ވުލްވްސް ދޫކޮށް ރައުލް ހިމެނޭޒް ފުލަމް އަށް ބައްދަލުވަނީ

ވުލްވްސް އަށް ކުޅެމުން އަންނަ މެކްސިކޯގެ ފޯވާޑް ރައުލް ހިމެނޭޒް ފުލަމް އަށް ބަދަލުވާން ނިންމައިފި އެވެ.

އުމުރުން 32 އަހަރުގެ ކުޅުންތެރިޔާ ހޯދުމަށް ފުލަމް އަށް ކުރި މަސައްކަތުގައި މިހާރު ވަނީ ވުލްވްސް އާއެކު އެއްބަސްވުމަކަށް އާދެވިފަ އެވެ. އެހެންކަމުން މި ހަފްތާގެ ތެރޭގައި ދެ ކުލަބުގެ ދެ މެޗުގައި ލިޔެކިޔުންތައް ބަދަލުކޮށް، ފުލަމް އަށް ހިމެނޭޒް ސޮއިކުރާނެ ކަމަށް މީޑިއާތަކުން ވަނީ ބުނެފަ އެވެ. އޭގެ ކުރިން ފުލަމް އިން ވަނީ އަމިއްލަ ގޮތުން ކުޅުންތެރިޔާއާއެކު ވެސް އެއްބަސްވުމަކަށް އައިސްފައި ކަމަށް ރިޕޯޓުތައް ބުނެ އެވެ. ހިމެނޭޒް ހޯދުމަށް ފުލަމް އިން ވުލްވްސް އަށް ދައްކަން ޖެހޭ އަދަދަކީ 5.5 މިލިއަން ޕައުންޑެެވެ. ފުލަމް އަށް ބަދަލުވުމަށް ހަދަން ޖެހޭ މެޑިކަލްގެ ކަންކަން އޭނާ ހޯމަ ދުވަހުގެ ވަގުތެއްގައި ފުރިހަމަ ކުރާނެ ކަމަށް ވެސް ވަނީ ބުނެފަ އެވެ.

މެކްސިކޯގެ ކުލަބު އެމެރިކާ އިން ސީނިއާ ކެރިއަރު ފެށި ހިމެނޭޒް އެންމެ ފުރަތަމަ 2018 ވަނަ އަހަރު ވުލްވްސް އަށް ބަދަލުވީ ލޯނު އެއްބަސްވުމެއްގެ ދަށުންނެވެ. އެއް އަހަރަށް އެކުލަވާލި އެއްބަސްވުން 2019 ވަނަ އަހަރު ހަމަވުމުން، ވުލްވްސް އިން ވަނީ އޭނާއާއެކު ދާއިމީ އެއްބަސްވުމެއް އެކުލަވާލައިފަ އެވެ. ހިމެނޭޒް ވަނީ މިހާތަނަށް ވުލްވްސް އަށް ކުޅެދިން 166 މެޗުގައި 57 ލަނޑު ޖަހައިފަ އެވެ. ވުލްވްސް އަށް ބަދަލުވުމުގެ ކުރިން އޭނާ ވަނީ އެތުލެޓިކޯ މެޑްރިޑު އަދި ބެންފީކާ އަށް ވެސް ކުޅެފަ އެވެ.