެސްދޭނެ ޕާޓީ ކަމަށެވެ. އަދި ވަކިން ޚާއްސަކޮށް އެމްޑީޕީ އުފެދިގެން އައީ އައްޑޫގެ ލެޔާއި ރޫހުން ކަމަށާއި ބަޔަކު ކިތަންމެ މަސައްކަތެއް ކުރި ކަމުގައިވީ ނަމަވެސް އެމްޑީޕީއެއް ރޫޅައެއް ނުލެވޭނެ ކަމަށެވެ.
މިރަސްމިއްޔާތުގައި ވާހަކަފުޅު ދައްކަވަމުން އަސްލަމް ވިދާޅުވީ މިއަދު އަނެއްކާވެސް އެމްޑީޕީން މަސައްކަތް ކުރަމުންދަނީ ރައްޔިތުންނަށް އުފާވެރި ދިވެހިރާއްޖެއަށް ހޯދައިދިނުމަށް ކަމަށާއި އިރާކުރެއްވިއްޔާ ރައީސް ސާލިޙު މި އިންތިޚާބު އެއްބުރުން ކާމިޔާބުކުރައްވާނެ ކަމަށެވެ.
މި ރަސްމިއްޔާތުގައި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވީ އައްޑޫސިޓީއަށް ތަރައްޤީ ގެނެސްދެއްވިި އަދި ކުރިއަށް އޮތް ތަނުގައި މިއަށްވުރެ ބޮޑަށް އެތަރައްޤީ ފުޅާކޮށްދެއްވާނެ ވެރިއަކީ ރައީސް ސާލިޙު ކަމަށެވެ. އެމަނިކުފާނު ވިދާޅުވަމުން ގެންދަވާ ކަންތައްތައް ފުރިހަމައަށް ކުރައްވަމުން ގެންދަވާކަން ފާހަގަކުރައްވަމުން 2023ގެ ރިޔާސީ އިންތިޚާބުގައި އެމަނިކުފާނަށް ވޯޓް ދީ ދެވަނަ ދައުރަކަށް އިންތިޚާބުކުރަން ޖެހޭ ކަމަށް ވެސް ނާޒިލް ވިދާޅުވިއެވެ.
